എറണാകുളം ലോ കോളേജില്‍ പൊതു വേദിയില്‍ ആളാവാന്‍ ശ്രമിച്ച നിയമ വിദ്യാര്‍ത്ഥി പെട്ടു പോയി. അപര്‍ണ ബാലമുരളിയുടെ കൈപിടിക്കാനും ചേര്‍ത്തു നിര്‍ത്താനുമുള്ള ശ്രമം അപര്‍ണ ഒഴിഞ്ഞ് മാറിയതോടെയാണ് വിവാദമായത്.

ആ സംഭവത്തില്‍ ആദ്യ പ്രതികരണവുമായി നടി അപര്‍ണ ബാലമുരളി. കോളേജ് അധികൃതരുടെ നടപടികളില്‍ തൃപ്തിയെന്നും ലോ കോളേജില്‍ അങ്ങനെ സംഭവിക്കാന്‍ പാടില്ലായിരുന്നുവെന്നും അപര്‍ണ ബാലമുരളി പറഞ്ഞു.

തങ്കം എന്ന പുതിയ ചിത്രത്തിന്റെ പ്രസ് മീറ്റില്‍ അപര്‍ണ തുറന്ന് പറഞ്ഞു. ഒട്ടും പ്രതീക്ഷിക്കാത്തതാണ് അവിടെ നടന്നത്. ലോ കോളജില്‍ അങ്ങനെ സംഭവിക്കരുതായിരുന്നു. എന്താണ് ചെയ്യേണ്ടത് എന്ന് കോളേജിന് അറിയാം, അതുപോലെ തന്നെ അവര്‍ ചെയ്തിട്ടുമുണ്ട്. അവിടുത്തെ എല്ലാ കുട്ടികളും സംഭവത്തില്‍ മാപ്പ് പറഞ്ഞു. കോളേജിനെ താന്‍ ബഹുമാനിക്കുന്നുവെന്നും അപര്‍ണ ബാലമുരളി പറഞ്ഞു.

ജനുവരി 18ന് ആയിരുന്നു എറണാകുളം ലോ കോളേജ് യൂണിയന്‍ പരിപാടിക്കിടെ അപര്‍ണ ബാലമുരളിയോട് രണ്ടാം വര്‍ഷ എല്‍എല്‍ബി വിദ്യാര്‍ത്ഥി വിഷ്ണു അപമര്യാദയായി പെരുമാറിയത്. പരിപാടിക്കിടെ പൂവുമായാണ് വിഷ്ണു വേദിയിലേക്ക് എത്തിയത്. പൂ സ്വീകരിച്ച അപര്‍ണയ്ക്ക് ഷേക്ക് ഹാന്‍ഡ് നല്‍കിയ വിഷ്ണു അപര്‍ണയെ കൈയില്‍ പിടിച്ച് എഴുന്നേല്‍പ്പിച്ച് നിര്‍ത്തി ഒപ്പം നിന്ന് ഫോട്ടോ എടുക്കാന്‍ ശ്രമിച്ചു. ഇതിനിടെ നടിയുടെ തോളത്ത് കൈയിടാനും ശ്രമിച്ച വിഷ്ണുവിനോട് അപര്‍ണ രൂക്ഷമായി പ്രതികരിച്ചിരുന്നു.

ഇതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായതോടെ എസ്എഫ്‌ഐ നയിക്കുന്ന കോളേജ് യൂണിയന്‍ സംഭവത്തില്‍ ഖേദം പ്രകടിപ്പിച്ച് രംഗത്ത് എത്തുകയും ചെയ്തു. ശേഷം വിഷ്ണുവിനെ സസ്‌പെന്‍ഡ് ചെയ്യുകയും ചെയ്തു. കോളേജ് സ്റ്റാഫ് കൗണ്‍സിലിന്റേതായിരുന്നു നടപടി. ഒരാഴ്ചത്തേക്കാണ് സസ്‌പെന്‍ഷന്‍. വലിയ വിവാദം സൃഷ്ടിച്ച സംഭവത്തില്‍ വിദ്യാര്‍ത്ഥിയോട് കോളേജ് സ്റ്റാഫ് കൗണ്‍സില്‍ വിശദീകരണം തേടിയിരുന്നു. തന്റെ ഭാഗത്ത് നിന്നുണ്ടായ മോശം പെരുമാറ്റത്തില്‍ ക്ഷമാപണം നടത്തുന്നതായി വിഷ്ണു അറിയിച്ചെങ്കിലും ഇത് തള്ളിയാണ് സസ്‌പെന്‍ഡ് ചെയ്തത്.

