കഴിഞ്ഞ ദിവസമാണ് പെട്ടെന്ന് കാര്യം നടക്കാൻ 3000 രൂപ കൈക്കൂലി വാങ്ങിയ സബ് രജിസ്ട്രാർ ഓഫീസിൽ ജീവനക്കാരി പിടിയിലായത്. ഇതിനെതിരെ വിമർശനവുമായി രംഗത്ത് എത്തിയിരിക്കുകയാണ് മുരളി തുമ്മാരുകുടി.

ഫേസ്ബുക്ക് കുറിപ്പ് ഇങ്ങനെ;

അഴിമതിയുടെ പൊളിറ്റിക്കൽ ഇക്കോണമി
ഞാൻ എന്നാണ് അഴിമതിയെപ്പറ്റി കേട്ടു തുടങ്ങിയത്?
അഞ്ചു വയസ്സിനും പത്തു വയസ്സിനും ഇടയിൽ എപ്പോഴോ ആണ്.

ഏതോ സ്ഥലത്തിന്റെ ആധാരത്തിന്റെ കോപ്പിയെടുക്കാനോ മറ്റോ രെജിസ്ട്രേഷൻ ഓഫീസിൽ കയറിയിറങ്ങി അവസാനം "എഴുത്തുകാരൻ" വഴി കൈക്കൂലി നൽകിയ കാര്യം അമ്മാവനാണ് പറഞ്ഞത്.
മുഴുവൻ ഒന്നും മനസ്സിലായില്ല. പക്ഷെ എഴുത്തുകാർ കൈക്കൂലി മേടിക്കുമോ എന്നൊക്കെ അന്ന് തോന്നിയിരുന്നു. ഇന്നിപ്പോൾ അഞ്ചു പതിറ്റാണ്ട് കഴിഞ്ഞു. അതിനിടയിൽ എത്രയോ സർക്കാർ വന്നു. ഏതൊക്കെ മുന്നണികൾ, എത്ര മന്ത്രിമാർ? എല്ലാവരും അഴിമതി തുടച്ചുനീക്കൽ വാഗ്ദാനം ചെയ്തവർ തന്നെ. അടിയന്തിരാവസ്ഥ വന്നു. അഴിമതി തടയൽ അവിടെയും പറഞ്ഞു.

അഴിമതി ഇല്ലാത്ത മന്ത്രിമാർ വന്നു. അഴിമതിക്കാരല്ലാത്ത ഉദ്യോഗസ്ഥർ എത്രയോ വന്നു കാണും. എന്നിട്ടും രെജിസ്ട്രേഷൻ വകുപ്പിൽ എന്തുകൊണ്ടാണ് അഴിമതി മാറാത്തത്? ഇത് ഈ വകുപ്പിന്റെ മാത്രം കാര്യമല്ല കെട്ടോ. അഞ്ചു പതിറ്റാണ്ടിന്റെ കാര്യവും അല്ല. മന്ത്രിമാർക്ക് മുൻപ് രാജാവ് ഭരിക്കുന്പോഴും അഴിമതി ഒക്കെ ഉണ്ടായിരുന്നു. ഇനി അഞ്ചു പതിറ്റാണ്ടു കഴിഞ്ഞാലും ഇതൊക്കെ മാറുമോ? പിന്നീടൊരിക്കൽ വിശദമായി എഴുതാം.
" അപ്പോൾ സാർ ഒരു സംശയം?"
പറയൂ
"ഈ പൊളിറ്റിക്കൽ എക്കോണമി എന്ന് കൂട്ടിച്ചേർത്തത്?"

അതായത് ഉത്തമാ, ഞങ്ങൾ അന്താരാഷ്ട്രക്കാർ എന്തെങ്കിലും അങ്ങനെ ചുമ്മാ പറയില്ല.
Political economy, epistemology, governance എന്നൊക്കെ ഇടക്ക് പ്രയോഗിക്കും. അതിനെ അത്ര കാര്യമായി എടുക്കേണ്ട. A long ass flight is the same long flight without the ass എന്ന് Ismo യും പറഞ്ഞിട്ടുണ്ടല്ലോ. കണ്ടിട്ടില്ലാത്തവർക്ക് ലിങ്ക് ഒന്നാമത്തെ കമന്റിൽ.

മുരളി തുമ്മാരുകുടി