വാഹനപരിശോധനയ്ക്കിടെ പോലീസിനെ കബളിപ്പിച്ച് കാറില്‍ കടന്നുകളഞ്ഞ നിരവധി കേസുകളിലെ പ്രതി പോലീസ് പിന്തുടരുന്നതിനിടെ ഓവു ചാലിലേക്ക്.... ഇറങ്ങിയോടി പ്രതി

കാസര്‍കോട് ജില്ലയിലും കര്‍ണാടകയിലും നിരവധി കേസുകളില്‍ പ്രതിയായ പനയാല്‍ പെരിയാട്ടടുക്കയിലെ എ.എച്ച്.ഹാഷിം (41) ആണ് പോലീസിന്റെ നിരീക്ഷണത്തില്‍നിന്ന് രക്ഷപ്പെട്ട് കടന്നു കളഞ്ഞത്.


കര്‍ണാടകയില്‍ രണ്ട് കവര്‍ച്ച കേസുകളില്‍ പ്രതിയായ ഹാഷിം കാസര്‍കോട്ടെത്തിയതായി കര്‍ണാടക പോലീസ് കാസര്‍കോട് പോലീസിനെ വിവരം അറിയിച്ചിരുന്നു. ഇതിന്റെ അടിസ്ഥാനത്തില്‍ വ്യാഴാഴ്ച അര്‍ധരാത്രിയോടെ കാസര്‍കോട് ഇന്‍സ്പെക്ടര്‍ പി.അജിത് കുമാറിന്റെ നേതൃത്വത്തിലുള്ള സംഘം കാസര്‍കോട് ചന്ദ്രഗിരി കവലയില്‍ പരിശോധന ഏര്‍പ്പെടുത്തി. ഇവിടേക്ക് എത്തിയ കാര്‍ പോലീസ് കൈകാണിച്ചിട്ടും നിര്‍ത്താതെ പോയതിനെ തുടര്‍ന്നാണ് സംശയമുണ്ടായതും പോലീസ് ഇയാളെ പിന്തുടര്‍ന്നതും.


കെ.എസ്.ടി.പി. റോഡിലൂടെ അമിത വേഗത്തില്‍ ഓടിച്ചു പോയ കാര്‍ പുലിക്കുന്ന് റോഡിലൂടെ മുന്നോട്ട് പോയി തളങ്കര സിറാമിക്സ് റോഡിലേക്ക് കടക്കുന്നതിനിടെയാണ് നിയന്ത്രണം വിട്ട് റോഡരികിലെ ഓവുചാലിലേക്ക് പതിച്ചത്. കാറിനു പിന്നാലെയുണ്ടായിരുന്ന പോലീസ് വണ്ടിയില്‍ നിന്നിറങ്ങി അപകടത്തില്‍ പെട്ട കാറിനടുത്തേക്ക് എത്തിയപ്പോഴേക്കും പ്രതി കാറില്‍ നിന്നിറങ്ങി ഓടിരക്ഷപ്പെടുകയായിരുന്നു. അപകടവിവരമറിഞ്ഞ് നാട്ടുകാരും സ്ഥലത്തെത്തി.

പോലീസ് സമീപത്തെ കാസര്‍കോട് റെയില്‍വേ സ്റ്റേഷനിലടക്കം പരിശോധന നടത്തിയെങ്കിലും ഹാഷിമിനെ കണ്ടെത്താനായില്ല. ഹാഷിമിനെ കണ്ടെത്താനായി കര്‍ണാടക പോലീസും കാസര്‍കോട് ടൗണ്‍ പോലീസിന്റെ സഹായം തേടിയിട്ടുണ്ട്. ഇയാളെ കണ്ടെത്താനുള്ള അന്വേഷണം ഊര്‍ജിതമാക്കിയതായി പോലീസ് വ്യക്തമാക്കി.