അപര്‍ണ ബാലമുരളിയോട് വിദ്യാര്‍ത്ഥി അപമര്യാദയായി പെരുമാറിയ സംഭവം വലിയ രീതിയിലാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ച ചെയ്യപ്പെടുന്നത്. വിനീത് ശ്രീനിവാസന്‍ അടക്കമുള്ളവര്‍ പങ്കെടുത്ത പ്രമോഷന്‍ പരിപാടിക്കിടെ അപര്‍ണയ്ക്കു പൂവ് നല്‍കാനായി വേദിയില്‍ കയറിയ വിദ്യാര്‍ത്ഥി അവരുടെ കൈയില്‍ പിടിച്ച് എഴുന്നേല്‍പ്പിക്കുകയും സെല്‍ഫിയെടുക്കാനായി തോളില്‍ കൈയിടുകയുമായിരുന്നു. നടി അസ്വസ്ഥയാകുകയും അപ്പോള്‍ തന്നെ 'എന്താടോ, ലോ കോളജ് അല്ലേ' എന്ന് ചോദിക്കുകയും ചെയ്തു. സംഭവത്തിന്റെ വീഡിയോ സോഷ്യല്‍ മീഡിയയില്‍ വൈറലായതോടെ വലിയ വിമര്‍ശനമാണ് കോളേജ് യൂണിയനെതിരെ ഉയര്‍ന്നത്.

വിദ്യാര്‍ത്ഥിയില്‍ നിന്നുണ്ടായ മോശം പെരുമാറ്റം വേദനിപ്പിച്ചതായി നടി അപര്‍ണ ബാലമുരളിയും പ്രതികരിച്ചിരുന്നു. അതേസമയം സംഭവത്തില്‍ വിദ്യാര്‍ത്ഥിയെ കോളേജ് സസ്‌പെന്‍ഡും ചെയ്തു. ഈ സംഭവം തെറ്റാണ് എന്നാണ് ഭൂരിഭാഗം പേരും അഭിപ്രായപ്പെട്ടത്.

ഒരു വേദിയില്‍ എങ്ങനെ പെരുമാറണം എന്നത് ഒരു വിദ്യാര്‍ത്ഥി എന്ന നിലയില്‍ അവര്‍ തീര്‍ച്ചയായും പഠിക്കേണ്ട കാര്യമാണ്. ഒരു നടി എന്നതിലുപരി ഒരു സ്ത്രീയായ അവര്‍ക്ക് 'കംഫര്‍ട്ടബള്‍' അല്ലാത്ത രീതിയില്‍ ഒരാള്‍ ദേഹത്തു കൈവച്ചപ്പോള്‍ അവര്‍ അവിടെ നിന്നും മാറിയും ആ പ്രതികരണവും ശരിയായ രീതിയാണെന്നും ചിലര്‍ അഭിപ്രായപ്പെട്ടു. അതേസമയം ഒരു ഫാന്‍ എന്ന രീതിയാണ് അയാള്‍ അങ്ങനെ പെരുമാറിയത് എന്നും ചര്‍ച്ചയുണ്ട്. അപര്‍ണ അങ്ങനെ പ്രതികരിക്കേണ്ട കാര്യമില്ലായിരുന്നു എന്നും അഭിപ്രായമുയര്‍ന്നു.