ഓരോ ആഘോഷവും കഴിയുമ്പോൾ മദ്യക്കണക്ക് പുറത്തുവിടുന്നതിനെ വിമർശിച്ച് രംഗത്ത് എത്തിയിരിക്കുകയാ മുരളി തുമ്മാരുകുടി. ഓരോ പുതുവർഷത്തിലും എത്ര ടോയിലറ്റ് പേപ്പർ വാങ്ങിയെന്നൊന്നും ആരും കണക്കെടുക്കുന്നില്ലല്ലോ. പിന്നെന്തിനാണ് മാധ്യമങ്ങൾ മദ്യക്കണക്ക് എടുക്കുന്നത്? എന്നും അദ്ദേഹം ചോദിക്കുകയാണ്.

ഫേസ്ബുക്ക് കുറിപ്പ് ഇങ്ങനെ;

പുതുവർഷം വരികയാണ്

നാട്ടിൽ പുതുവർഷം ആഘോഷിക്കണം എന്നാണ് ആഗ്രഹം
പക്ഷെ ശരിക്കൊന്ന് "ആഘോഷിക്കണം" എങ്കിൽ വെയിലത്തും മഴയത്തും ബെവറേജിന് മുൻപിൽ ക്യൂ നിൽക്കണം. ഒന്നാം തിയതി ഡ്രൈ ആണെന്നും തോന്നുന്നു. ഇതൊക്കെ കഴിഞ്ഞിട്ട് "പുതുവർഷത്തിന് കുടിയന്മാർ കുടിച്ചു തീർത്തത് മുന്നൂറു കോടിയുടെ മദ്യം" എന്ന് പത്രം/ചാനൽ വാർത്ത. ചിലപ്പോൾ എന്റെ ചിത്രവും വന്നേക്കും. വേണ്ട. ഇവിടെ തന്നെ ആഘോഷിക്കാം.

ഇഷ്ടമുള്ള സാധനം കടയിൽ പോയി വാങ്ങാം. മുപ്പത്തൊന്നാം തിയതി മറന്നു പോയാലോ, സാധനം തീർന്നു പോയാലോ ഒന്നാം തിയതി വീണ്ടും വാങ്ങാം.
അടിക്കാം
ആഘോഷിക്കാം
ആരും വർത്തയാക്കില്ല.

സമൂഹത്തിന് ഒരു ഉപയോഗവും ഇല്ലാത്ത, കള്ളക്കടത്ത് എന്ന സാമൂഹ്യ ദ്രോഹത്തെ പ്രോത്സാഹിപ്പിക്കുന്ന, അനവധി കൊട്ടേഷൻ സംഘത്തെ നില നിർത്തുന്ന, വേണ്ടത്ര മസ്തിഷ്ക വളർച്ച എത്താത്തവരെ പോലും കരിയർമാർ ആക്കുന്ന, നാട്ടിൽ അക്രമവും ചിലപ്പോൾ കൊലയും ഉണ്ടാക്കുന്ന സ്വർണ്ണം വാങ്ങുന്നവർക്ക് എ സി റൂം ഇട്ട് കൊടുക്കുമ്പോൾ എന്തിനാണ് അല്പം ആഘോഷിക്കാനായി മദ്യം വാങ്ങുന്നവരെ നാം ഇനിയും മഴയത്ത് നിർത്തിയിരിക്കുന്നത്. ഓരോ പുതുവർഷത്തിലും എത്ര ടോയിലറ്റ് പേപ്പർ വാങ്ങിയെന്നൊന്നും ആരും കണക്കെടുക്കുന്നില്ലല്ലോ. പിന്നെന്തിനാണ് മാധ്യമങ്ങൾ മദ്യക്കണക്ക് എടുക്കുന്നത്?

നമ്മുടെ ഹിപ്പോക്രസിയുടെ, കപട സദാചാരത്തിന്റെ പ്രതിഫലനമാണ് നമ്മുടെ വികലമായ മദ്യനയം. മദ്യം കഴിക്കണം നിന്നുള്ളവർ അതിൻ്റെ ഇരകളും. ഒരു ദിവസം ഭരണം കിട്ടിയാൽ എന്ത് ചെയ്യും എന്നൊക്കെ പലരും പറയാറുണ്ടല്ലോ. എനിക്കൊരു ദിവസം ഭരണം കിട്ടിയാൽ മദ്യം സൂപ്പർമാർക്കറ്റിൽ എത്തും, ഡ്രൈ ഡേ ഒക്കെ എടുത്തു കളയും. ഇത് സത്യം സത്യം സത്യം. പക്ഷെ തൽക്കാലം ഭരണം കിട്ടിയിട്ടില്ല. അതുവരെ പുതുവർഷത്തിൽ നാട്ടിലേക്ക് ഇല്ല.

#സ്വപ്നംകാണുന്നകിനാശ്ശേരി
മുരളി തുമ്മാരുകുടി