എല്ലാം വളരെപ്പെട്ടന്ന്... ഗവര്ണറെ അവഗണിച്ച് മലയാളം സര്വ്വകലാശാല വിസി നിയമന നടപടികളുമായി സര്ക്കാര് മുന്നോട്ട്; സര്വകലാശാല, കെഎസ്ആര്ടിസി വിഷയങ്ങള് ഹൈക്കോടതി ജഡ്ജി ദേവന് രാമചന്ദ്രനില് നിന്ന് മാറ്റി; തമിഴ്നാടിനും കേരളത്തിനും പിന്നാലെ തെലങ്കാനയിലും സര്ക്കാര് ഗവര്ണര് പോര്
തിങ്കളാഴ്ച നിയമസഭയില് നയപ്രസംഗം നടക്കാനിരിക്കെ വീണ്ടും ഗവര്ണറും സര്ക്കാരും നേര്ക്കുനേര്. ഗവര്ണറെ മറികടന്ന് മലയാളം സര്വ്വകലാശാല വിസി നിയമന നടപടികളുമായി സര്ക്കാര് മുന്നോട്ട്. ഗവര്ണര് ഇതുവരെ ഒപ്പിടാത്ത സര്വ്വകലാശാല നിയമഭേദഗതി അനുസരിച്ച് വിസി നിയമനത്തിന് സര്ച്ച് കമ്മിറ്റിയുണ്ടാക്കാനാണ് തീരുമാനം.
കമ്മിറ്റിയിലേക്ക് രാജ്ഭവന് പ്രതിനിധിയെ നല്കാന് ആവശ്യപ്പെട്ട് സര്ക്കാര് കത്ത് നല്കി. ഗവര്ണറുടെ പ്രതിനിധിക്ക് പുറമെ സര്ക്കാറിന്റെയും യുജിസിയുടേയും ഉന്നതവിദ്യാഭ്യാസ കൗണ്സിലിന്റെയിം സിന്റിക്കേറ്റിന്റെയും പ്രതിനിധികള് സര്ച്ച് കമ്മിറ്റിയിലുണ്ടാകുമെന്നാണ് സര്ക്കാര് അറിയിച്ചത്. ഗവര്ണറുടെ അധികാരം വെട്ടാന് നിയമസഭ പാസ്സാക്കിയ നിയമഭേദഗതി അനുസരിച്ചാണ് സെര്ച്ച് കമ്മിറ്റി ഉണ്ടാക്കുന്നത്. പക്ഷെ ഇതുവരെ ഈ ബില്ലില് ഗവര്ണര് അംഗീകാരം നല്കിയിട്ടില്ല. സര്ക്കാര് ആവശ്യം ഗവര്ണര് തള്ളിക്കളയുമെന്ന് ഉറപ്പാണ്.
അതേസമയം ഹൈക്കോടതി ജഡ്ജിമാരുടെ പരിഗണനാ വിഷയങ്ങളില് മാറ്റം വരുത്തി. ജസ്റ്റിസ് ദേവന് രാമചന്ദ്രന് ബഞ്ചില് നിന്നും കെഎസ്ആര്ടിസി, സര്വകലാശാല വിഷയങ്ങള് എടുത്തുമാറ്റി. ജസ്റ്റിസ് സതീഷ് നൈനാന് ആണ് ഈ വിഷയങ്ങള് ഇനി പരിഗണിക്കുക. ജസ്റ്റിസ് ദേവന് രാമചന്ദ്രന് അപ്പീല്, കമ്പനി കേസുകളുടെ ചുമതലയില നല്കി.
നേരത്തെ പൊലീസ് അതിക്രമം സംബന്ധിച്ച കേസുകള് പരിഗണിക്കുന്നതില് നിന്നും അദ്ദേഹത്തെ മാറ്റിയിരുന്നു. ജസ്റ്റിസ് എന് നഗരേഷ് പൊലീസ് അതിക്രമം, പൊലീസ് സംരക്ഷണം സംബന്ധിച്ച വിഷയങ്ങളും, ജസ്റ്റിസ് സിയാദ് റഹ്മാന്, ജസ്റ്റിസ് കെ ബാബു തുടങ്ങിയവര് ജാമ്യ ഹര്ജികളും പരിഗണിക്കും. ഓരോ ആറ് മാസത്തിനിടയിലും ഹൈക്കോടതിയില് ജഡ്ജിമാരുടെ പരിഗണനാ വിഷയങ്ങളില് മാറ്റം വരുത്താറുണ്ട്. ഹൈക്കോടതിയിലെ രണ്ട് ജീവനക്കാര്ക്ക് വിരമിക്കലിന് ശേഷം സര്വീസില് തുടരാന് അനുമതി നല്കുകയും ഉത്തരവ് തിരുത്തുകയും ചെയ്ത ജസ്റ്റ് ദേവന് രാമേന്ദ്രന്റെ നടപടിയും വിവാദത്തില് ആയിരുന്നു.
