ആളുകളെ പറ്റിച്ച് കോടികള് സ്വന്തമാക്കിയ പ്രവീണ് റാണ റിമാന്ഡില്... യഥാര്ഥ കള്ളന്മാര് പുറത്തുവരുമെന്നാണ് ജയിലിലേക്ക് കയറുന്നതിനിടെ റാണ പറഞ്ഞത്
വാചക കസര്ത്തുനടത്തി ആളുകളെ പറ്റിച്ച് കോടികള് സ്വന്തമാക്കിയ പ്രവീണ് റാണ റിമാന്ഡില്. തൃശൂര് അഡീഷനല് സെഷന്സ് കോടതിയാണ് റാണയെ രണ്ടാഴ്ചത്തേയ്ക്കു റിമാന്ഡ് ചെയ്തത്. എന്നാല് യഥാര്ഥ കള്ളന്മാര് പുറത്തുവരുമെന്നാണ് ജയിലിലേക്ക് കയറുന്നതിനിടെ റാണ പറഞ്ഞത്. നാട്ടുകാരുടെ പണം ആഡംബര ജീവിതത്തിനായി ധൂര്ത്തടിച്ച റാണയാണ് ഇപ്പോള് ജയിലിലായിരിക്കുന്നത്. നൂറു കോടി രൂപ തട്ടിയതായി തൃശൂര് അഡീഷനല് സെഷന്സ് കോടതിയില് നല്കിയ റിമാന്ഡ് റിപ്പോര്ട്ടില് പൊലീസ് പറയുന്നു. റാണയുടെ കൂട്ടാളികളിലേക്ക് അന്വേഷണം വ്യാപിപ്പിച്ചതായി സിറ്റി പൊലീസ് കമ്മിഷണര് അങ്കിത് അശോക് വ്യക്തമാക്കി.
ജീവിതത്തില് വിജയം നേടാനുള്ള സൂത്ര വിദ്യ പറഞ്ഞു തരുന്ന കോച്ച്. ജീവിതത്തില് ആരോഗ്യപരമായ സാമ്പത്തികാവസ്ഥ ഒരുക്കാന് സഹായിക്കുന്ന ഡോക്ടര്. റാണയുടെ സ്വയം വിശേഷണങ്ങളില് വീണ നിക്ഷേപകര് ഇനി കാത്തിരിക്കുകയാണ്. തട്ടിയെടുത്ത കോടികള് എവിടെയെന്ന ചോദ്യത്തിന് ഉത്തരം തേടി. റാണ ധൂര്ത്തടിച്ച പണം ഇനി ഒരിക്കലും തിരിച്ചുപിടിക്കാന് കഴിയില്ലെന്ന യാഥാര്ഥ്യം മുന്നിലുണ്ട് താനും. എല്ലാ തട്ടിപ്പുകാരും നിക്ഷേപങ്ങള് തട്ടിക്കുമ്പോള് ഓര്ത്തിരിക്കേണ്ട കാഴ്ചയാണിത്. പ്രവീണ് റാണ ജയിലിലേക്ക് കയറുന്ന ഈ ദൃശ്യം.
ഇന്ത്യയെ ലോകത്തിന്റെ നെറുകയിലേക്കു പിടിച്ചുയര്ത്താന് കഴിയുന്ന വന് ബിസിനസ് സാമ്രാജ്യം സൃഷ്ടിക്കാന് താന് ഒരുങ്ങുകയാണെന്ന റാണയുടെ വാക്കുകളില് നിക്ഷേപകര് വീണുപോയി. മദ്യം, ഹോട്ടല്, ടൂറിസം, റിയല് എസ്റ്റേറ്റ്, തുറമുഖം തുടങ്ങിയ മേഖലകളിലെ നിക്ഷേപങ്ങളിലൂടെ താന് 2025 ന് അകം ഇന്ത്യയിലെ ഏറ്റവും സമ്പന്നരായ 10 പേരുടെ പട്ടികയില് ഇടംപിടിക്കുമെന്ന് റാണ നിക്ഷേപകരെ വിശ്വസിപ്പിച്ചു.
https://www.facebook.com/Malayalivartha
