മാതാപിതാക്കളെ കാണാനെത്തിയ പ്രതി കള്ളു കുടിക്കാനായി മുങ്ങി..... പോലീസുകാരെ വെട്ടിച്ച് കടന്ന പ്രതി പിടിയില്‍..... ഒരു ലിറ്റര്‍ കള്ള് കുടിക്കണമെന്നുണ്ടായിരുന്നു സാറേ. അതു കഴിഞ്ഞ് കീഴടങ്ങാന്‍ തീരുമാനിച്ചതാണ്. പക്ഷേ, ഒന്നും നടന്നില്ല...'' പൊലീസ് കസ്റ്റഡിയില്‍ നിന്ന് മുങ്ങിയശേഷം പിടിയിലായ കൊലപാതകക്കേസ് പ്രതി പൊന്മുടി കളപ്പുരയില്‍ ജോമോന്‍ (44) ഇന്നലെ തന്നെ പിടികൂടിയ ഉദ്യോഗസ്ഥരോടു പറഞ്ഞതാണിങ്ങനെ.

ബുധനാഴ്ച വൈകിട്ടാണ് ഇയാള്‍ പൊലീസുകാരെ വെട്ടിച്ചു കടന്നുകളഞ്ഞത്. 2015ല്‍ കോട്ടയം അയര്‍ക്കുന്നം സ്വദേശിയെ കൊലപ്പെടുത്തിയ കേസിലെ പ്രതിയാണു ജോമോന്‍.കണ്ണൂര്‍ സെന്‍ട്രല്‍ ജയിലില്‍ റിമാന്‍ഡില്‍ കഴിയുകയായിരുന്ന ജോമോനെ ബുധനാഴ്ച വൈകുന്നേരമാണു പ്രായമായ മാതാപിതാക്കളെ കാണാനായി പൊലീസ് സംരക്ഷണത്തില്‍ പൊന്മുടിയിലുള്ള വീട്ടിലെത്തിച്ചത്. ഇവിടെ നിന്നാണ് രണ്ടു പൊലീസുകാരെ വെട്ടിച്ച് പൊന്മുടി വനത്തിലേക്ക് ജോമോന്‍ കടന്നുകളഞ്ഞത്.

മൂന്നാര്‍ ഡിവൈഎസ്പി കെ.ആര്‍.മനോജ്, രാജാക്കാട് എസ്എച്ച്ഒ ബി.പങ്കജാക്ഷന്‍ എന്നിവരുടെ നേതൃത്വത്തില്‍ ബുധനാഴ്ച രാത്രിയും ഇന്നലെ രാവിലെ 11 വരെയും തിരച്ചില്‍ നടത്തി.

രാത്രി മുഴുവന്‍ പൊന്മുടി ക്യാച്‌മെന്റ് ഏരിയയില്‍ കഴിഞ്ഞ ജോമോനെ വീട്ടില്‍ നിന്നു 2 കിലോമീറ്റര്‍ അകലെനിന്നാണ് ഇന്നലെ പൊലീസ് കണ്ടെത്തിയത്. പൊലീസ് കസ്റ്റഡിയില്‍ നിന്ന് കടന്നുകളയാനായി ശ്രമിച്ച കേസില്‍ അടിമാലി കോടതിയില്‍ ഹാജരാക്കിയ പ്രതിയെ റിമാന്‍ഡിലാക്കി.