ആ യാത്ര അന്ത്യയാത്രയായി....കരള്‍ രോഗത്തിന് ചികിത്സിക്കാന്‍ ആശുപത്രിയില്‍ പോയി മടങ്ങവേ ഓട്ടോറിക്ഷയും കാറും കൂട്ടിയിടിച്ച് പരിക്കേറ്റ രോഗി മരിച്ചു.

സംസ്ഥാന പാതയില്‍ കിളിമാനൂരിന് സമീപത്തായി നടന്ന അപകടത്തില്‍ പരിക്കേറ്റ അടൂര്‍ പന്നിവിഴ വടക്കേതില്‍ പത്തിശ്ശേരില്‍ വീട്ടില്‍ പി.എസ്. രാജേഷ് (49) ആണ് മരിച്ചത്. ബുധനാഴ്ച വൈകീട്ട് 5.45ന് പെരുന്തമണ്‍ എം.ജി.എം സ്‌കൂളിന് മുന്നിലായിരുന്നു അപകടം നടന്നത്.

കാറിലുണ്ടായിരുന്ന പന്നിവിഴ ശിവശൈലത്തില്‍ റിട്ട. എസ്.ഐ സുജാതക്ക് പരിക്കേറ്റു. രാജേഷിന്റെ ചികിത്സക്ക് തിരുവനന്തപുരം മെഡിക്കല്‍ കോളജ് ആശുപത്രിയില്‍ പോയ ശേഷം അടൂരിലേക്ക് മടങ്ങവേയാണ് അപകടം നടന്നത്.

അപകടത്തെ തുടര്‍ന്ന് അവശനിലയിലായ രാജേഷിനെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ പുലര്‍ച്ചെ മരിച്ചു.