ബസുകളില്‍ പരസ്യം പതിക്കുന്നതിനെതിരായ കേരള ഹൈക്കോടതി ഉത്തരവ് ചോദ്യംചെയ്ത് കെ.എസ്.ആര്‍.ടി.സി. സുപ്രീംകോടതിയെ സമീപിച്ചു.
മരണക്കയത്തില്‍ അകപ്പെട്ടയാള്‍ അവസാന രക്ഷപ്പെടലിനായി കച്ചിതുരുമ്പിലും കയറി പിടിക്കുമെന്നു പറഞ്ഞ പോലെയാണ് കെ.എസ്.ആര്‍.ടി.സിയുടെ ഗതി. രക്ഷപ്പെടാനായി ബസില്‍ സ്‌കൂളും, ചായക്കടയും , ബെഡ്‌റൂമും, എന്തിന് കല്യാണ പന്തല്‍ വരെ ഒരുക്കി നോക്കി. എന്നിട്ടും വിചാരിച്ചത്ര പുരോഗതിയുണ്ടായില്ല. ശ്രമങ്ങള്‍ ഒരു വശത്ത് നടക്കുമ്പോഴാണ് പരസ്യം നിരോധിച്ചു കൊണ്ടുള്ള ഹൈക്കോടതിയുടെ ഉത്തരവ്. പരസ്യ വരുമാനം നഷ്ടപ്പെട്ടു എന്നു മാത്രമല്ല. അതിലൂടെ നടത്തിയിരുന്ന ചിലവുകള്‍ പരിഹരിക്കാനും കഴിയാത്ത അവസ്ഥയുമായി.
നിരവധി കോടതി ഉത്തരവുകള്‍ ഉണ്ടായിട്ടും കൃത്യമായി ശമ്പളം കൊടുക്കാന്‍ പോലും കഴിയാത്ത അവസ്ഥയിലേയ്ക്ക് സാമ്പത്തിക സ്ഥിതിയും വരുമാനവും കുറഞ്ഞു കൊണ്ടിരിക്കുന്നു. എന്നിട്ടും വകുപ്പിനെ രക്ഷപ്പെടുത്താന്‍ ഗതാഗത മന്ത്രിയുടെ ഭാഗത്ത് നിന്നും കാതലായ ഇടപെടലുണ്ടാകാത്തത് ആശങ്കയുളവാക്കുന്നതാണ്.
ബസുകളില്‍ പരസ്യം പതിക്കുന്നതിനെതിരായ കേരള ഹൈക്കോടതി ഉത്തരവ് ചോദ്യംചെയ്ത് കെ.എസ്.ആര്‍.ടി.സി. സുപ്രീംകോടതിയെ സമീപിച്ചു. ഒമ്പതിനായിരം കോടി രൂപയുടെ കടമുള്ളപ്പോഴും പൊതുസേവനം നടത്തുന്ന കെ.എസ്.ആര്‍.ടി.സി.ക്ക് പ്രതിമാസം ഒന്നരക്കോടിയുടെ പരസ്യവരുമാനമാണ് ഹൈക്കോടതി ഉത്തരവുകാരണം നഷ്ടമാവുന്നതെന്നും ഹര്‍ജിയില്‍ ചൂണ്ടിക്കാട്ടി. അതിനാല്‍ ഹൈക്കോടതി ഉത്തരവ് അടിയന്തരമായി സ്റ്റേചെയ്യണമെന്നും കെ.എസ്.ആര്‍.ടി.സി. ആവശ്യപ്പെട്ടു.
നടപടിക്രമങ്ങള്‍ പാലിക്കാതെയാണ് ഹൈക്കോടതി ഉത്തരവെന്നും അഡ്വ. ദീപക് പ്രകാശ് വഴി ഫയല്‍ചെയ്ത ഹര്‍ജിയില്‍ കെ.എസ്.ആര്‍.ടി.സി. ചൂണ്ടിക്കാട്ടി. ഹൈക്കോടതി സ്വമേധയാ കേസെടുത്താണ് പരസ്യംപാടില്ലെന്ന ഉത്തരവിറക്കിയത്. എന്നാല്‍, സ്വമേധയാ കേസെടുക്കുന്നതിനുമുമ്പ് ഇത് ചീഫ് ജസ്റ്റിസിന് മുന്നില്‍വെച്ചിട്ടില്ല. അതിനാല്‍ നടപടിക്രമം പാലിച്ചില്ല. ശബരിമല സര്‍വീസിന് അനുമതിയുള്ളത് കെ.എസ്.ആര്‍.ടി.സി.ക്ക് മാത്രമാണ്.
പ്രതിദിനം ഒരുലക്ഷംവരെ തീര്‍ഥാടകരെത്തുന്ന ശബരിമലയിലെ സര്‍വീസിനായി 500 ബസുകള്‍ മാറ്റിയിട്ടുണ്ട്. ഹൈക്കോടതി ഉത്തരവ് ശബരിമല സര്‍വീസുകളെയും ബാധിക്കും. സ്വമേധയാ വിഷയങ്ങളില്‍ കോടതികള്‍ ഇടപെടുന്നതിനെ സ്വാഗതംചെയ്യുന്നു. അതുപക്ഷേ, നടപടിക്രമങ്ങള്‍ പാലിച്ചായിരിക്കണം.
