ഏറ്റവും കുറഞ്ഞ വേതനം നല്‍കിയില്ലെന്ന മുത്തൂറ്റ് ഫിന്‍കോര്‍പ്പ് മാനേജിംഗ് ഡയറ്റക്ടര്‍ക്കെതിരായ കേസില്‍ എം.ഡി. തോമസ് ജോണ്‍ മുത്തൂറ്റ് ഹാജരാകാന്‍ കോടതി ഉത്തരവിട്ടു.

തിരുവനന്തപുരം ഒന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയുടേതാണുത്തരവ്. ജൂണ്‍ 1 ന് പ്രതി ഹാജരാകാന്‍ മജിസ്‌ട്രേട്ട് പി.എസ്.സുമി ഉത്തരവിട്ടു. മുത്തൂറ്റ് പാപ്പച്ചന്‍ ഗ്രൂപ്പ് മുത്തൂറ്റ് ഫിന്‍കോര്‍പ്പ് ലിമിറ്റഡ് കമ്പനിയുടെ മാനേജിംഗ് ഡയറക്ടര്‍ തോമസ് ജോണ്‍ മുത്തൂറ്റ് ആണ് കേസിലെ ഏക പ്രതി. മുത്തൂറ്റ് ബാങ്കിന്റെ വിവിധ ബ്രാഞ്ചുകളില്‍ കണ്ടെത്തിയ തൊഴില്‍ നിയമ ലംഘനങ്ങള്‍ക്കെതിരെ 4 കേസുകളാണ് ലേബര്‍ ഓഫീസര്‍മാര്‍ കോടതിയില്‍ ഫയല്‍ ചെയ്തിട്ടുള്ളത്.


2020 സെപ്റ്റംബര്‍ 23 നാണ് കേസിനാസ്പദമായ സംഭവം നടന്നത്. തിരുവനന്തപുരം തൊഴില്‍ ഭവന്‍ ഒന്നാം സര്‍ക്കിള്‍ അസിസ്റ്റന്റ് ലേബര്‍ ഓഫിസര്‍ എ.അഭിലാഷ് നടത്തിയ പരിശോധനയിലാണ് തൊഴില്‍ നിയമ ലംഘനങ്ങള്‍ കണ്ടെത്തിയത്. തുടര്‍ന്ന് തൊഴിലുടമയായ എം ഡി യോട് രേഖാമൂലം ആവശ്യപ്പെട്ട കാരണം കാണിക്കല്‍ നോട്ടീസിനു നല്‍കിയ വിശദീകരണം തൃപ്തികരമല്ലാത്തതിനാലാണ് കോടതിയില്‍ കേസ് ഫയല്‍ ചെയ്തത്.

പരിശോധനയില്‍ കണ്ടെത്തിയ തൊഴില്‍ നിയമലംഘനങ്ങളുടെ വിശദാംശങ്ങള്‍ ഇപ്രകാരമാണ്: 1. 1960 ലെ കേരള ഷോപ്പ്‌സ് ആന്റ് കൊമേഴ്‌സ്യല്‍ എസ്റ്റാബ്ലിഷ്‌മെന്റ്‌സ് നിയമത്തിലെ ചട്ടം 10 (9) സ്ഥാപന അവധി ദിനങ്ങളുടെയും ജീവനക്കാരുടെ അവധി ദിനങ്ങളുടെയും രജിസ്റ്റര്‍ സൂക്ഷിച്ചില്ല , ചട്ടം 10 (1) ജീവനക്കാരുടെ സേവന റെക്കോര്‍ഡ് രജിസ്റ്റര്‍ , നിയമന രജിസ്റ്റര്‍ എന്നിവ സൂക്ഷിച്ചില്ല , 1958 ലെ ഏറ്റവും കുറഞ്ഞ വേതന നിയമത്തിന്റെ ചട്ടം 29 (5) ജീവനക്കാരുടെ മസ്റ്റര്‍ റോള്‍ സൂക്ഷിച്ചില്ല , 29 (2) വേജ് സ്ലിപ്പ് സൂക്ഷിച്ചില്ല , 21 (എ) ( 2 ) ജീവനക്കാരുടെ വ്യക്തിഗത ബാങ്ക് അക്കൗണ്ട് വഴി വേതനം കൊടുക്കുകയോ വിതരണം ചെയ്യുകയോ ചെയ്തില്ല , 21 (എ ) (1) നിയമനത്തിന്റെയും വേതനത്തിന്റെയും രജിസ്റ്റര്‍ ഇലക്ട്രോണിക് രൂപത്തില്‍ സമര്‍പ്പിക്കുകയോ അപ് ലോഡ് ചെയ്യുകയോ ചെയ്തില്ല എന്നീ കുറ്റങ്ങളാണ് കണ്ടെത്തിയത്.