ഒരറ്റത്ത് പാലക്കാട് പിടി സെവനും മററ്റത്ത് മൂന്നാറില്‍ പടയപ്പയും വിലസുകയാണ്. ഇതിനിടെ പടയപ്പയുടെ ഫാന്‍സുകാരും ശല്യം തുടരുകയാണ്. അതേസമയം ധോണിയിലെ ജനവാസ മേഖലയില്‍ ഭീതി പരത്തുന്ന ഒറ്റയാന്‍ പി.ടി. സെവനെ (പാലക്കാട് ടസ്‌കര്‍ 7) പിടികൂടാനുള്ള ദൗത്യം തുടങ്ങി. പുലര്‍ച്ചെ 4ന് ഫോറസ്റ്റ് ചീഫ് വെറ്ററിനറി സര്‍ജന്‍ അരുണ്‍ സക്കറിയുടെ നേതൃത്വത്തിലുള്ള ആര്‍ആര്‍ടി സംഘം ആനയെ തിരഞ്ഞ് വനത്തിലേക്ക് പുറപ്പെട്ടു.

ആനയുടെ സാന്നിധ്യം തിരിച്ചറിഞ്ഞു. സുരേന്ദ്രന്‍, ഭരത്, വിക്രം എന്നീ കുങ്കിയാനകളും സംഘത്തിനൊപ്പമുണ്ട്. 75 അംഗ വനപാലകരാണ് ധോണിയിലെ ദൗത്യത്തിനായുള്ളത്. സുരക്ഷിത സ്ഥലത്ത് ഒറ്റയ്ക്ക് പി.ടി.ഏഴാമനെ കണ്ടെത്തിയാല്‍ മയക്കു വെടിയുതിര്‍ത്ത് പിടികൂടും. കൂടിന്റെ ബലപരിശോധന ഇന്നലെ പൂര്‍ത്തിയാക്കിയിരുന്നു.

ഏഴാമനെ പിടികൂടാനുള്ള അന്തിമ ഒരുക്കങ്ങള്‍ ഇങ്ങനെയാണ്. കാട്ടാനയെ പിടികൂടിയാല്‍ കൊണ്ടുവരാനുള്ള ലോറി തയാറായി. ലോറിയുടെ പിന്‍ഭാഗത്തു മരത്തടികള്‍ കൊണ്ടു കവചം ഒരുക്കിയിട്ടുണ്ട്. ലോറിക്കു പോകാനായി മണ്ണു മാന്തി യന്ത്രം ഉപയോഗിച്ചു വഴി ഒരുക്കി. വെടിവയ്ക്കാന്‍ യോജ്യമായ സ്ഥലം കണ്ടെത്തിയാല്‍ അവിടേക്കു വഴി ഒരുക്കും.

ആനയുടെ കൂട്ടില്‍ ചൂടു കുറയ്ക്കാന്‍ മണ്ണു ദിവസവും നനച്ചു കൊടുക്കുന്നുണ്ട്. ഏഴാമനെ പിടികൂടിയാല്‍ നല്‍കാനുള്ള പ്രത്യേക ഭക്ഷണവും മരുന്നും തയാറായി.

അതേസമയം വെല്ലുവിളികള്‍ ഇവയാണ്. ഏഴാമനൊപ്പം മറ്റു കാട്ടാനകള്‍ ഉള്ളത് വെല്ലുവിളിയാണ്. ഏഴാമനെ ഈ കൂട്ടത്തില്‍ നിന്നകറ്റിയാല്‍ എങ്ങനെ പ്രതികരിക്കുമെന്നതു വനംവകുപ്പ് ആശങ്കയോടെ കാണുന്നു. ഉള്‍കാട്ടില്‍ വച്ചു മയക്കുവെടി വച്ചാല്‍ അതിനെ അത്രയും ദൂരത്തു നിന്നു കൂട്ടില്‍ എത്തിക്കുന്നതു പ്രയാസമാകും. ഉള്‍ക്കാട്ടിലും ജനവാസ മേഖലയിലും അല്ലാത്ത സ്ഥലത്ത് ആനയെ എത്തിച്ചു വേണം വെടിവയ്ക്കാന്‍.

