സംസ്ഥാനത്ത് ഇന്നും മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. മഴ മുന്നറിയിപ്പിൽ മാറ്റം വരുത്തി കാലാവസ്ഥാ നിരീക്ഷണ കേന്ദ്രം പുതിയ മുന്നറിയിപ്പ് പുറത്ത് വിട്ടിട്ടുണ്ട്. സംസ്ഥാനത്ത് മഴ ശക്തമാകുന്നുവെന്ന മുന്നറിയിപ്പിന് പിന്നാലെ രണ്ട് ജില്ലകൾക്ക് ജാഗ്രതാ നിർദേശം നൽകി. അതേസമയം കേരളത്തിൽ ചിലയിടങ്ങളിൽ ഉണ്ടാകുന്ന ഈ മഴയ്‌ക്കു കാരണം ഇന്ത്യൻ മഹാസമുദ്രത്തിലെ മാഡെൻ ജൂലിയൻ ആന്തോളനം എന്ന പ്രതിഭാസം കാരണമാണ്. അന്തരീക്ഷത്തിലെ ഊര്‍ജതരംഗങ്ങളുടെ ഫലമായി ഭൂമധ്യരേഖയോടുചേർന്ന് മേഘക്കൂട്ടങ്ങൾ ഉണ്ടാകുന്നു.

ഇത് കാരണമാണ് ഇങ്ങനെ മഴ പെയ്യുന്നത്. റോളണ്ട് മാഡെൻ, പോൾ ജൂലിയൻ എന്നീ ശാസ്ത്രജ്ഞരാണ് ഈ പ്രതിഭാസത്തെ കണ്ടെത്തിയിരിക്കുന്നത്. ക്ലൗഡ് ബാൻഡ് എന്നും ഇവ അറിയപ്പെടുന്നുണ്ട്. ഇവ നിശ്ചിത അകലത്തിലാണ് രൂപപ്പെടുന്നത്. ബാൻഡ്മേളക്കാർ അണിനിരക്കുന്നതുപോലെയാണിത് ഉണ്ടാകുന്നത്. മഴയെത്തുടർന്ന് മൂടൽമഞ്ഞും തണുപ്പും കൂടുകയും ചെയ്യും .

ഭൂമധ്യരേഖയോടുചേർന്ന് 15 ഡിഗ്രി വീതം തെക്കും വടക്കുമായാണ് ഈ മേഘങ്ങൾ രൂപപ്പെടുന്നത്. ഇവ കിഴക്കോട്ട് സഞ്ചരിച്ചുകൊണ്ടിരിക്കും.കടലിലെ ചൂടുകാരണം വായു ചൂടായാണ് പുതിയ മേഘം ഉണ്ടാകുന്നത് . മേഘക്കൂട്ടങ്ങൾ ഒന്നിടവിട്ട് പെയ്തുകൊണ്ടിരിക്കും. രൂപപ്പെടുന്നതും ഒന്നിട വിട്ടാണെന്ന് കുസാറ്റിലെ ശാസ്ത്രജ്ഞൻ ഡോ. എം.ജി. മനോജ് വ്യക്തമാക്കി.

അതേസമയം തെക്കൻ കേരളത്തിലും, വടക്കൻ കേരളത്തിലെ മലയോര മേഖലകളിലും ശക്തമായ മഴ പെയ്യുമെന്നാണ് പ്രവചനം. തിരുവനന്തപുരം, എറണാകുളം ജില്ലകളിൽ യെല്ലോ അലർട്ടും പുറപ്പെടുവിച്ചിട്ടുണ്ട്. സംസ്ഥാനത്ത് ഉടനീളം ഒറ്റപ്പെട്ട മഴ ഉണ്ടായേക്കുമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നു.ഏറെ നാളുകൾക്ക് ശേഷമാണ് സംസ്ഥാനത്ത് വീണ്ടും മഴയുടെ സാഹചര്യമുണ്ടാകുന്നത്. മഡഗാസ്‌കറിന് സമീപമുണ്ടായ ചുഴലിക്കാറ്റാണ് കേരളത്തിൽ കാലാവസ്ഥാ വ്യതിചലിക്കാൻ കാരണമായത്.