കേരള മോട്ടോര്‍ വാഹനച്ചട്ടപ്രകാരം ആവശ്യമായ അനുമതികള്‍ നേടിയാണ് കെ.എസ്.ആര്‍.ടി.സി. സര്‍വീസ് നടത്തുന്നത്. ഹൈക്കോടതി ഉത്തരവിന്റെയും സംസ്ഥാന സര്‍ക്കാര്‍ ഉത്തരവിന്റെയും അടിസ്ഥാനത്തിലാണ് 545 ബസുകളില്‍ പരസ്യം പതിച്ചത്. എന്നാല്‍, ഹൈക്കോടതി ഉത്തരവുപ്രകാരം പരസ്യവരുമാനം ഇല്ലാതായെന്നും ഹര്‍ജിയില്‍ പറയുന്നു.
വടക്കഞ്ചേരി ബസ് അപകടവുമായി ബന്ധപ്പെട്ട് സ്വമേധയാ എടുത്ത കേസിലാണ് ജസ്റ്റിസുമാരായ അനില്‍ കെ.നരേന്ദ്രന്‍, പി.ജി.അജിത് കുമാര്‍ എന്നിവരടങ്ങിയ ഡിവിഷന്‍ ബെഞ്ച് ബസുകളെ പരസ്യം കൊണ്ട് മൂടാനാകില്ലെന്ന് പറഞ്ഞത്. ബസ്സുകളുടെ പിന്നിലും വശങ്ങളിലും പരസ്യം പതിക്കാനുള്ള നിയമപരമായ അനുമതി ഉണ്ടെന്ന് സര്‍ക്കാര്‍ കോടതിയെ അറിയിച്ചപ്പോഴായിരുന്നു ഡിവിഷന്‍ ബെഞ്ചിന്റെ മറുപടി. അതേസമയം പ്രത്യേക പരിഗണനയല്ല ആവശ്യപ്പെടുന്നത് എന്ന് സര്‍ക്കാര്‍ അറിയിച്ചു.. കെഎസ്ആര്‍ടിസി പ്രതിസന്ധി നേരിടുന്ന സമയമാണിത്. പരസ്യം ഒഴിവാക്കുന്നത് കടത്തിലുള്ള കോര്‍പ്പറേഷനെ കൂടുതല്‍ പ്രതിസന്ധിയിലാക്കും. വിഷയത്തില്‍ കെഎസ്ആര്‍ടിസിയെ കൂടി കേള്‍ക്കണമെന്നും സര്‍ക്കാര്‍ ആവശ്യപ്പെട്ടിരുന്നു.
സുരക്ഷാ മാനദണ്ഡം പാലിക്കുന്നതില്‍ സ്വകാര്യ - പൊതു വാഹനങ്ങള്‍ എന്ന വ്യത്യാസമില്ലെന്നും നിലവില്‍ പതിച്ചിട്ടുള്ള പരസ്യങ്ങള്‍ നീക്കം ചെയ്യണമെന്നും പിന്നീട് ഹൈക്കോടതിന നിര്‍ദ്ദേശിച്ചു. കെഎസ്ആര്‍ടിസി, കെയുആര്‍ടിസി ബസുകളിലെ പരസ്യങ്ങള്‍ സുരക്ഷാ മാനദണ്ഡങ്ങള്‍ക്ക് വിരുദ്ധമാണെന്ന് കോടതി നിരീക്ഷിച്ചിരുന്നു. ഇത്തരം പരസ്യങ്ങള്‍ പാടില്ല. പരസ്യങ്ങള്‍ എതിരെ വരുന്ന വാഹനങ്ങളിലെ ഡ്രൈവര്‍മാരുടെ ശ്രദ്ധ തിരിക്കുന്നതായും ഇത് സുരക്ഷാ മാനദണ്ഡങ്ങള്‍ക്ക് വിരുദ്ധമാണെന്നും കോടതി ചൂണ്ടിക്കാട്ടിയിരുന്നു.
എന്നാല്‍ ബസുകളില്‍ പരസ്യം പതിക്കാതിരുന്നാല്‍ കോര്‍പ്പറേഷന്‍ കൂടുതല്‍ നഷ്ടത്തിലേയ്ക്ക് പോകുമെന്നാണ് ഗതാഗത മന്ത്രി ആന്റണി രാജുവിന്റെ അഭിപ്രായം. സുപ്രീംകോടതിയില്‍ കോര്‍പ്പറേഷന്റെ നിലവിലെ സ്ഥിതിയും സാമൂഹിക സേവനവുമൊക്കെ വിശദമാക്കിയാണ് റിവ്യൂപെറ്റിഷന്‍ നല്കിയിരിക്കുന്നത്.
https://www.facebook.com/Malayalivartha