ധോണിയില്‍ വനമേഖലയില്‍ തുറസ്സായ സ്ഥലമില്ലാത്തതു ചെറിയ പ്രതിസന്ധിയാണ്. സുല്‍ത്താന്‍ബത്തേരിയിലെ കാട്ടില്‍ തുറസ്സായ സ്ഥലം കൂടുതല്‍ ഉണ്ടായതു പി.എം.രണ്ടാമനെ പിടിക്കാനുള്ള ശ്രമങ്ങള്‍ക്കു സഹായമായി. വെടിവച്ചാലും മയങ്ങാന്‍ കുറഞ്ഞത് അര മണിക്കൂര്‍ വേണ്ടി വരും. ഈ സമയത്തിനുള്ളില്‍ ആന എങ്ങോട്ട്, എവിടെ വരെ പോകുമെന്നതും ആശങ്ക ഉയര്‍ത്തുന്നു.

അതേസമയം മൂന്നാറില്‍ പടയപ്പ പ്രശ്‌നമുണ്ടാക്കിക്കൊണ്ടിരിക്കുന്നു. കാട്ടാന പടയപ്പ രണ്ടു ദിവസങ്ങളിലായി രണ്ട് ഓട്ടോറിക്ഷകള്‍ ആക്രമിച്ചു. പെരിയവരൈ ലോവര്‍ ഡിവിഷനിലും ഗ്രാംസ് ലാന്‍ഡിലുമാണ് ആക്രമണമുണ്ടായത്. മദപ്പാടുള്ള സമയമാണിതെന്നും അതിനാലാണ് ആന പ്രകോപിതനായി ആക്രമണം നടത്തുന്നതെന്നാണ് വനംവകുപ്പിന്റെ നിഗമനം.

പ്രദീപ്, ബാലു എന്നിവരുടെ ഓട്ടോറിക്ഷകള്‍ക്കു നേരെയാണ് ആക്രമണമുണ്ടായത്. ഇന്നലെ രാത്രിയാണ് ആക്രമണം നടന്നത്. അതിനാല്‍ത്തന്നെ സമീപത്ത് ആളുകള്‍ ഇല്ലാതിരുന്നതിനാല്‍ ആര്‍ക്കും അപകടം സംഭവിച്ചില്ല. ആനയെ തുരത്താന്‍ വനംവകുപ്പ് നടപടി കൈക്കൊള്ളുന്നില്ലെന്ന ആക്ഷേപം ഉയരുന്നുണ്ട്.

കഴിഞ്ഞ ദിവസങ്ങളിലും പടയപ്പയുടെ ആക്രമണമുണ്ടായിരുന്നു. പാതയോരത്തു നിര്‍ത്തിയിട്ടിരുന്ന മിനിലോറിയുടെ ചില്ലുകളും ഒരു തോട്ടത്തിലെ ബട്ടര്‍ ബീന്‍സ് കൃഷിയും നശിപ്പിച്ചിരുന്നു. മദപ്പാട് കണ്ടുതുടങ്ങിയ പടയപ്പ ഒരു മാസത്തോളമായി അക്രമാസക്തനാണ്.

കഴിഞ്ഞ ദിവസം പടയപ്പയെ പ്രകോപിപ്പിക്കാനും ഒരു ശ്രമമുണ്ടായി. മൂന്നാര്‍ - കടലാര്‍ റൂട്ടില്‍ പാതയോരത്തുനിന്ന പടയപ്പയെ ഈ വഴിയെത്തിയ കെഡിഎച്ച് കമ്പനി കടലാര്‍ എസ്റ്റേറ്റില്‍ ഫാക്ടറി ഡിവിഷനിലെ ചുടലെയാണ് വാഹനം ഇരപ്പിച്ചും ഹോണ്‍ മുഴക്കിയും പ്രകോപിപ്പിച്ചത്. ജീപ്പ് വനംവകുപ്പ് ഉദ്യോഗസ്ഥര്‍ കസ്റ്റഡിയിലെടുത്തു.