തിരുവനന്തപുരത്തു നിന്നും പാലായിലേക്ക് പോവുന്ന മാണിക്ക് പാര്ട്ടി പ്രവര്ത്തകര് വിവിധ സ്ഥലങ്ങളില് സ്വീകരണം നല്കും
മന്ത്രിസ്ഥാനം രാജിവെച്ച കെ.എം. മാണിക്ക് പാര്ട്ടി പ്രവര്ത്തകര് ഇന്ന് തിരുവനന്തപുരം മുതല് പാലാ വരെ വിവിധ സ്ഥലങ്ങളില് സ്വീകരണം നല്കും. പാലായില് നടക്കുന്ന പൊതുസമ്മേളനത്തില് പരമാവധി പ്രവര്ത്തകരെ അണിനിരത്തി ശക്തി തെളിയിക്കാനാണ് കീഴ്ഘടകങ്ങള്ക്ക് നല്കിയിരിക്കുന്ന നിര്ദ്ദേശം. പി.ജെ. ജോസഫ് ഉള്പ്പെടെയുള്ളവരും പാലായിലെത്തും.
മന്ത്രി സ്ഥാനത്തുനിന്ന് പടിയിറങ്ങേണ്ടി വന്ന കെ.എം. മാണിക്ക് പാര്ട്ടിയുടെ പൂര്ണ്ണ പിന്തുണ പ്രഖ്യാപിക്കുകയാണ് വിവിധ സ്ഥലങ്ങളില് സംഘടിപ്പിച്ചിരിക്കുന്ന സ്വീകരണങ്ങളിലൂടെ ലക്ഷ്യമിടുന്നത്. രാവിലെ 8.30ന് തിരുവനന്തപുരത്ത് നിന്ന് തുടങ്ങും.
തുടര്ന്ന് കൊട്ടാരക്കര, ഏനാത്ത്, അടൂര്, ചെങ്ങന്നൂര്, പന്തളം, തിരുവല്ല, ചങ്ങനാശ്ശേരി, കോട്ടയം, ഏറ്റുമാനൂര് എന്നിവിടങ്ങളില് സ്വീകരണങ്ങളൊരുക്കും. പാലായില് പൊതുസമ്മേളനത്തോടെ സമാപനം. മാണിയുടെ തട്ടകമായ കോട്ടയത്തും പാലായിലും പരമാവധി ആളെക്കൂട്ടാനാണ് കീഴ്ഘടകങ്ങള്ക്ക് നല്കിയിരിക്കുന്ന നിര്ദ്ദേശം. കോട്ടയത്ത് വൈകിട്ട് നാല് മണിയോടെ എത്തുന്ന കെ.എം. മാണിയെ കോടിമതയില്നിന്ന് തുറന്ന ജീപ്പില് ആനയിക്കും. ഗാന്ധി സ്ക്വയറിലാകും സ്വീകരണം.പാലായില് നടക്കുന്ന പൊതുസമ്മേളനത്തില് ജോസഫ് വിഭാഗം നേതാക്കളും പങ്കെടുക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
