പതിനഞ്ചാം നിയമസഭയുടെ എട്ടാംസമ്മേളനം ഗവര്‍ണര്‍ ആരിഫ് മുഹമ്മദ് ഖാന്റെ നയപ്രഖ്യാപനത്തോടെ തിങ്കളാഴ്ച തുടങ്ങും. രാവിലെ ഒന്‍പതിനാണ് നയപ്രഖ്യാപനം. പ്രസംഗം ഗവര്‍ണര്‍ അംഗീകരിച്ചു.

ബജറ്റ് സമ്മേളനമാണ് ഇത്തവണ നടക്കുന്നത്. 33 ദിവസമാണ് സമ്മേളനമെന്ന് സ്പീക്കര്‍ എ.എന്‍. ഷംസീര്‍ പറഞ്ഞു. ഫെബ്രുവരി മൂന്നിനാണ് ബജറ്റ്. ആറുമുതല്‍ എട്ടുവരെ ബജറ്റിന്മേലുള്ള പൊതുചര്‍ച്ച നടക്കും.

പിന്നീടുള്ള 14 ദിവസം വിവിധ സബ്ജക്ട് കമ്മിറ്റികള്‍ ധനാഭ്യര്‍ഥനകളില്‍ സൂക്ഷ്മപരിശോധന നടത്തും.ഫെബ്രുവരി 28 മുതല്‍ മാര്‍ച്ച് 22 വരെ 2023-24 വര്‍ഷത്തെ ധനാഭ്യര്‍ഥനകള്‍ ചര്‍ച്ചചെയ്ത് പാസാക്കുന്നതിനായി സമ്മേളനം നീക്കിവെച്ചു.
ബജറ്റിനെക്കുറിച്ചുള്ള രണ്ട് ധനവിനിയോഗബില്ലുകള്‍ ഈ സമ്മേളനത്തില്‍ പാസാക്കേണ്ടതുണ്ട്. മാര്‍ച്ച് 30-നാണ് നിയമസഭ സമ്മേളനം അവസാനിക്കുന്നത്.

തിങ്കളാഴ്ച ഗവര്‍ണറുടെ നയപ്രഖ്യാപനം കഴിഞ്ഞാല്‍ ബുധനാഴ്ച ഒരുദിവസം മാത്രമാണ് ജനുവരിയില്‍ സഭയുണ്ടാകുക. ബാക്കിയുള്ള ദിവസം അവധിയായിരിക്കും.

ഫെബ്രുവരി ഒന്നിന് വീണ്ടും തുടങ്ങുന്ന സമ്മേളനം പത്തിന് വീണ്ടും അവധിയിലേക്ക് കടക്കുകയും ചെയ്യും. പിന്നീട് ഫെബ്രുവരി 27-ന് തുടങ്ങി മാര്‍ച്ച് 30-ന് അവസാനിക്കുകയും ചെയ്യും.

അതേസമയം നിയമസഭാ ലൈബ്രറിയുടെ ശതാബ്ദി ആഘോഷങ്ങളുടെ ഭാഗമായി തുടങ്ങിയ അന്താരാഷ്ട്ര പുസ്തകോത്സവം വരും വര്‍ഷങ്ങളിലും നടത്തുമെന്ന് സ്പീക്കര്‍ എന്‍.എന്‍. ഷംസീര്‍ പറഞ്ഞു. ഇത്തവണത്തെ പുസ്തകോത്സവം മികച്ച വിജയമായിരുന്നു.

സംസ്ഥാനത്ത് ഏറ്റവുംകൂടുതല്‍ പുസ്തകം വിറ്റുപോയ മേളകൂടിയാണ് നടന്നതെന്നും അദ്ദേഹം പറഞ്ഞു. രണ്ടാംപതിപ്പ് 2024 ജനുവരി എട്ടുമുതല്‍ 14 വരെ നടക്കുമെന്നും സ്പീക്കര്‍ .