ഒരു ചലച്ചിത്രമേളയ്ക്ക് ഗസ്റ്റായി ക്ഷണിക്കപ്പെട്ട പത്തനംതിട്ട കളക്ടർ ദിവ്യ.എസ്.അയ്യർ വേദിയിൽ തൻ്റെ മകനെ കൂടെ കൂട്ടിയത് നിരവധി വിമർശനങ്ങൾക്ക് വഴിവയ്ക്കുകയുണ്ടായി. ഇത്തരം വിമര്ശനങ്ങൾക്കെതിരെ നിരവധിപേരാണ് രംഗത്ത് എത്തിയത്. '2018ൽ ഐകൃ രാഷ്ട്രസഭയുടെ ജനറൽ അസംബ്ലി സമ്മേളനത്തിൽ തൻ്റെ മൂന്ന് മാസം പ്രായമുള്ള കുഞ്ഞുമായി വന്ന ന്യൂസിലാൻഡ് പ്രധാനമന്ത്രി ജസിന്ത ആർഡൻ ലോകശ്രദ്ധ ആകർഷിച്ചതാണ്. അന്ന് ജെസിന്തയുടെ മാതൃത്വത്തെ പാടിപ്പുകഴ്ത്താൻ നിരന്നു നിന്നിരുന്നു കേരളനാട്ടിലെ പാണന്മാർ' എന്ന് പറയുകയാണ് അഞ്ജു പാർവതി പ്രഭീഷ്.

ഫേസ്ബുക്ക് കുറിപ്പ് ഇങ്ങനെ;

ഈ കാഴ്ചാനുഭവത്തിന് ഒപ്പമാണ്...

ജോലിയുടെ റെസ്പോൺസബിലിറ്റിക്കൊപ്പം മാതൃത്വത്തെ കൂടി ചേർത്തുപ്പിടിക്കുന്ന എത്രയോ മനോഹര കാഴ്ചകൾ പുറം നാടുകളിൽ നമ്മൾ കണ്ടതാണ്; കൈയ്യടിച്ചതുമാണ്. 2018ൽ ഐകൃ രാഷ്ട്രസഭയുടെ ജനറൽ അസംബ്ലി സമ്മേളനത്തിൽ തൻ്റെ മൂന്ന് മാസം പ്രായമുള്ള കുഞ്ഞുമായി വന്ന ന്യൂസിലാൻഡ് പ്രധാനമന്ത്രി ജസിന്ത ആർഡൻ ലോകശ്രദ്ധ ആകർഷിച്ചതാണ്. അന്ന് ജെസിന്തയുടെ മാതൃത്വത്തെ പാടിപ്പുകഴ്ത്താൻ നിരന്നു നിന്നിരുന്നു കേരളനാട്ടിലെ പാണന്മാർ.

ഒട്ടും ഔദ്യോഗികമല്ലാത്ത ഒരു ചടങ്ങിന്, അതും പ്രാദേശികമായി നടത്തിയ ഒരു ചലച്ചിത്രമേളയ്ക്ക് ഗസ്റ്റായി ക്ഷണിക്കപ്പെട്ട പത്തനംതിട്ട കളക്ടർ ദിവ്യ.എസ്.അയ്യർ വേദിയിൽ തൻ്റെ മകനെ കൂടെ കൂട്ടിയത് ചില പുരോഗമന പൊളിറ്റിക്കൽ കറക്ട്നെസ്സുകാർക്ക് പിടിച്ചില്ലത്രേ. അവരുടെ കുടുംബത്തിൻ്റെ രാഷ്ട്രീയവും പേരിൻ്റെ അറ്റത്തുള്ള വാലും പിന്നെ ശബരിമല നടയിൽ ആലപിച്ച ഭക്തിഗാനവും ഒക്കെ കണ്ണിനു പിടിക്കാത്ത ടീമുകൾക്ക് എറിയാൻ കിട്ടിയ ഒരവസരമാണല്ലോ. അതുകൊണ്ട് ഇരവാദവുമായി ഇവറ്റകൾ ചാടിയിറങ്ങി. ഏറ്റവും വലിയ കോമഡി എന്താച്ചാൽ ജനങ്ങളുടെ നികുതിപ്പണമെടുത്ത് കുടുംബസമേതം ലണ്ടൻ യാത്ര നടത്തിയ രായാവിന് സിന്ദാവാ വിളിച്ച അതേ ടീമാണ് ദിവ്യയ്ക്കെതിരെ വാളോങ്ങിയിരിക്കുന്നത്.

രാജ്യാന്തര സമ്മേളനത്തിൻ്റെ ഒരു വേദിയിൽ കേരളത്തെ പ്രതിനിധികരിക്കുന്ന അതേ ഗമയിൽ കോട്ടുമിട്ടിരിക്കുന്ന കൊച്ചുമകനേക്കാൾ അന്തസ്സും ആഭിജാത്യവുമുണ്ട് ഈ കാഴ്ചയ്ക്ക്. ക്ഷണിക്കപ്പെടുന്ന ഏത് വേദിയിൽ ആയാലും തൻ്റെ മകളെ കൂടെ ചേർത്തുപ്പിടിക്കുന്ന ഐശ്വര്യ റായ് എന്നും കാണാൻ ഇഷ്ടപ്പെടുന്ന സുന്ദര കാഴ്ചയാണ്ട്. ഇപ്പോൾ അതേ ഇഷ്ടത്തോടെ ഹൃദയത്തിൽ ചേർക്കുന്നു കുഞ്ഞു മൽഹാറിനെ മടിയിലിരുത്തി നെഞ്ചോട് ചേർത്തുപ്പിടിച്ച ദിവൃയുടെ ഈ ചിത്രവും.