മകരവിളക്ക് ഉത്സവത്തിന് പരിസമാപ്തി..... ശബരിമലയില് അയ്യപ്പന് ചാര്ത്താന് കഴിഞ്ഞ 12ന് പന്തളത്തുനിന്ന് തിരുവാഭരണങ്ങളുമായി പുറപ്പെട്ട ഘോഷയാത്ര പന്തളത്തു തിരികെയെത്തി
ശബരിമലയില് അയ്യപ്പന് ചാര്ത്താന് കഴിഞ്ഞ 12ന് പന്തളത്തുനിന്ന് തിരുവാഭരണങ്ങളുമായി പുറപ്പെട്ട ഘോഷയാത്ര മകരവിളക്ക് ഉത്സവത്തിന് ശേഷം പന്തളത്തു തിരികെയെത്തി. ഇന്നലെ രാവിലെ എട്ടു മണിയോടെ പന്തളത്തെത്തിയ സംഘത്തെ വലിയ പാലത്തിലെത്തിയപ്പോള് വലിയകോയിക്കല് ക്ഷേത്രോപദേശക സമിതി പ്രസിഡന്റ് പൃഥ്വിപാലിന്റെ നേതൃത്വത്തില് സ്വീകരിച്ചു.
മേടക്കല്ലിലെത്തിയ സംഘത്തെ പന്തളം കൊട്ടാരം നിര്വ്വാഹക സംഘം പ്രസിഡന്റ് പി.ജി.ശശികുമാര് വര്മ്മ, സെക്രട്ടറി പി.എന്.നാരായണ വര്മ്മ, പാലസ് വെല്ഫെയര് ട്രസ്റ്റിനു വേണ്ടി പ്രസിഡന്റ് കെ.സി.ഗിരീഷ് കുമാര്, സെക്രട്ടറി ദീപാവര്മ്മ എന്നിവരും ദേവസ്വം ബോര്ഡും സ്വീകരിച്ചു. തുടര്ന്നു കൊട്ടാരം ഭാരവാഹികള് തിരുവാഭരണങ്ങള് പരിശോധിച്ച് ഏറ്റുവാങ്ങി സ്രാമ്പിക്കല് കൊട്ടാരത്തിലെ തിരുവാഭരണ മാളികയിലെ സുരക്ഷിത മുറിയിലേക്കു മാറ്റി.
ഘോഷയാത്രയ്ക്ക് ഉള്ളന്നൂര് കുളക്കരയില് പാര്ത്ഥസാരഥി സേവാസമിതി, മണ്ണടി പീടികയില് ഹൈന്ദവ സേവാ സമിതി, കാഞ്ഞിരമാല പടിയില് ശബരിമല അയ്യപ്പ സമാജം, പൈവഴി ജംഗ്ഷനില് ഉള്ളന്നൂര് ശ്രീഭദ്രാദേവീ ക്ഷേത്രോപദേശക സമിതി, ബാലഗോകുലം, പാറ ജംഗ്ഷനില് ഹിന്ദു ഐക്യവേദി, പുതുവാക്കല് ഗ്രാമീണ വായനശാല, ഗുരുമന്ദിരത്തിനു മുമ്പില് സേവാസമിതി, എസ്.എന്.ഡി.പി ശാഖ ഭാരവാഹികള് എന്നിവരും സ്വീകരണം നല്കി. കുളനടയില് പ്രസിഡന്റ് ചിത്തിര സി ചന്ദ്രന്റെ നേതൃത്വത്തില് ഗ്രാമപഞ്ചായത്ത്, കുളനട ദേവീക്ഷേത്ര ഭരണ സമിതി, കൈപ്പുഴ ശ്രീകൃഷ്ണ ക്ഷേത്രോപദേശക സമിതി, പുഴയോരം റസിഡന്റ്സ് അസോസിയേഷന് എന്നിവര് സ്വീകരിച്ചു.
https://www.facebook.com/Malayalivartha
