2018 ഒക്ടോബറില്‍ സന്ദീപാനന്ദഗിരിയുടെ ആശ്രമം കത്തിച്ച സംഭവം ഏറെ ചര്‍ച്ചയായിരുന്നു. വര്‍ഷങ്ങള്‍ കഴിഞ്ഞിട്ടും ഒരാളെപ്പോലും പിടികൂടാനായിരുന്നില്ല. ഇപ്പോഴിതാ മറ്റൊരു വാര്‍ത്തയാണ് വരുന്നത്. പുതിയ ചികിത്സാ കേന്ദ്രം ആരംഭിക്കുന്നതിന്റെ ഭാഗമായി സന്ദീപാനന്ദഗിരിയുടെ ആശ്രമം ഏറ്റെടുക്കാന്‍ ശുപാര്‍ശ സമര്‍പ്പിച്ച് ഔഷധി.

ആശ്രമം അടക്കം തിരുവനന്തപുരത്ത് നാല് സ്ഥലങ്ങളാണ് ചികിത്സാ കേന്ദ്രം നിര്‍മ്മിക്കാന്‍ കണ്ടെത്തിയിട്ടുള്ളതെന്നാണ് ഔഷധി വിശദീകരിക്കുന്നത്. എന്നാല്‍ സ്ഥലം ഏറ്റെടുക്കുന്നതിന് തീരുമാനം ഒന്നും ആയില്ലെന്നാണ് സന്ദീപാനന്ദഗിരി പറയുന്നത്. കേന്ദ്ര സര്‍ക്കാരിന്റെ ആയുഷ് വകുപ്പിന്റെ ഫണ്ട് ഉപയോഗിച്ചാണ് ഔഷധിക്ക് ചികിത്സാ കേന്ദ്രങ്ങള്‍ വരുന്നത്.

തിരുവനന്തപുരത്തെ ആശ്രമം അടക്കം നാല് സ്ഥലങ്ങള്‍ ഇതിനായി കണ്ടെത്തിയിട്ടുണ്ട്. തിരുവനന്തപുരത്തിന് പുറമെ പത്തനംതിട്ട കോട്ടയം വയനാട് കോഴിക്കോട് ജില്ലകളാണ് പരിഗണനയില്‍. അടിസ്ഥാന സൗകര്യങ്ങള്‍ ഉള്ള കെട്ടിടങ്ങള്‍ക്കാണ് ആദ്യ പരിഗണന. സന്ദീപാനന്ദഗിരിയുടെ ആശ്രമം ഔഷധി അധികൃതര്‍ സന്ദര്‍ശിച്ചെന്ന് ചെയര്‍പേഴ്‌സണ്‍ ശോഭന ജോര്‍ജ്ജ് പറഞ്ഞു. എന്നാല്‍ വില അടക്കം മറ്റ് കാര്യങ്ങളിലൊന്നും ചര്‍ച്ചയോ തീരുമാനമോ ആയിട്ടില്ലെന്നാണ് വിശദീകരണം.

സ്ഥലം ഏറ്റെടുക്കുന്ന കാര്യത്തില്‍ സര്‍ക്കാര്‍ അനുമതി കിട്ടിയാല്‍ വിനോദ സഞ്ചാരികളെ ആകര്‍ഷിക്കും വിധം ചികിത്സ കേന്ദ്രം ഒരുക്കാനാണ് ആലോചന. 1941 ല്‍ തൃശൂരില്‍ ആരംഭിച്ച സ്ഥാപനം മറ്റ് ജില്ലകളിലേക്കൊന്നും പ്രവര്‍ത്തനം വ്യാപിപ്പിച്ചിരുന്നില്ല.

സന്ദീപാനന്ദഗിരി വാര്‍ത്തകളില്‍ എപ്പോഴും നിറയാറുണ്ട്. ആശ്രമം കത്തിച്ച കേസിലെ പ്രതികളെ കണ്ടെത്താന്‍ അമ്പലത്തില്‍ മണിമുഴക്കി സ്വാമി സന്ദീപാനന്ദഗിരി അടുത്തിടെ പ്രാര്‍ത്ഥിച്ചിരുന്നു. അല്‍മോറ ക്ഷേത്രത്തിലായിരുന്നു സന്ദീപാനന്ദഗിരിയുടെ പ്രാര്‍ഥന. പ്രാര്‍ഥിച്ച് മണിമുഴക്കുന്ന വീഡിയോ സന്ദീപാനന്ദഗിരി തന്നെയാണ് ഫേസ്ബുക്ക് പേജില്‍ പങ്കുവെച്ചത്.

