സംസ്ഥാനത്ത് ചൂട് ശക്തി പ്രാപിച്ചിരിക്കുകയാണ്. പകല്‍ സമയത്ത് വെളിയില്‍ ഇറങ്ങിയാല്‍ വിയര്‍ത്ത് കുളിക്കും. ഇപ്പോഴിതാ ആശ്വാസമായി മഴയെത്തുന്നു. സംസ്ഥാനത്ത് വീണ്ടും ഒറ്റപ്പെട്ട മഴക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ചൊവ്വാഴ്ചയോടെ കേരളത്തില്‍ മഴ ലഭിച്ചേക്കും.

മഡഗാസ്‌കറിനു സമീപം കഴിഞ്ഞ ദിവസമുണ്ടായ ചുഴലിക്കാറ്റും തുടര്‍ന്നുള്ള അന്തരീക്ഷസ്ഥിതിയുമാണ് മഴയ്ക്ക് അനുകൂലമായ സാഹചര്യം ഒരുക്കുന്നത്. ഒപ്പം ബംഗാള്‍ ഉള്‍ക്കടലില്‍ നിന്ന് ഈര്‍പ്പമുള്ള കാറ്റ് കേരളത്തില്‍ പ്രവേശിക്കുന്നതും മഴയെത്താന്‍ കാരണമാകും. നീണ്ട വരണ്ട കാലാവസ്ഥയ്ക്ക് ശേഷം സംസ്ഥാനത്തെ മഴ സാഹചര്യം മാറുന്നു.

സംസ്ഥാനത്ത് വരും ദിവസങ്ങളില്‍ മഴ എത്തിയേക്കുമെന്നാണ് കാലാവസ്ഥ കേന്ദ്രം നല്‍കുന്ന സൂചന. ഒറ്റപ്പെട്ട മഴക്കുള്ള സാധ്യതയാണ് കാലാവസ്ഥ കേന്ദ്രം പങ്കുവച്ചിരിക്കുന്നത്. ചൊവ്വാഴ്ചയോടെ കേരളത്തില്‍ മഴ ലഭിച്ചേക്കുമെന്നും കാലാവസ്ഥ കേന്ദ്രം അറിയിച്ചിട്ടുണ്ട്. ഇക്കുറി തെക്കന്‍ കേരളത്തിനാണ് കൂടുതല്‍ മഴ സാധ്യത.

ഒറ്റപ്പെട്ട മഴ മധ്യ കേരളത്തിലും വടക്കന്‍ ജില്ലകളുടെ കിഴക്കന്‍ മലമേഖലകളിലും കിട്ടിയേക്കും. മഡഗാസ്‌കറിനു സമീപം കഴിഞ്ഞ ദിവസമുണ്ടായ ചുഴലിക്കാറ്റും തുടര്‍ന്നുള്ള അന്തരീക്ഷസ്ഥിതിയുമാണ് മഴയ്ക്ക് അനുകൂലമായ സാഹചര്യം ഒരുക്കുന്നത്. ഇതിന് ഒപ്പം ബംഗാള്‍ ഉള്‍ക്കടലില്‍ നിന്ന് ഈര്‍പ്പമുള്ള കാറ്റ് കേരളത്തില്‍ പ്രവേശിക്കുന്നതും മഴയ്ക്ക് ഇടയാക്കിയേക്കും.

കേരള - കര്‍ണാടക - ലക്ഷദ്വീപ് തീരങ്ങളില്‍ മത്സ്യബന്ധനത്തിന് തടസ്സമില്ല എന്ന് കേന്ദ്ര കാലാവസ്ഥ വകുപ്പ് അറിയിച്ചു. 22 - 01 - 2023 നും 23 - 01 - 2023 നും : ശ്രീലങ്കന്‍ തീരത്തോട് ചേര്‍ന്നുള്ള തെക്ക് - പടിഞ്ഞാറന്‍ ബംഗാള്‍ ഉള്‍ക്കടലില്‍ മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയിലും ചില അവസരങ്ങളില്‍ 60 കിലോമീറ്റര്‍ വരെ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. മേല്‍പ്പറഞ്ഞ പ്രദേശങ്ങളില്‍ മുന്നറിയിപ്പുള്ള തീയതിയില്‍ മത്സ്യബന്ധനത്തിന് പോകാന്‍ പാടുള്ളതല്ല.

