പളനിയിൽ പോകാൻ നേർച്ച കാശിന് എത്തി വീട്ടിൽ തനിച്ചുണ്ടായിരുന്ന പത്താം ക്ലാസ് വിദ്യാർത്ഥിനിയെ കടന്നു പിടിച്ച് ആക്രമിക്കാൻ ശ്രമിച്ച പ്രതിയെ പോലീസ് അറസ്റ്റ് ചെയ്തു. കൊല്ലം അഞ്ചാലുംമൂട് സ്വദേശി ശ്യാം രാജ് ആണ് പിടിയിലായത്. ഇക്കഴിഞ്ഞ ശനിയാഴ്ച ഉച്ചയ്ക്ക് പന്ത്രണ്ടരയോടെയാണ് സംഭവം നടന്നത്. പെൺകുട്ടിയുടെ മനോധൈര്യത്തിലാണ് ആക്രമണത്തിൽ നിന്ന് തലനാരിഴയ്ക്ക് രക്ഷപ്പെട്ടത്. തിരുവനന്തപുരം നഗരത്തിൽ ഹോളി ഏഞ്ചൽസ് സ്കൂളിന് സമീപമായിരുന്നു സംഭവം. ഇതേ സ്കൂളിലെ പത്താം ക്ലാസ് വിദ്യാർത്ഥിനിക്ക് നേരെയാണ് അക്രമ ശ്രമം നടന്നത്.

സംഭവ സമയം കുട്ടിയുടെ മാതാപിതാക്കൾ ജോലിക്ക് പോയിരുന്നു. മോഡല്‍ പരീക്ഷയായതിനാല്‍ വീട്ടിൽ കുട്ടി മാത്രമാണ് ഉണ്ടായിരുന്നത്. അക്രമിയെ തള്ളിമാറ്റി പെൺകുട്ടി അയൽവീട്ടിലെത്തി കാര്യം അറിയിക്കുകയായിരുന്നു. നേർച്ച ചോദിച്ചാണ് അക്രമി വീട്ടിലെത്തിയതെന്ന് പരാതിയിൽ നൽകിരുന്നു. കൈയിലൊരു തട്ടത്തിൽ ഭസ്മുണ്ടായിരുന്നു. വാതിൽ തുറന്നതും അകത്തേക്ക് കയറാൻ ശ്രമിച്ചു. കുറി തൊടാനെന്ന ഭാവത്തിലാണ് ആക്രമിക്കാൻ ശ്രമിച്ചത്. പുറത്തിറങ്ങാൻ ആവശ്യപ്പെട്ട് വിദ്യാർത്ഥിനി നിലവിളിക്കുകയായിരുന്നു.

ഇതോടെ കുട്ടിയുടെ രണ്ടു കയ്യിലും കടന്നു പിടിക്കുകയും ആക്രമിക്കാൻ ശ്രമിക്കുകയുമായിരുന്നു. പേടിച്ചെങ്കിലും കുട്ടി പെട്ടെന്ന് ഇയാളെ തള്ളിമാറ്റി വീട്ടിൽ നിന്ന് ഇറങ്ങി ഓടി. തൊട്ടടുത്ത വീട്ടിലെത്തി കാര്യം പറഞ്ഞു. അപ്പോഴേക്കും ശ്യാം രാജ് ഓടി രക്ഷപ്പെടുകയായിരുന്നു.

ഓട്ടോറിക്ഷാ ഡ്രൈവറായ അച്ഛനും അമ്മയും വീട്ടിലില്ലാത്ത സമയത്തായിരുന്നു ഉച്ചയോടെ ഇയാൾ വീട്ടിലേയ്ക്ക് എത്തി വിദ്യാർത്ഥിനിയെ ആക്രമിക്കാൻ ശ്രമിച്ചത്. നഗരഹൃദയത്തില്‍ അടുത്തടുത്ത് വീടുകളുള്ള വഞ്ചിയൂര്‍പോലൊരു സ്ഥലത്ത് പകല്‍ ഇങ്ങനെയൊരു ആക്രമണമുണ്ടായത് ഈ പ്രദേശത്തെയാകെ ഭീതിയിലാഴ്ത്തിയിരുന്നു. പ്രതിയുടെ സിസിടിവി ദൃശ്യങ്ങൾ സമീപത്തെ സ്ഥാപനങ്ങളിൽ നിന്ന് കണ്ടെടുക്കുകയായിരുന്നു.