'കേരളാ പൊലീസിന് അന്വേഷിച്ച് കാണ്ടെത്താന്‍ പറ്റിയിട്ടില്ല, ക്രൈംബ്രാഞ്ചിന് കണ്ടെത്താന്‍ സാധിച്ചിട്ടില്ല. പാതിരാത്രിയുടെ മറവില്‍ ആശ്രമം കത്തിച്ച ദുഷ്ട ശക്തികളെ നിയമത്തിന് മുന്നില്‍ കൊണ്ടുവരണേ ദേവീ' എന്ന് പ്രാര്‍ഥിച്ചുകൊണ്ടാണ് സന്ദീപാനന്ദഗിരി മൂന്നു തവണ മണിമുഴുക്കിയത്.

ഇന്ത്യന്‍ നീതിന്യായ കോടതികള്‍ക്കുള്ള വെല്ലുവിളികൂടിയായാണ് ഇത്തരത്തില്‍ മണികെട്ടിത്തൂക്കി ജനങ്ങള്‍ക്ക് പ്രാര്‍ത്ഥിക്കേണ്ടി വരുന്നതെന്ന് വീഡിയോയില്‍ സന്ദീപാനന്ദഗിരി പറയുന്നു. മൂന്നര വര്‍ഷം അന്വേഷിച്ചിട്ടും പ്രതിയെ കണ്ടെത്താനാകാത്തതിനെ തുടര്‍ന്ന് കേസന്വേഷണം അവസാനിപ്പിച്ചിരുന്നു.

2018 ഒക്ടോബറിലായിരുന്നു സംഭവം. എന്നാല്‍ ഒരു വര്‍ഷം പോലീസ് അന്വേഷണം നടത്തിയിട്ടും പ്രതിയെ കണ്ടെത്താന്‍ സാധിച്ചില്ല. അടുത്ത രണ്ടര വര്‍ഷത്തോളം ക്രൈംബ്രാഞ്ചും അന്വേഷിച്ചെങ്കിലും ഒരു പുരോഗതിയുമുണ്ടായില്ല.

ആശ്രമത്തിലെ സിസിടിവി പ്രവര്‍ത്തന രഹിതമായിരുന്നു. പിന്നീട് പൊലീസ് ഒരാളുടെ രേഖാചിത്രം തയ്യാറാക്കിയിരുന്നെങ്കിലും അത് പുറത്ത് വിട്ടില്ല. ആശ്രമം തീവയ്പ് സന്ദീപാനന്ദഗിരിയും സി പി എമ്മും ചേര്‍ന്നു നടത്തിയ നാടകമെന്നാണ് പ്രതിപക്ഷത്തിന്റെയും ബിജെപിയുടെയും ആരോപണം.

അതിനിടെ ചാനല്‍ ചര്‍ച്ചകളും കൊഴുത്തു. സന്ദീപാനന്ദഗിരിയുടെ ആശ്രമം കത്തിച്ച സംഭവം ഓര്‍മ്മിപ്പിച്ച് രാഷ്ട്രീയ നിരീക്ഷകന്‍ ശ്രീജിത്ത് പണിക്കരും രംഗത്തെത്തിയിരുന്നു. അന്ധവിശ്വാസങ്ങള്‍ക്കെതിരെ നിയമം കൊണ്ടുവരുമെന്ന് കേരള സര്‍ക്കാര്‍ പറഞ്ഞതിനെ മുന്‍ നിര്‍ത്തി നടന്ന ചര്‍ച്ചയ്ക്കിടെയാണ് രസകരമായ സംഭവുമുണ്ടായി. തലയില്‍ കൈ വെച്ചതു കൊണ്ടോ, കെട്ടിപ്പിടിച്ചതു കൊണ്ടോ ആര്‍ക്കും ഒന്നും ലഭിക്കുന്നില്ല എന്ന് ഹിന്ദു ആചാര്യന്മാരെ ചൂണ്ടിക്കാണിച്ചു കൊണ്ട് സന്ദീപാനന്ദഗിരി തന്റെ വാദം സമര്‍ദ്ധിക്കാന്‍ നോക്കുമ്പോള്‍ അദ്ദേഹത്തിന്റെ ഒരു ചിത്രം ശ്രീജിത്ത് പണിക്കര്‍ പങ്കുവെയ്ക്കുകയായിരുന്നു. ഗുരുവിനെ ആരതി ഒഴിയുന്നതടക്കമുള്ള ചിത്രങ്ങള്‍ ചൂണ്ടിക്കാണിച്ചു കൊണ്ട് ഇതൊന്നും അന്ധവിശ്വാസമല്ലെ എന്ന് ശ്രീജിത്ത് പണിക്കര്‍ ചര്‍ച്ചയില്‍ ചോദിച്ചു. എന്നാല്‍ ഇതൊന്നും തെറ്റല്ല, തന്റെ ആശ്രമത്തില്‍ രണ്ട് നേരവും വിളക്ക് കത്തിക്കാറുണ്ടെന്നും സന്ദീപാനന്ദഗിരി പറഞ്ഞു.