മണ്ഡലകാല തീര്‍ത്ഥാടനത്തിന് പരിസമാപ്തിയായി.... മണ്ഡല മഹോത്സവം പൂര്‍ത്തിയാക്കി ശബരിമല നട അടച്ചു, ഇനി മകരവിളക്ക് ഉത്സവത്തിനായി ഡിസംബര്‍ 30ന് വൈകിട്ട് വീണ്ടും നട തുറക്കും, ജനുവരി 14നാണ് മകരവിളക്ക് .


മണ്ഡല മഹോത്സകാലത്തെ പ്രധാന ആരാധനയായ മണ്ഡല പൂജ ഇന്നലെ ഉച്ചയ്ക്ക് പന്ത്രണ്ടരയ്ക്കും ഒരു മണിക്കുമിടയില്‍ നടന്നു. 41 ദിവസം നീണ്ട മണ്ഡല തീര്‍ത്ഥാടനത്തിനാണ് ഇന്നലെ സമാപനമായി. ലക്ഷക്കണക്കിന് ആളുകളാണ് ഈ ദിവസങ്ങളില്‍ ശബരിമല ചവിട്ടി സന്നിധാനത്ത് എത്തിയത്.

ശനി, ഞായര്‍ ദിവസങ്ങളിലും മറ്റു പൊതുഅവധി ദിനങ്ങളിലും ലക്ഷത്തിലേറെ പേര്‍ ദര്‍ശനം നടത്തി. എന്നാല്‍ ഇതിനിടയില്‍ മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗം സന്നിധാനത്തേക്ക് പരമാവധി 90,000 പേരെ കടത്തി വിട്ടാല്‍ മതിയെന്ന് തീരുമാനിച്ചിരുന്നു.

തന്ത്രി കണ്ഠരര് രാജീവരുടെ നേതൃത്വത്തിലായിരുന്നു ഇന്നലത്തെ തങ്കയങ്കിചാര്‍ത്തിയുള്ള പൂജ. മുന്‍ ദിവസങ്ങളെ അപേക്ഷിച്ച് തിരക്ക് വളരെ കുറവായിരുന്നെങ്കിലും ഇന്നലെയും ആയിരങ്ങളാണ് മണ്ഡല പൂജയ്ക്കായി എത്തിയത്. ദേവസ്വം ബോര്‍ഡ് പ്രസിഡന്റ് കെ അനന്തഗോപന്‍, എഡിജിപി എം.ആര്‍.അജിത് കുമാര്‍, ആലപ്പുഴ കലക്ടര്‍ കൃഷ്ണതേജ ഐഎഎസ് തുടങ്ങിയവര്‍ ഇന്നലെ ശ്രീകോവിലിന് മുന്നില്‍ സന്നിഹിതരായി. വൈകുന്നേരം ആറരയ്ക്കാണ് തങ്കയങ്കി ചാര്‍ത്തിയുള്ള ദീപാരാധന നടന്നത്.

രാത്രി പത്തിന് ഹരിവരാസനം പാടി നട അടച്ചു. മൂന്ന് ദിവസം കഴിഞ്ഞ് മകരവിളക്ക് ഉത്സവത്തിനായി ഡിസംബര്‍ 30ന് വൈകുന്നേരം അഞ്ചിന് നട തുറക്കും. എന്നാല്‍ ഡിസംബര്‍ 31 മുതല്‍ മാത്രമേ തീര്‍ത്ഥാടകരെ പ്രവേശിപ്പിക്കുകയുള്ളൂ. ജനുവരി 14 ന് ആണ് മകരവിളക്ക്.


അതേസമയം മണ്ഡല -മകരവിളക്ക് തീര്‍ഥാടനത്തിന്റെ ഭാഗമായി ഇതുവരെ 222 കോടി 98 ലക്ഷം രൂപ നടവരുമാനം ലഭിച്ചെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ.അനന്തഗോപന്‍. 222,98,70,250 രൂപ വരുമാനത്തില്‍ 70.10 കോടി രൂപയാണ് കാണിക്കയായി ലഭിച്ചത്.

മണ്ഡലകാലം തുടങ്ങി 39 ദിവസം വരെയുള്ള കണക്കാണിത്. 29 ലക്ഷത്തിലേറെ തീര്‍ഥാടകര്‍ ഇതുവരെ ദര്‍ശനത്തിനെത്തി. ഇതിനുമുമ്പത്തെ ഏറ്റവും വലിയ വരുമാനം ലഭിച്ചത് 2017-ലായിരുന്നു. അന്ന് 164 കോടിയായിരുന്നു വരുമാനം.

29,08,500 തീര്‍ഥാടകരെത്തിയതില്‍ 20 ശതമാനത്തോളം കുട്ടികളാണ്. രണ്ടുവര്‍ഷത്തോളം നിയന്ത്രണങ്ങളുണ്ടായിരുന്നതാണ് കുട്ടികളുടെ എണ്ണം ഇക്കുറി വര്‍ധിക്കാനായി കാരണം.

കുട്ടികള്‍ക്കും അംഗപരിമിതര്‍ക്കും പ്രായമായവര്‍ക്കും ഏര്‍പ്പെടുത്തിയ പ്രത്യേക വരി ഫലപ്രദമാണ്. പരമാവധി പരാതികുറച്ച് തീര്‍ഥാടനം പൂര്‍ത്തിയാക്കാനായി.