ശബരിമലയിലെ ഭക്തജനത്തിരക്കില്‍ ഹൈക്കോടതി ഇടപെടല്‍. തിരക്കനുസരിച്ച് ഒരു മണിക്കൂറില്‍ 4,800 ഭക്തരെ 18-ാം പടിയിലൂടെ കടത്തിവിടാന്‍ ഹൈക്കോടതി നിര്‍ദ്ദേശം. ചീഫ് പോലീസ് കോര്‍ഡിനേറ്റര്‍ക്കാണ് ഇക്കാര്യം ഉറപ്പുവരുത്തേണ്ട ചുമതല്. തിരക്ക് സംബന്ധിച്ച് ജില്ലാ പോലീസ് മേധാവിയുടേയും കലക്ടറുടേയും നിര്‍ദ്ദേശം ദേവസ്വം ബോര്‍ഡ് ഉദ്യോഗസ്ഥര്‍ പാലിക്കണണെന്നും നിര്‍ദ്ദേശിച്ച് ഹൈക്കോടതി .

ശബരിമലയിലെ തിരക്ക് സംബന്ധിച്ച ഹര്‍ജികള്‍ പരിഗണിക്കവെ കോടതി സ്വമേധയ ഇടപെടുകയായിരുന്നു. തീര്‍ഥാടകത്തിരക്ക് ക്രമപ്പെടുത്തുന്നതിനായി നേരത്തേയും ഹൈക്കോടതി ഇടപെട്ടിരുന്നു.വ്യാഴാഴ്ച പമ്പയില്‍ ചേര്‍ന്ന അവലോകനയോഗത്തില്‍ പോലീസും ദേവസ്വം ബോര്‍ഡും തമ്മില്‍ തര്‍ക്കമുണ്ടായിരുന്നു. സന്നിധാനത്തുനിന്ന് ശബരീപീഠംവരെ ക്യൂ നീളുകയും ഇലവുങ്കല്‍ മുതല്‍ ളാഹ വരെ വാഹനം തടഞ്ഞിടുകയും ചെയ്തിട്ടും സന്നിധാനത്ത് തിരക്ക് അനുഭവപ്പെട്ടത് പടികയറ്റത്തിന്റെ വേഗം കുറഞ്ഞതിനാലാണെന്ന് ദേവസ്വം ബോര്‍ഡ് വിമര്‍ശനം ഉന്നയിച്ചിരുന്നു.

എന്നാല്‍ പടികയറ്റുന്നതിന്റെ ചുമതല തിരുവിതാംകൂര്‍ ദേവസ്വം ബോര്‍ഡ് ഏറ്റെടുത്തോളൂ എന്ന് എ.ഡി.ജി.പി. എം.ആര്‍. അജിത്ത് കുമാര്‍ ഉടന്‍തന്നെ തിരിച്ചടിച്ചടിച്ചിരുന്നു. പിന്നീട് തമാശയായി പറഞ്ഞതാണെന്നും അദ്ദേഹം തിരുത്തുകയുണ്ടായി.