ഒടുവില്‍ മകന്‍ ചിതയ്ക്ക് തീ കൊളുത്തി.... ആ കാഴ്ച ഏവരേയും കണ്ണീരിലാഴ്ത്തി.... യുവതിയുടെ ഭര്‍ത്താവിനെ കസ്റ്റഡിയിലെടുത്താണ് സംസ്‌കാര ചടങ്ങില്‍ മക്കളെ പങ്കെടുപ്പിച്ചത്

വിഷക്കായ കഴിച്ച് അത്യാസന്നനിലയില്‍ ചികിത്സയിലിരിക്കെ മരിച്ച യുവതിയുടെ സംസ്‌കാരച്ചടങ്ങിന് മക്കള്‍ക്ക് വിലക്കേര്‍പ്പെടുത്തി ഭര്‍ത്തൃവീട്ടുകാര്‍. തുടര്‍ന്ന് മക്കളെ പങ്കെടുപ്പിക്കാനായി പിതാവിനെ കസ്റ്റഡിയിലെടുത്ത് പൊലീസ് പ്രശ്‌നം പരിഹരിക്കുകയുണ്ടായി.

നാട്ടിക എസ്.എന്‍ കോളേജിന് കിഴക്ക് പനങ്ങാട്ടില്‍ കൃഷ്ണന്‍കുട്ടിയുടെ മകന്‍ സന്തോഷിന്റെ ഭാര്യ ആശയുടെ (35) മരണവും സംസ്‌കാരവുമാണ് വിവാദങ്ങള്‍ക്കും നാടകീയതകള്‍ക്കും വഴിവച്ചത്. 12ന് ആത്മഹത്യാശ്രമം നടത്തിയ ആശ ചികിത്സയിലിരിക്കെ 17ന് മരിച്ചു. ഇന്നലെ രാവിലെ പത്തിനായിരുന്നു പാവറട്ടിയില്‍ ആശയുടെ വീട്ടില്‍ സംസ്‌കാരം നിശ്ചയിച്ചത്.


മൂന്നു ദിവസം മുമ്പ് നാട്ടിലെത്തിയ പ്രവാസിയായ ഭര്‍ത്താവ് സന്തോഷും ആശയുടെ കുടുംബവും മരണസമയത്ത് ആശുപത്രിയിലുണ്ടായിരുന്നു. എന്നാല്‍, മരണം സ്ഥിരീകരിച്ചതിന് പിന്നാലെ മൃതദേഹം കാണാന്‍ പോലും നില്‍ക്കാതെ ഇവര്‍ ആശുപത്രിയില്‍ നിന്ന് മടങ്ങിയെന്നും അവസാനമായി മൃതദേഹം കാണിക്കാനായി മക്കളെ അനുവദിച്ചില്ലെന്നുമാണ് യുവതിയുടെ വീട്ടുകാര്‍ ആരോപിച്ചത്.

പ്രശ്‌നത്തില്‍ ഇടപെട്ട എം.എല്‍.എ മുരളി പെരുനെല്ലി, കളക്ടര്‍ ഹരിത വി. കുമാര്‍ എന്നിവര്‍ പൊലീസുമായും ചൈല്‍ഡ് ലൈനുമായും സംസാരിച്ചതിനെ തുടര്‍ന്ന് ആശയുടെ ഭര്‍ത്താവിനെ പൊലീസ് കസ്റ്റഡിയിലെടുത്തു. കൊടുങ്ങല്ലൂര്‍ ഡിവൈ.എസ്.പിയും, വലപ്പാട് സി.ഐയും ഭര്‍ത്തൃവീട്ടുകാരുമായി ചര്‍ച്ച നടത്തി.

പിന്നാലെ മക്കളായ ശ്രീറാം (4), സഞ്ജയ് (7) എന്നിവരെ പാവറട്ടിയിലെ വീട്ടിലെത്തിക്കുകയും ഇരുവരും ചേര്‍ന്ന് ചിതയ്ക്ക് തീ കൊളുത്തുകയും ചെയ്തു.


പാവറട്ടി നട്ടാണിപ്പറമ്പില്‍ താമസിക്കുന്ന കവര വീട്ടില്‍ വേലുക്കുട്ടിയുടെയും വത്സലയുടെയും മകളായ ആശയും സന്തോഷും 12 വര്‍ഷം മുമ്പാണ് വിവാഹിതരായത്. മരണത്തിന് കാരണക്കാര്‍ സന്തോഷിന്റെ കുടുംബമാണെന്നും ആശ വന്ന ശേഷം വീട്ടില്‍ ഐശ്വര്യമില്ലെന്ന് പറഞ്ഞ് പീഡിപ്പിച്ചിരുന്നതായും ആശയുടെ ബന്ധുക്കള്‍ ആരോപിച്ചു. യുവതിയുടെ വീട്ടുകാര്‍ നല്‍കിയ പരാതിയില്‍ വലപ്പാട് പൊലീസ് അന്വേഷണം ഊര്‍ജ്ജിതമാക്കി.