ദേശീയ യുവജനോത്സവത്തിലെ മത്സരയിനങ്ങൾ പതിനെട്ടിൽ നിന്ന് രണ്ടെണ്ണം മാത്രം ആക്കി വെട്ടിച്ചുരുക്കിയ കേന്ദ്രസർക്കാർ നടപടി യുവജനവിരുദ്ധവും കലാകാരൻമാരോടുള്ള വെല്ലുവിളിയും ആണെന്ന് ഡിവൈഎഫ്ഐ. വിവിധ സംസ്ഥാനങ്ങളിൽ നിന്ന് മത്സരങ്ങൾ വഴി കഴിവ് തെളിയിച്ച പ്രതിഭകൾ മാറ്റുരയ്ക്കുന്ന ദേശീയ യുവ ഉത്സവം രാജ്യത്തിന്റെ സാംസ്കാരിക വൈവിധ്യത്തെ അടയാളപ്പെടുത്തുന്ന ഒന്നാണ്.

അത്തരം യുവജനോത്സവങ്ങളെ കേവലം വഴിപാടായി മാറ്റുന്ന സമീപനമാണ് കേന്ദ്രസർക്കാർ സ്വീകരിച്ചിരിക്കുന്നത്. കലാകാരന്മാരുടെ വേദികൾ ഇല്ലാതാക്കി വിവിധ കലാ മത്സരങ്ങളെ അന്യവൽക്കരിക്കുവാനുള്ള ശ്രമങ്ങൾ തിരിച്ചറിയണമെന്നും വെട്ടിച്ചുരുക്കിയ മത്സരയിനങ്ങൾ പുനസ്ഥാപിക്കണമെന്നും എല്ലാ മത്സരങ്ങളും മുൻകാലങ്ങളിലെ പോലെ നടത്തണമെന്നും ഡിവൈഎഫ്ഐ സംസ്ഥാന സെക്രട്ടറിയേറ്റ് പ്രസ്താവനയിലൂടെ ആവശ്യപ്പെട്ടു.