അതേസമയം വടക്കുകിഴക്കന്‍ മണ്‍സൂണ്‍ പിന്‍വാങ്ങിയപ്പോള്‍ സംസ്ഥാനത്ത് ഇത്തവണ ഭേദപ്പെട്ട മഴ ലഭിച്ചതായി ഇന്ത്യന്‍ മെട്രോളജിക്കല്‍ വകുപ്പിന്റെ കണക്കുകള്‍ വ്യക്തമാക്കുന്നു. 492 മില്ലിമീറ്റര്‍ മഴ ലഭിക്കേണ്ട സ്ഥാനത്ത് ഇത്തവണ ലഭിച്ചത് 476.2 മില്ലിമീറ്റര്‍. അതേസമയം, പാലക്കാട് ഉള്‍പ്പെടെ നാല് ജില്ലകളില്‍ മഴ കുറഞ്ഞു.

സംസ്ഥാനത്ത് ഏറ്റവും കുറവ് മഴ രേഖപ്പെടുത്തിയത് കണ്ണൂരാണ്, 41% കുറവ്. വടക്കുകിഴക്കന്‍ മണ്‍സൂണില്‍ 391.3 എം.എം ലഭിക്കേണ്ടിടത്ത് ആകെ രേഖപ്പെടുത്തിയത് 231.3 എം.എം. തൃശൂര്‍ ജില്ലയില്‍ 31 ശതമാനത്തിന്റെയും പാലക്കാട് (22%), മലപ്പുറം (24%), കാസര്‍കോട് (21%) എന്നിങ്ങനെയാണ് മഴ കുറവുള്ള മറ്റു ജില്ലകള്‍. ഒക്ടോബര്‍ ഒന്നുമുതല്‍ ഡിസംബര്‍ 31 വരെയാണ് തുലാവര്‍ഷത്തിന്റെ സമയം.

സംസ്ഥാനത്ത് ശരാശരിയേക്കാള്‍ അധികം മഴ ലഭിച്ച ജില്ലകള്‍ പത്തനംതിട്ടയും ഇടുക്കിയുമാണ്. പത്തനംതിട്ടയില്‍ ഈ കാലയളവില്‍ ലഭിക്കേണ്ട ശരാശരി മഴ 629 എം.എമ്മാണ്. ഇത്തവണ 858.8 എം.എം മഴയാണ് രേഖപ്പെടുത്തിയത്. 37% ശതമാനം കൂടുതല്‍. ഇടുക്കിയിലും കൂടുതല്‍ മഴ ലഭിച്ചു. 567.3 എം.എം ലഭിക്കേണ്ടിടത്ത് പെയ്തത് 698.2 എം.എം. 23%ശതമാനം കൂടുതല്‍.

അതേസമയം ചൂടിന്റെ കാഠിന്യവും കൂടി. പൊരിവെയിലില്‍ വെന്തുരുകുകയാണു കോട്ടയം ജില്ല. ഈ ചൂടു തന്നെ സഹിക്കാന്‍ വയ്യെന്നു പരിതപിക്കുന്നവര്‍ പ്രത്യേകം ശ്രദ്ധിക്കുക, കടുത്ത വെയിലിന്റെ കാലമാണു വരാനിരിക്കുന്നത്. കടുത്ത ചൂടില്‍ നിന്നും സൂര്യാതപത്തില്‍ നിന്നുമെല്ലാം രക്ഷപ്പെടാന്‍ ആരോഗ്യശ്രദ്ധ കര്‍ശനമായി പാലിക്കേണ്ട സമയം.


ജില്ലയില്‍ ഇതുവരെ രേഖപ്പെടുത്തിയതില്‍ ഏറ്റവും ഉയര്‍ന്ന ചൂട് 38.6ഡിഗ്രി സെല്‍ഷ്യസാണ്. 2020 മാര്‍ച്ചിലായിരുന്നു അത്. ജനുവരിയില്‍ ലഭിക്കേണ്ട വേനല്‍ മഴ ഇനിയും ലഭിക്കാത്തതിനാല്‍ മണ്ണിന്റെ വരള്‍ച്ച കൂടി വരും ദിവസങ്ങളില്‍ ചൂട് കൂടാനാണു സാധ്യത. അതിനിടയ്ക്ക് ആശ്വാസമായാണ് മഴ എത്തുന്നത്.