പ്രമുഖ ശാസ്ത്രജ്ഞനും സി എസ് ഐ ആര്‍ ഡയറക്ടറുമായിരുന്ന എ ഡി ദാമോദരന്റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു.

ആണവ ശാസ്ത്രമേഖലയിലെ പ്രഗത്ഭനായ ശാസ്ത്രജ്ഞനെയാണ് എ. ഡി. ദാമോദരന്റെ നിര്യാണത്തിലൂടെ രാജ്യത്തിനു നഷ്ടമായത്. ഇടതുപക്ഷ രാഷ്ട്രീയ സമീപനങ്ങളുടെ വെളിച്ചത്തിലുള്ള സാമൂഹ്യബോധത്തോടെ ശാസ്ത്രകാര്യങ്ങള്‍ ജനങ്ങളിലെത്തിക്കാനായി അദ്ദേഹം ശ്രമിച്ചു.

ഇന്ത്യയിലെ അതിപ്രഗത്ഭങ്ങളായ ആണവ ശാസ്ത്ര ഗവേഷണ സ്ഥാപനങ്ങളില്‍ പ്രവര്‍ത്തിച്ച അനുഭവമുള്ള അദ്ദേഹം കേരളത്തിലെ ഇടതുപക്ഷ ജനാധിപത്യ മുന്നണി സര്‍ക്കാരിനോടു സഹകരിച്ചുകൊണ്ട് പല നിലകളിലും ഉപദേശാഭിപ്രായങ്ങള്‍ നല്‍കാനായി കഴിഞ്ഞ ഘട്ടങ്ങളില്‍ ശ്രദ്ധിച്ചു.
ജനകീയ ശാസ്ത്ര പ്രസ്ഥാനത്തിനും പൊതുസമൂഹത്തിനും കനത്ത നഷ്ടമാണ് അദ്ദേഹത്തിന്റെ വിയോഗത്തിലൂടെ ഉണ്ടായിട്ടുള്ളത്.

ഇഎംഎസിന്റെ കുടുംബാംഗമായതു മുതല്‍ എന്നും ഇഎംഎസിന്റെ രാഷ്ട്രീയ സമീപനങ്ങള്‍ കൂടിയ തോതില്‍ ഉള്‍ക്കൊള്ളാനും ലേഖനങ്ങളിലും മറ്റും അതു പ്രതിഫലിക്കുന്നുവെന്ന് ഉറപ്പുവരുത്താനും ശ്രദ്ധിച്ച എ ഡി ദാമോദരന്‍ ഇടതുപക്ഷ മതേതരത്വ രാഷ്ട്രീയത്തിന്റെ ഉയര്‍ച്ചയില്‍ എന്നും വലിയ താല്‍പര്യം പ്രകടിപ്പിച്ചിരുന്നുവെന്നും അനുശോചന സന്ദേശത്തില്‍ പറഞ്ഞ് മുഖ്യമന്ത്രി .