സങ്കടം അടക്കാനാവാതെ....വിവാഹസത്കാരം കഴിഞ്ഞ് കുഞ്ഞിനോടൊപ്പം സഹോദരന്റെ കൂടെ ബൈക്കില്‍ മടങ്ങവേ റോഡിലേക്കു തെറിച്ചുവീണ പന്തില്‍ത്തട്ടി ബൈക്ക് മറിഞ്ഞു, പിന്നാലെയെത്തിയ ലോറിക്കടിയില്‍പ്പെട്ട് യുവതിയ്ക്ക് ദാരുണാന്ത്യം

റോഡിലേക്കു തെറിച്ചുവീണ പന്തില്‍ത്തട്ടി ബൈക്ക് മറിഞ്ഞു. പിന്നാലെയെത്തിയ ലോറിക്കടിയില്‍പ്പെട്ട് യുവതിയുടെ ജീവന്‍ നഷ്ടമായി. വിവാഹസത്കാരം കഴിഞ്ഞ് രണ്ടുവയസ്സുള്ള കുഞ്ഞിനോടൊപ്പം സഹോദരന്റെ കൂടെ ബൈക്കില്‍ മടങ്ങുകയായിരുന്ന അരീക്കോട് മൈത്ര ചെമ്പ്രമ്മല്‍ വീട്ടില്‍ ഫാത്തിമ സുഹ്റ(38)യാണ് മരിച്ചത്. കുഞ്ഞും സഹോദരനും നിസ്സാര പരിക്കുകളോടെ രക്ഷപ്പെട്ടു.


ഞായറാഴ്ച വൈകീട്ട് നാലോടെ എടവണ്ണ-അരീക്കോട് പാതയില്‍ ഒതായി കിഴക്കേതല വെള്ളച്ചാലിലാണ് അപകടം. മൈത്രയിലെ ബന്ധുവീട്ടില്‍ വിവാഹച്ചടങ്ങു കഴിഞ്ഞ് ഫാത്തിമ സഹോദരനും മകനുമൊപ്പം തൃക്കലങ്ങോട്ടെ വീട്ടിലേക്കു മടങ്ങുകയായിരുന്നു. റോഡിലൂടെ ഉരുണ്ടുവന്ന പന്തില്‍ത്തട്ടി ബൈക്ക് മറിയുകയായിരുന്നുവെന്ന് ദൃക്സാക്ഷികള്‍ പറയുന്നു. ഫാത്തിമ റോഡിലേക്കും ബൈക്കിലുണ്ടായിരുന്ന മറ്റുള്ളവര്‍ റോഡരുകിലേക്കും തെറിച്ച് വീണതും തൊട്ടുപിന്നാലെയുണ്ടായിരുന്ന ടോറസ് ലോറിക്കടിയില്‍പ്പെട്ട യുവതിയെ ഉടന്‍തന്നെ ആശുപത്രിയിലെത്തിച്ചെങ്കിലും രക്ഷിക്കാനായില്ല.

പരിക്കേറ്റ ഫാത്തിമയെ എടവണ്ണയിലെ സ്വകാര്യ ആശുപത്രിയില്‍ പ്രവേശിപ്പിക്കുകയും തുടര്‍ന്ന് മഞ്ചേരി മെഡിക്കല്‍ കോളജിലേക്ക് മാറ്റുകയും ചെയ്തെങ്കിലും ജീവന്‍ നഷ്ടപ്പെട്ടിരുന്നു.
അശ്രദ്ധയോടെ വാഹനം ഓടിച്ചതിന് ലോറി ഡ്രൈവര്‍ക്കെതിരേ കേസെടുത്തു. എടവണ്ണ പോലീസും തിരുവാലി അഗ്‌നിരക്ഷാസേനയും സന്നദ്ധസേവകരും നാട്ടുകാരും സംഭവസ്ഥലത്തെത്തി രക്ഷാപ്രവര്‍ത്തനം നടത്തുകയും ചെയ്തു.