സിപി എം ന്റെ എല്ലാ പരിപാടികള്ക്കും പാര്ട്ടിയുടെ ദൈനംദിന കാര്യങ്ങള് ഓടി്ച്ചു കൊണ്ടു പോകുന്നതിനും ആവശ്യമായ ഫണ്ടുകള് ശേഖരിച്ചു നല്കുന്ന പാര്ട്ടിയിലെ അതികായനായിരുന്നു ഇ.പി.ജയരാജന്.
സിപി എം ന്റെ എല്ലാ പരിപാടികള്ക്കും പാര്ട്ടിയുടെ ദൈനംദിന കാര്യങ്ങള് ഓടി്ച്ചു കൊണ്ടു പോകുന്നതിനും ആവശ്യമായ ഫണ്ടുകള് ശേഖരിച്ചു നല്കുന്ന പാര്ട്ടിയിലെ അതികായനായിരുന്നു ഇ.പി.ജയരാജന്. ഫണ്ട് ശേഖരിച്ച് പോളിറ്റ്ബ്യൂറോയ്ക്ക് വരെ എത്തിക്കുന്നത് ഇപിയുടെ കഴിവു കൊണ്ട് മാത്രമാണ്. തലമുതിര്ന്ന സഖാക്കളുടെ വീട്ടിലെ കാര്യങ്ങള്ക്ക് പോലും പല ബിസിനസുകാരുടെ സഹായം എത്തിക്കുന്നതും ഇദ്ദേഹമായിരുന്നു. ചുരുക്കത്തില് സിപിഎം ന്റെ ശരിക്കും വ്യവസായം അറിയുന്ന നേതാവാണ്. ഇപിയ്ക്കെതിരെ റിസോര്ട്ടിലെ നിക്ഷേപത്തിന്റെ പേരില് വിവാദം കത്തി പടരുമ്പോള് മുഖ്യമന്ത്രി പിണറായി വിജയന്റെ മകള്ക്ക് ബ്ലാംഗ്ലൂരില് വലിയ കമ്പനി സ്ഥാപിക്കാനുള്ള പണം എവിടെ നിന്ന് കിട്ടിയെന്ന് പാര്ട്ടിയോട് വെളിപ്പെടുത്തേണ്ടി വരും. അതു പോലെ കണ്ണൂരിലെ പല നേതാക്കളുടെയും ബിസിനസ് സംരംഭങ്ങള് മറനീക്കി പുറത്തു വരുമെന്ന കാര്യത്തില് സംശയമില്ല.
വിവാദത്തെ കുറിച്ച് സംസ്ഥാന സെക്രട്ടറിയേറ്റ് യോഗത്തില് പങ്കെടുത്ത് ഇ.പി ജയരാജന് തനിക്കു പറയാനുള്ള കാര്യം വ്യക്തമാക്കുമെന്ന സൂചനയും സിപിഎമ്മില് നില നില്ക്കുന്നുണ്ട്. ഇതിനിടെ പറശിനിക്കടവ് വിസ്മയ പാര്ക്ക്, പാപ്പിനിശേരി ആയുര്വേദ ആശുപത്രി, വളപട്ടണം കണ്ടല്പാര്ക്ക് തുടങ്ങിയവ താന് മുന് കൈയടുത്തുകൊണ്ടുവന്നതാണെന്നും എല്ലാം ജനങ്ങള് മനസിലാക്കുമെന്നും അവര് പ്രതികരിക്കുമെന്നും ഇ.പി ജയരാജന് ഒരു സ്വകാര്യ സംഭാഷണത്തില് വ്യക്തമാക്കിയിട്ടുണ്ട്.
ഇ.പിക്കെതിരെ ആരോപണമുന്നയിച്ച പി.ജയരാജനെതിരെ ഇ.പിയെ അനുകൂലിക്കുന്ന വര് സ്വര്ണക്കടത്ത് - ഗുണ്ടാ - ക്വട്ടേഷന് സംഘങ്ങളുമായുള്ള ബന്ധം സംബന്ധിച്ച ആരോപണവും വടകര പാര്ലമെന്റ് തെരഞ്ഞെടുപ്പ് ഫണ്ട് വെട്ടിപ്പു നടത്തിയെന്ന ഗുരുതര പരാതിയും കേന്ദ്ര-സംസ്ഥാന നേതൃത്വങ്ങള്ക്ക് നല്കിയിരിക്കെ കണ്ണൂര് വിമാന താവളവുമായി ബന്ധപ്പെട്ട റിയല് എസ്റ്റേറ്റ് ബിസിനസുകളും. സി.ടി ആന്ഡ് ട്രാവല് ഏജന്സിയില് ഇ.പിയുടെ മകനുള്ള പങ്കാളിത്തവും പരാതിയായി ഉന്നയിക്കാന് സാധ്യതയുണ്ട്.
രണ്ടു ടേം വിമാനതാവള നഗരിയായ മട്ടന്നൂര് എം എല് എ യായിരുന്ന ഇപി ജയരാജനും മറ്റു മട്ടന്നുരിലെ പ്രാദേശിക നേതാക്കളും കൂട്ടു ചേര്ന്നു റിയല് എസ്റ്റേറ്റ് നിക്ഷേപം നടത്തിയതായും വിമാന താവളത്തിന് സമീപമുള്ള ഭൂമികള് വാങ്ങിക്കുട്ടിയതായും ആരോപണമുയര്ന്നിരുന്നു. ഈ സാഹചര്യത്തില് അത്യന്തം ഗുരുതരമായ ആരോപണങ്ങള് വീണ്ടും പാര്ട്ടിക്ക് മുന്പിലെത്തിക്കാനാണ് പി.ജെയെ അനുകൂലിക്കുന്നവര് ഒരുങ്ങുന്നത്.
എല്.ഡി.എഫ് കണ്വീനറും പാര്ട്ടി കേന്ദ്ര കമ്മിറ്റിയംഗവുമായ ഇ.പി ജയരാജനെതിരെ സംസ്ഥാന കമ്മിറ്റിയംഗമായ പി.ജയരാജന് സംസ്ഥാന കമ്മിറ്റിയില് ഉന്നയിച്ച പരാതി വിവാദമായതോടെ സിപിഎമ്മില് അനുരഞ്ജന നീക്കങ്ങള് തുടങ്ങിയിട്ടുണ്ട്. സംസ്ഥാന കമ്മിറ്റിയംഗമായ പി.ജയരാജന് വര്ഷങ്ങള്ക്കു മുന്പെ നിര്മ്മിച്ച വൈദികം ആയുര്വേദ ഹീലിങ് സെന്ററിനെ കുറിച്ചുയര്ത്തിയ ആരോപണങ്ങളില് ഇ പി ജയരാജന് നേരിട്ടു ബന്ധമില്ലെന്നാണ് കണ്ണൂരിലെ സിപിഎം നേതാക്കളില് ചിലര് പറയുന്നത്. തെറ്റുതിരുത്തല് മാര്ഗരേഖയുടെ മറവില് നടത്തിയ വിമര്ശനം വൈദികത്തിലെ ഡയറക്ടര്മാര് തമ്മിലുള്ള ചക്കാളത്തി പോരിന്റെ ഭാഗമായാണെന്നാണ് കണ്ണൂര് ജില്ലയിലെ ജയരാജനെ അനുകൂലിക്കുന്ന പാര്ട്ടി നേതാക്കള് പറയുന്നത്.
https://www.facebook.com/Malayalivartha
