വയനാട് പുതുശ്ശേരി വെള്ളാരംകുന്നില്‍ കടുവയുടെ ആക്രമണത്തില്‍ കൊല്ലപ്പെട്ട കര്‍ഷകന്റെ ബന്ധുക്കള്‍ പ്രതിഷേധം അവസാനിപ്പിച്ചു. കൊല്ലപ്പെട്ട കര്‍ഷകന്റെ മൃതദേഹം ബന്ധുക്കള്‍ ഏറ്റുവാങ്ങി. കുടുംബത്തിന് 10 ലക്ഷം രൂപ സഹായം നല്‍കുമെന്ന് വയനാട് കലക്ടര്‍ ചര്‍ച്ചയില്‍ അറിയിച്ചു. 40 ലക്ഷം രൂപകൂടി നല്‍കാന്‍ സര്‍ക്കാരിന് ശുപാര്‍ശ നല്‍കും. കുടുംബാംഗത്തിന് വനംവകുപ്പില്‍ താല്‍ക്കാലിക ജോലി നല്‍കും. മരിച്ച തോമസ് എടുത്ത കാര്‍ഷികവായ്പ എഴുതിത്തള്ളുന്നതിന് നടപടി സ്വീകരിക്കുമെന്നും കലക്ടര്‍ ഉറപ്പുനല്‍കി.

കര്‍ഷകനെ ആക്രമിച്ചുകൊന്ന കടുവയെ ഇന്നും പിടികൂടാനായില്ല. സുപ്രീംകോടതിയുടെ സ്‌റ്റേയുള്ളതിനാല്‍ കടുവയെ വെടിവച്ച് കൊല്ലാനാകില്ലെന്ന് വനംമന്ത്രി എ.കെ ശശീന്ദ്രന്‍ പറഞ്ഞു. കടുവ കൂട്ടില്‍ കുടുങ്ങിയില്ലെങ്കില്‍ മയക്കു വെടിവച്ച് പിടികൂടും. കടുവ ആക്രമണത്തില്‍ പ്രതിഷേധിച്ച് യുഡിഎഫും ബിജെപിയും മാനന്തവാടി താലൂക്കില്‍ ഹര്‍ത്താല്‍ ആചരിച്ചു. കടുവ ഭീതി അവസാനിപ്പിക്കണമെന്ന് ആവശ്യപ്പെട്ട് ആക്ഷന്‍ കമ്മിറ്റി രൂപീകരിച്ചിരിക്കുകയാണ് നാട്ടുകാര്‍.
കടുവയുടെ ആക്രമണത്തില്‍ കര്‍ഷകന്‍ മരിച്ചതില്‍ പ്രതിഷേധവുമായി മാനന്തവാടി രൂപതയും രംഗത്തെത്തി. കടുവകള്‍ പെരുകിയത് വനംവകുപ്പ് മറച്ചുവയ്ക്കുന്നുവെന്നുവെന്നും കര്‍ഷകന്റെ മരണത്തിന്റെ ഉത്തരവാദിത്തം വനംവകുപ്പിനാണെന്നും രൂപത കുറ്റപ്പെടുത്തി.
വയനാട് പുതുശേരിയിലാണ് കടുവ ആക്രമിച്ച കര്‍ഷകന്‍ വെള്ളാരംകുന്ന് സ്വദേശി തോമസ് മരിച്ചത്. രാവിലെ കൃഷിയിടത്തില്‍ വച്ചാണ് തോമസിനെ കടുവ ആക്രമിച്ചത്. കൈയ്ക്കും കാലിനും ഗുരുതരപരുക്കേറ്റ തോമസിനെ വൈകിട്ട് വിദഗ്ധചികില്‍സയ്ക്ക് കോഴിക്കോട്ടേക്ക് മാറ്റുന്നതിനിടെയാണ് മരണം. കടുവയെ ഉടന്‍ പിടികൂടണമെന്ന് ആവശ്യപ്പെട്ട് നാട്ടുകാര്‍ വനപാലകരെ തടഞ്ഞ് പ്രതിഷേധിച്ചു. മയക്കുവെടിവച്ച് പിടിക്കാന്‍ നാട്ടുകാര്‍ ആവശ്യപ്പെട്ടെങ്കിലും കൂടുവച്ച് പിടികൂടാനാണ് ചീഫ് വൈല്‍ഡ് ലൈഫ് വാര്‍ഡന്‍ അനുമതി നല്‍കിയത്.