കെ.പി.സി.സി. അധ്യക്ഷന്‍ കെ. സുധാകരന് നാലുപാടുനിന്നും അടിയോടടിയാണ്. ഒട്ടും പ്രതീക്ഷിക്കാതെ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ രംഗത്തെത്തിയത് സുധാകരന് വലിയ ക്ഷീണമായി. മാത്രമല്ല മുസ്ലീംലീഗ് യോഗം ഇന്നാണ്. അതിലും അടി ഉറപ്പാണ്.

കെ.പി.സി.സി. അധ്യക്ഷന്‍ കെ. സുധാകരന്റെ ആര്‍.എസ്.എസ് അനുകൂല നിലപാട് കേരളത്തിലെ കോണ്‍ഗ്രസ്സുകാരുടെ മനസ്സാണെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു. ക്ഷണിക്കാതെ തന്നെ കൂടുതല്‍ കോണ്‍ഗ്രസ്സുകാര്‍ ബിജെപിയിലേക്കു വരുമെന്നും ബിജെപിയില്‍ ചേരുകയല്ലാതെ കോണ്‍ഗ്രസ്സുകാര്‍ക്ക് മറ്റു മാര്‍ഗമില്ലെന്നും കെ. സുരേന്ദ്രന്‍ അഭിപ്രായപ്പെട്ടു.കേരളത്തിലെ ഭൂരിഭാഗം കോണ്‍ഗ്രസ്സുകാരുടേയും മാനസികാവസ്ഥ കെ. സുധാകരന്റേതു പോലെയാണ്.

അത് ചിലര്‍ സ്വകാര്യമായി പറയുമ്പോള്‍ സുധാകരനെ പോലെ ചിലര്‍ അതു പരസ്യമായി പറയാന്‍ തയ്യാറാകുന്നു. കോണ്‍ഗ്രസ്സിന്റെ ഭൂരിഭാഗം നേതാക്കളും അവസരം ലഭിച്ചാല്‍ ബിജെപിയില്‍ ചേരുമെന്നും കെ. സുരേന്ദ്രന്‍ പറഞ്ഞു. ആരുടേയും പേരെടുത്തു പറയാന്‍ താന്‍ ആഗ്രഹിക്കുന്നില്ലെന്നും കെ. സുരേന്ദ്രന്‍ കൂട്ടിച്ചേര്‍ത്തു. അതേസമയം സുരേന്ദ്രനെതിരെ രൂക്ഷമായ ഭാഷയില്‍ സുധാകരന്‍ രംഗത്തെത്തി.

നെഹ്‌റുവിനെക്കുറിച്ചുള്ള വിവാദ പ്രസ്താവനയില്‍ കെ.സുധാകരനെതിരെ കോണ്‍ഗ്രസില്‍ അമര്‍ഷം മുറുകുന്നു. വിഷയത്തില്‍ സുധാകരനോട് എഐസിസി നേരിട്ട് വിശദീകരണം തേടിയെന്ന് കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി താരീഖ് അന്‍വര്‍ ഇന്ന് വ്യക്തമാക്കി.നെഹ്‌റുവിനെക്കുറിച്ചുള്ള പ്രസ്താവന നാക്ക് പിഴയാണെന്ന് സുധാകരന്‍ പറഞ്ഞതായാണ് വിവരം. സംസ്ഥാന നേതൃത്വത്തോടും താരീഖ് അന്‍വര്‍ ഇന്ന് സംസാരിച്ചു.

വിഷയത്തില്‍ സുധാകരന്‍ ഖേദം പ്രകടിപ്പിച്ചു കഴിഞ്ഞുവെന്ന പറഞ്ഞ താരീഖ് അന്‍വര്‍ അദ്ദേഹത്തിന്റെ മറുപടി തൃപ്തികരമാണെന്ന് വ്യക്തമാക്കിയിട്ടുണ്ട്. ആര്‍ക്കും നാക്ക് പിഴയുണ്ടാകാമെന്നും ഭാവിയില്‍ ഇത്തരം പ്രസ്താവനകള്‍ ഉണ്ടാകില്ലെന്ന് സുധാകരന്‍ ഉറപ്പ് നല്‍കിയിട്ടുണ്ടെന്നും പറഞ്ഞ താരീഖ് അന്‍വര്‍ തത്കാലം ഹൈക്കമാന്‍ഡ് സുധാകരനെ കൈവിടില്ലെന്ന് സൂചനയാണ് നല്‍കുന്നത്. എന്നാല്‍ കോണ്‍ഗ്രസ് സംസ്ഥാന ഘടകത്തിലും യുഡിഎഫ് മുന്നണിയിലും സുധാകരനെതിരെ അമര്‍ഷം ശക്തമാണ്.

