പാലക്കാട് നഗരത്തിൽ സ്ഫോടക വസ്തു പൊട്ടി പശുവിന് ഗുരുതര പരിക്ക്. പട്ടിക്കര ബൈപാസിൽ മാലിന്യക്കൂനയിൽ ഭക്ഷണം തിരയുന്നതിനിടെയാണ് പശുവിന് സ്ഫോടക വസ്തു പൊട്ടി ഗുരുതര പരിക്കേറ്റത്. സംഭവത്തിൽ വടക്കന്തറ പ്രാണൻകുളം മനോജിന്റെ വീട്ടിലെ പശുവിനാണ് പരിക്കേറ്റത്.

കഴിഞ്ഞ ദിവസം വൈകീട്ട് നാലിനാണ് സംഭവം ഉണ്ടായത്. സാധാരണ മാലിന്യനിക്ഷേപം വ്യാപകമായ പട്ടിക്കര ബൈപാസിൽ കന്നുകാലികൾ അലഞ്ഞ് തിരിയുന്നത് പതിവാണ്. തുടർന്ന് ഇത്തരത്തിൽ മാലിന്യക്കൂനയിൽ ഭക്ഷണം തിരയുന്നതിനിടെയാണ് പൊട്ടിത്തെറിയുണ്ടായത്. അപകടത്തിൽ വായ പൂർണമായി തകർന്ന പശുവിനെ ചികിത്സക്കായി മൃഗാശുപത്രിയിലേക്ക് മാറ്റി.

അതേസമയം ഇതിനു പിന്നാലെ സംഭവസ്ഥലത്ത് നോർത്ത് പൊലീസ് പരിശോധന നടത്തി. ഇത് പൊട്ടിയത് പന്നിപ്പടക്കമാണോ എന്ന് പൊലീസ് പരിശോധിക്കുന്നുണ്ട്. അപകടത്തിൽ പൊലീസ് കേസെടുത്തു. കൂടാതെ പരിശോധനയിൽ നിരവധി ഇലക്ട്രോണിക് സാധനങ്ങൾ പ്രദേശത്ത് നിന്ന് ലഭിച്ചതായി പൊലീസ് അറിയിച്ചു. മാലിന്യത്തിനിടയിലുള്ള പന്നികളെ പിടികൂടാൻ പടക്കം വെച്ചതാണോയെന്നും പൊലീസ് പരിശോധിക്കുന്നുണ്ട്.