സംസ്ഥാന സ്‌കൂള്‍ കലോത്സവത്തെ ആര്‍ഭാടത്തിന്റെയും അനാരോഗ്യകരമായ മത്സരങ്ങളുടെയും വേദിയാക്കരുതെന്ന് ഹൈക്കോടതി. ദരിദ്ര ചുറ്റുപാടുകളില്‍ നിന്ന് വരുന്ന കഴിവുള്ള കുട്ടികള്‍ക്ക് ഇതിനുളള ചെലവ് താങ്ങാനാകില്ല. വിജയിക്കുക എന്നതിനേക്കാള്‍ പങ്കെടുക്കുക എന്നതാണ് പ്രധാനമെന്ന് തിരിച്ചറിയണം.

പരാജയം ഉള്‍ക്കൊള്ളാനായി കുട്ടികളെ രക്ഷിതാക്കള്‍ സജ്ജരാക്കിയില്ലെങ്കില്‍ ഇത്തരം കലോത്സവങ്ങള്‍ അവരെ വിഷാദ രോഗത്തിലേക്ക് തളളിവിട്ടേക്കും. റവന്യൂ ജില്ലാ കലോത്സവ വിധി നിര്‍ണയത്തിനെതിരായ ഒരു കൂട്ടം ഹര്‍ജികള്‍ തളളിക്കൊണ്ടാണ് ഹൈക്കോടതിയുടെ നിരീക്ഷണം.

അതേസമയം കലാകൗമാരം കോഴിക്കോട്ടേക്ക് അരങ്ങുതകര്‍ക്കാനൊരുങ്ങുമ്പോള്‍ രക്ഷിതാക്കള്‍ക്ക് ചെലവാകുന്നത്് വന്‍തുകയാണ്. ഒരു നൃത്തസംഘത്തെ വേദിയിലെത്തിക്കാനായി ചുരുങ്ങിയത് അഞ്ച് ലക്ഷം രൂപയെങ്കിലും വേണം. അരങ്ങിലെത്തുന്ന ചിലവേറിയ ഇനങ്ങളിലൊന്നാണ് സംഘനൃത്തം.

ഏറ്റവും ചുരുങ്ങിയ നിലക്ക് ഒരു ടീമിനെ അരങ്ങിലെത്തിക്കാനായി അഞ്ച് ലക്ഷം രൂപയെങ്കിലും വേണം. മുന്‍ വര്‍ഷങ്ങളെ അപേക്ഷിച്ച് നോക്കിയാല്‍ നാലിലൊന്ന് ചെലവ് ഇത്തവണ കൂടിയിട്ടുണ്ടെന്നാണ് കണക്ക്.

വര്‍ഷം പോകും തോറും കലോത്സവവേദിയില്‍ വീറും വാശിയും ആവേശവും വര്‍ദ്ധിക്കുകയാണ്. എന്തിനും തയ്യാറായി സ്‌കൂളധികൃതരും പണമിറക്കാനായി പിടിഎയും ഉണ്ടെങ്കില്‍ ചെലവൊരു പ്രശ്‌നമല്ല, എന്നാല്‍ അങ്ങനെയല്ലാത്തവര്‍ നിരവധിയാണ്.മിക്ക കുട്ടികള്‍ക്കും അവര്‍ കഠിനമായി പരിശ്രമിച്ച് ലക്ഷ്യത്തിലെത്താനായി ശ്രമിച്ചിട്ടും പങ്കെടുക്കാന്‍ പറ്റാത്തതില്‍ വളരെയേറെ നിരാശരാകുന്നു.