മുസ്ലീം ലീഗ് തങ്ങളുടെ അമര്‍ഷം ഇതിനോടകം പരസ്യപ്പെടുത്തി കഴിഞ്ഞു. ഇന്ന് കോഴിക്കോട് ചേരുന്ന ലീഗിന്റെ ഉന്നതാധികാര സമിതി യോഗം ഈ വിഷയം ചര്‍ച്ച ചെയ്യും. ഇതിന് ശേഷമുള്ള ലീഗ് നിലപാട് എന്താവും എന്നത് നിര്‍ണായകമാണ്.

കെ സുധാകരന്‍ തിരുത്തണമെന്ന് പരസ്യമായി പറഞ്ഞ കെ മുരളീധരന്‍ പാര്‍ട്ടിക്കുള്ളില്‍ സുധാകരനെതിരെ ഉയരുന്ന അതൃപ്തിയും രോഷവും കൂടിയാണ് പ്രകടമാക്കിയത്. ഖേദപ്രകടനം കൊണ്ടായില്ലെന്നും ലീഗിനെ അടക്കം വിശ്വാസത്തില്‍ എടുത്തുള്ള തിരുത്തല്‍ വേണമെന്നും മുരളീധരന്‍ പറഞ്ഞു. അടിക്കടി സുധാകരന്‍ നടത്തുന്ന പ്രസ്താവനകളിലെ കടുത്ത അതൃപ്തിയാണ് വി ഡി സതീശന്‍ അടക്കമുള്ള നേതാക്കള്‍ വ്യക്തമാകുന്നത്.

മതേതര നിലപാടില്‍ വെള്ളം ചേര്‍ക്കാന്‍ അനുവദിക്കില്ലെന്നും പരാമര്‍ശം എല്ലാവരേയും ബാധിക്കുമെന്ന സതീശന്റെ പ്രതികരണത്തിലൂടെ വിവാദത്തില്‍ സുധാകരന്‍ ഒറ്റപ്പെടുവന്നുവെന്ന് വ്യക്തമാകുകയാണ്.

ആര്‍എസ്എസ് ശാഖക്ക് സംരക്ഷണം കൊടുത്തുവെന്ന പ്രസ്താവനയിലെ ന്യായീകരണം തൊണ്ട തൊടാതെ വിഴുങ്ങാന്‍ നേതാക്കളില്‍ ഒരു വിഭാഗം തയ്യാറായിരുന്നില്ല. പിന്നാലെ വര്‍ഗീയതയോട് നെഹ്‌റു സന്ധി ചെയ്കതുവെന്ന പ്രസ്താവന കൂടി വന്നതോടെ പാര്‍ട്ടി തന്നെ വെട്ടിലായിരിക്കുകയാണ്.

പ്രാദേശിക തലങ്ങളില്‍ പോലും സുധാകരന്റെ പ്രസ്താവനക്കെതിരെ കടുത്ത അമര്‍ഷം ഉയരുമ്പോള്‍ നേതൃത്വം അമ്പേ പ്രതിരോധത്തിലാകുകയാണ്. ലീഗടക്കമുള്ള ഘടകകക്ഷികളുടെ പ്രതിഷേധവും കോണ്‍ഗ്രസിനെ ക്ഷീണമാകുന്നു. ഈ സാഹചര്യത്തിലാണ് നേതൃത്വത്തില്‍ ഒരു വിഭാഗത്തിന്റെ ആശിര്‍വാദത്തോടെ ചില എംപിമാരടക്കം സുധാകരനെതിരെ നടപടി ആവശ്യപ്പെട്ട് എഐസിസിയെ സമീപിച്ചിരിക്കുകയാണ്. സുധാകരന്റെ വരവോടെ സംസ്ഥാന രാഷ്ട്രീയത്തില്‍ അപ്രസക്തരായ നേതാക്കളും പടയൊരുക്കത്തിന് പിന്നിലുണ്ട്. തെരഞ്ഞെടുപ്പുകള്‍ അതി വിദൂരത്തിലല്ലാത്തതിനാല്‍ ഘടകകക്ഷികളുടെ അതൃപ്തി ദേശീയ നേതൃത്വത്തേയും ആശയക്കുഴപ്പത്തിലാക്കിയിരിക്കുകയാണ്.