നിലപാട് വ്യക്തമാക്കി മന്ത്രി രംഗത്ത്. കോളജ് കാമ്പസുകളില്‍ ആണ്‍കുട്ടികളും പെണ്‍കുട്ടികളും ഒന്നിച്ചിരിക്കുന്നതിനോടു യോജിപ്പില്ലെന്നു വിദ്യാഭ്യാസമന്ത്രി പി.കെ. അബ്ദുറബ്ബ്. കോഴിക്കോട് ഫാറൂഖ് കോളജില്‍ വിദ്യാര്‍ഥികള്‍ ഇടകലര്‍ന്നിരിക്കുന്നതു സംബന്ധിച്ചു വിവാദങ്ങളുണ്ടായ പശ്ചാത്തലത്തിലാണ് പ്രതികരണം. എന്നാല്‍ വിവാദം സംബന്ധിച്ച് ഫാറൂഖ് കോളജില്‍ നിന്നും പരാതി ലഭിച്ചിട്ടില്ല. കേരളത്തിലെ കോളജുകളില്‍ ഒരിടത്തും ഇടകലര്‍ന്നിരിക്കുന്നതു ശ്രദ്ധയില്‍പ്പെട്ടിട്ടില്ലെന്നും വിദ്യാഭ്യാസമന്ത്രി പറഞ്ഞു.
ആണ്‍കുട്ടികളും പെണ്‍കുട്ടികളും ക്ലാസ് മുറിയില്‍ ഇടകലര്‍ന്നിരിക്കുന്നതു ഫാറൂഖ് കോളജ് അധികൃതര്‍ തടഞ്ഞതിനെ ചോദ്യംചെയ്തതിനെ തുടര്‍ന്നു ബിഎ സോഷ്യോളജി വിദ്യാര്‍ഥി കെ. ദിനുവിനെ സസ്‌പെന്‍ഡ് ചെയ്തിരുന്നു. പിന്നീട് ഹൈക്കോടതി സസ്‌പെന്‍ഡ് ചെയ്ത നടപടി സ്റ്റേ ചെയ്യുകയായിരുന്നു.

അതേസമയം മന്ത്രി പ്രസ്താവന പിന്‍വലിക്കണമെന്ന് കെഎസ്‌യു പ്രസിഡന്റ് വി എസ് ജോയി ആവശ്യപ്പെട്ടു. കലാലയങ്ങളെ ദേവാലയങ്ങളോ ക്ഷേത്രങ്ങളാക്കാനോ അനുവദിക്കില്ലെന്നും ജോയ് പറഞ്ഞു. അബ്ദുറബ്ബിന്റെ പ്രസ്താവന നിര്‍ഭാഗ്യകരമാണെന്ന് ബിന്ദുകൃഷ്ണ അഭിപ്രായപ്പെട്ടു. എന്നാല്‍, മന്ത്രിയെ അനുകൂലിക്കുന്ന നിലപാടാണ് കെ എം ഷാജി എംഎല്‍എയും എംഇഎസ് ചെയര്‍മാന്‍ ഡോ. ഫസല്‍ ഗഫൂറും കൈക്കൊണ്ടത്. മന്ത്രിയുടെ അഭിപ്രായത്തില്‍ തെറ്റില്ലെന്ന് ഇരുവരും പ്രതികരിച്ചു.
ആണ്‍കുട്ടികളും പെണ്‍കുട്ടികളും വെവേറെ സീറ്റില്‍ മാത്രമേ ഇരിക്കാവൂ എന്ന് കോളേജില്‍ നിയമമുണ്ടെന്നും അത് പാലിക്കാത്തവര്‍ തന്റെ ക്ലാസിലിരിക്കേണ്ടെന്നാണ് സംഭവദിവസം അദ്ധ്യാപകന്‍ പറഞ്ഞതെന്ന് വിദ്യാര്‍ത്ഥികള്‍ ആരോപിച്ചിരുന്നു. ഒരുമിച്ചിരിക്കുന്നതിനും സംസാരിക്കുന്നതിനും ക്യാമ്പസില്‍ വിലക്കുണ്ടെന്നും വിദ്യാര്‍ത്ഥികള്‍ പറയുന്നു. നേരത്തെ ഇത്തരം പ്രശ്‌നങ്ങള്‍ ഉണ്ടായപ്പോള്‍ കോളേജിന്റെ സല്‍പ്പേര് കളയരുതെന്ന് പ്രിന്‍സിപ്പല്‍ ആവശ്യപ്പെട്ടിരുന്നെന്നും വിദ്യാര്‍ത്ഥികള്‍ പറഞ്ഞു.
ഇത് കൂടാതെ ഫാറൂഖ് കോളേജ് വിഷയത്തില്‍ പുറത്താക്കിയവരെ അനുകൂലിച്ച് ഫേസ്ബുക്കില്‍ അഭിപ്രായം രേഖപ്പെടുത്തിയ കോളേജ് അദ്ധ്യാപകനെ സസ്‌പെന്റ് ചെയ്ത സംഭവവും വിവാദമായിരുന്നു. കോഴിക്കോട് അരീക്കോട് സുല്ല മുസ്ലാം സയന്‍സ് കോളേജിലെ അദ്ധ്യാപകന്‍ ഷെഫീഖിനെയാണ് ഫേസ്ബുക്ക് പോസ്റ്റിന്റെ പേരില്‍ പുറത്താക്കിയത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha