നെടുമങ്ങാട് കരിപ്പൂരിലെ സൂര്യഗായത്രി കൊലക്കേസിന്റെ വിചാരണ നാളെ ആരംഭിക്കും...88 സാക്ഷികളെ പ്രോസിക്യൂഷന് വിസ്തരിക്കും, പ്രേമനൈരാശ്യവും, വിവാഹാലോചന നിരസിച്ചതിലുള്ള വിരോധവുമാണ് കൊലപാതകത്തിലേക്ക് നയിച്ചതെന്ന് കുറ്റപത്രം
നെടുമങ്ങാട് കരിപ്പൂരിലെ സൂര്യഗായത്രി കൊലക്കേസിന്റെ വിചാരണ നാളെ ആരംഭിക്കും...88 സാക്ഷികളെ പ്രോസിക്യൂഷന് വിസ്തരിക്കും, പ്രേമനൈരാശ്യവും, വിവാഹാലോചന നിരസിച്ചതിലുള്ള വിരോധവുമാണ് കൊലപാതകത്തിലേക്ക് നയിച്ചതെന്ന് കുറ്റപത്രം.
നെടുമങ്ങാട്, കരിപ്പൂര് ഉഴപ്പാക്കോണം പുത്തന് ബംഗ്ലാവില് വാടകയ്ക്ക് താമസിച്ചിരുന്ന ശിവദാസിന്റെയും വത്സലയുടെയും ഏകമകളായ സൂര്യഗായത്രി (20)യെ കുത്തിക്കൊലപ്പെടുത്തിയ കേസിന്റെ വിചാരണ തിരുവനന്തപുരം ആറാം അഡീഷണല് സെഷന്സ് ജഡ്ജ് കെ.വിഷ്ണു മുമ്പാകെ നാളെ ആരംഭിക്കും.
പേയാട് ചിറക്കോണം വാറുവിളാകത്ത് വീട്ടില് അശോകന് മകന് അരുണ് (20) ആണ് കേസിലെ പ്രതി. ജാമ്യപേക്ഷ നിരസിച്ചതിനാല് തിരുവനന്തപുരം ജില്ലാ ജയിലില് വിചാരണ തടവുകാരനായി കഴിയുകയാണ് പ്രതിയിപ്പോള്. 88 സാക്ഷികളെ പ്രോസിക്യൂഷന് വിസ്തരിക്കും. 60 രേഖകളും 50 തൊണ്ടിമുതലുകളും പ്രോസിക്യൂഷന് കോടതിയില് ഹാജരാക്കിയിട്ടുണ്ട്.
പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര് എം.സലാഹുദീന്, വിനു മുരളി എന്നിവര് ഹാജരാകുകയും ചെയ്യും. ക്രൈംബ്രാഞ്ച് ഹെഡ്ക്വാര്ട്ടേഴ്സ് അഡ്മിനിസ്ട്രേഷന് പൊലീസ് സൂപ്രണ്ടായി ജോലി നോക്കിവരുന്ന ബി.എസ്.സജിമോനാണ് അന്വേഷണം നടത്തി കുറ്റപത്രം ഹാജരാക്കിയിട്ടുളളത്.
അതേസമയം 30-08-2021 തിങ്കളാഴ്ച ഉച്ചയക്ക് രണ്ട് മണിയോടെയാണ് കേസിനാസ്പദമായ സംഭവം നടന്നത്. സൂര്യഗായത്രിയും അച്ഛനും അമ്മയും വാടകയ്ക്ക് താമസിച്ചിരുന്ന നെടുമങ്ങാട് കരുപ്പൂരിലെ വീട്ടിലെത്തിയായിരുന്നു ആക്രമണം നടത്തിയത്.
സൂര്യയുടെ അച്ഛനും അമ്മയും ശാരീരിക വെല്ലുവിളികളുള്ളവരാണ് . തിങ്കളാഴ്ച ഉച്ചയോടെയാണ് ഇവര് വാടകയ്ക്ക് താമസിക്കുന്ന വീട്ടില് നിന്ന് നിലവിളി ഉയര്ന്നുകേട്ടത്. അടുക്കള വാതിലിലൂടെ അകത്തുകടന്ന അരുണ്, സൂര്യയെ തലങ്ങും വിലങ്ങും കുത്തുകയായിരുന്നു. മകളെ ആക്രമിക്കുന്നതുകണ്ട അമ്മ വത്സല തടയാനായി ശ്രമിക്കുന്നതിനിടെ അമ്മയെയും അരുണ് കുത്തി.
സൂര്യയുടെ ശരീരത്തില് 33 ഇടങ്ങളിലായി കുത്തേറ്റു. തല ചുമരില് ഇടിച്ച് പലവട്ടം മുറിവേല്പ്പിച്ചു. സൂര്യ അബോധാവസ്ഥയിലായിട്ടും ഇയാള് വീണ്ടും വീണ്ടും കുത്തുകയായിരുന്നുവെന്ന് രക്ഷിതാക്കള് പറയുന്നു. സൂര്യയുടെ പിതാവ് ശിവദാസന്റെ നിലവിളി ഉച്ചത്തിലായതോടെ അരുണ് ഇറങ്ങിയോടി. അയല്ക്കാര് ഓടിയെത്തിയപ്പോഴേക്കും അരുണ് സമീപത്തെ മറ്റൊരു വീടിന്റെ ടെറസ്സിലേക്ക് ഒളിക്കാനായി ശ്രമിച്ചു. ഇവിടെ വച്ചാണ് നാട്ടുകാരും പൊലീസും ചേര്ന്ന് അരുണിനെ പിടികൂടിയത്.
"
https://www.facebook.com/Malayalivartha