തമിഴ്നാടിനും കേരളത്തിനും പിന്നാലെ തെലങ്കാനയിലും ഗവര്ണറും സംസ്ഥാന സര്ക്കാരും നേര്ക്കുനേര് വന്നിരിക്കുകയാണ്. റിപ്പബ്ലിക് ദിനപരിപാടിയിലെ തന്റെ പ്രസംഗത്തിന്റെ പകര്പ്പ് നേരത്തേ അയച്ചുതരണമെന്നാവശ്യപ്പെട്ട് ഗവര്ണര് തമിഴിസൈ സൗന്ദര്രാജന് മുഖ്യമന്ത്രി കെ ചന്ദ്രശേഖര് റാവുവിന് കത്തയച്ചു.
കഴിഞ്ഞ വര്ഷം തെലങ്കാനയില് മുഖ്യമന്ത്രിയും ഗവര്ണറും രണ്ടായാണ് റിപ്പബ്ലിക് ദിന പരിപാടി നടത്തിയത്. ബുധനാഴ്ച ഖമ്മത്ത് കെസിആറിന്റെ ബിആര്എസ് നടത്തിയ മെഗാറാലിയില് പങ്കെടുത്ത മുഖ്യമന്ത്രിമാരായ പിണറായി വിജയനും അരവിന്ദ് കെജ്രിവാളും ഗവര്ണര്മാര്ക്കെതിരെ രൂക്ഷവിമര്ശനമാണ് ഉയര്ത്തിയത്. ഇതിന് പിന്നാലെയാണ് തെലങ്കാനയില് ഗവര്ണറും സര്ക്കാരും തമ്മില് പോര് കടുക്കുന്നത്.
റിപ്പബ്ലിക് ദിനപരിപാടി നടത്തുന്നുണ്ടെങ്കില് അറിയിക്കണമെന്നും, പ്രസംഗത്തിന്റെ ഉള്ളടക്കം എന്തെന്ന് വ്യക്തമാക്കി പകര്പ്പ് നേരത്തേ അയച്ചു തരണമെന്നുമാണ് ഗവര്ണര് തമിഴിസൈ സൗന്ദര്രാജന് മുഖ്യമന്ത്രിക്ക് നല്കിയ കത്തില് ആവശ്യപ്പെടുന്നത്. എന്നാലിതിന് സംസ്ഥാനസര്ക്കാര് ഇതുവരെ ഇതിന് മറുപടി നല്കിയിട്ടില്ല. കഴിഞ്ഞ വര്ഷം കൊവിഡ് വ്യാപനം ചൂണ്ടിക്കാട്ടി റിപ്പബ്ലിക് ദിനത്തില് വലിയ പരിപാടി നടത്താന് സംസ്ഥാനസര്ക്കാര് വിസമ്മതിച്ചിരുന്നു.
മുഖ്യമന്ത്രിയുടെ വസതിയായ പ്രഗതി ഭവനിലായിരുന്നു കഴിഞ്ഞ വര്ഷം പതാക ഉയര്ത്തല്. ഇതില് പങ്കെടുക്കാതെ ഗവര്ണര് തമിഴിസൈ സൗന്ദര്രാജന് രാജ്ഭവനില് പതാക ഉയര്ത്തി. തെലങ്കാനയില് റിപ്പബ്ലിക് ദിനപരേഡ് സാധാരണ ഹൈദരാബാദിലെ പരേഡ് ഗ്രൗണ്ട്സിലാണ് നടക്കാറ്. മുഖ്യമന്ത്രി മുഖ്യാതിഥിയാകുന്ന ചടങ്ങില് ഗവര്ണര് പതാക ഉയര്ത്തും. ഇത്തവണ പരേഡ് ഗ്രൗണ്ട്സില് പരിപാടി സംഘടിപ്പിക്കുന്നുണ്ടോ എന്നത് സംബന്ധിച്ച് പോലും വിവരം ലഭിക്കാതിരുന്നതിനാലാണ് ഇത്തരമൊരു കത്തെഴുതിയതെന്നാണ് രാജ്ഭവന് വ്യക്തമാക്കുന്നത്.
"
https://www.facebook.com/Malayalivartha
