പുലര്ച്ചെ ബൈക്കിലെത്തി സ്ത്രീകളുടെ മുഖത്തേക്ക് മുളകുപൊടിയെറിഞ്ഞ് മോഷണം നടത്തുന്നയാള് പിടിയില്
പുലര്ച്ചെ ബൈക്കില് സഞ്ചരിച്ച് സ്ത്രീകളുടെ മുഖത്തേക്ക് മുളകുപൊടിയെറിഞ്ഞ് മാല കവരുന്ന മോഷ്ടാവ് പിടിയില്.കലൂര് സ്വദേശി രതീഷാണ് മുളക് പൊടിയുമായി എളമക്കര പൊലീസിന്റെ പിടിയിലായത്. പോണേക്കര മരിയമ്മന് കോവില് ഭാഗത്തുവെച്ചും ഇടപ്പള്ളി ബൈപ്പാസ് റോഡില് വെച്ചും പുലര്ച്ചെ ബൈക്കില് സഞ്ചരിച്ച് സ്ത്രീകളുടെ കണ്ണില് മുളക് പൊടി എറിഞ്ഞ് കവര്ച്ച നടത്തിയതിന് ഇയാള്ക്കെതിരെ നേരത്തെ കേസുകള് നിലവിലുണ്ട്.വീണ്ടും മോഷണം നടത്താന് മുളകുപൊടിയുമായി പോകുന്നതിനിടെയാണ് രതീഷിനെ പോലീസ് അറസ്റ്റ് ചെയ്തത്.
ദിവസങ്ങള്ക്ക് മുമ്പ് കൊലക്കേസില് പ്രതിയായ ഭര്ത്താവിനെ പിടികൂടാനെത്തിയ പോലീസിന് നേരെ ഭാര്യ മുളകുപൊടിയെറിഞ്ഞ സംഭവവും പുറത്തുവന്നു. തെലങ്കാനയിലെ അറ്റപുരിലാണ് സംഭവം. ഭാര്യയെ പോലീസ് പിന്നീട് അറസ്റ്റ് ചെയ്തു. ഷമീം പര്വീണ് എന്ന യുവതിയാണ് ഭര്ത്താവിനെ അറസ്റ്റ് ചെയ്യാന് വന്ന പോലീസ് ഉദ്യോഗസ്ഥര്ക്ക് നേരെ മുളകുപൊടി എറിഞ്ഞ് ഭര്ത്താവിനെ രക്ഷപ്പെടുത്തിയത്. 2019 ല് ഉത്തരാഖണ്ഡില് രജിസ്റ്റര് ചെയ്ത കൊലപാതകക്കേസില് പ്രതിയാണ് ഇവരുടെ ഭര്ത്താവ്.
ഉത്തരാഖണ്ഡ് പോലീസ് അന്വേഷിച്ചുകൊണ്ടിരുന്ന ഇയാളും ഭാര്യയും ഹൈദരാബാദിലെ അറ്റപുരില് താമസിക്കുന്നുണ്ടെന്ന വിവരം പോലീസിന് ലഭിച്ചിരുന്നു. തുടര്ന്ന് ഉത്തരാഖണ്ഡ് സ്പെഷല് ടാസ്ക് ഫോഴ്സിലെ ഉദ്യോഗസ്ഥര് ഇയാളെ അറസ്റ്റ് ചെയ്യാനായി എത്തുകയായിരുന്നു. പ്രദേശത്തെ പോലീസ് സ്റ്റേഷനിലെ ഉദ്യോഗസ്ഥരും ഇവരോടൊപ്പമുണ്ടായിരുന്നു.
പോലീസുകാരെ കണ്ട ഉടന് ഷമീം പര്വീണ് ഇവര്ക്ക് നേരെ മുളക് പൊടി എറിയുകയായിരുന്നു. പോലീസ് ഉദ്യോഗസ്ഥര് തന്നെ ഉപദ്രവിക്കുകയാണെന്ന് നാട്ടുകാരെ തെറ്റിദ്ധരിപ്പിക്കാനും ഇവര് ശ്രമം നടത്തി. ഈ ബഹളത്തിനിടയില് ഭര്ത്താവ് വസീം സമര്ഥമായി രക്ഷപ്പെടുകയും ചെയ്തു.
https://www.facebook.com/Malayalivartha
