ഇന്ന് അന്താരാഷ്ട്ര ഉറക്ക ദിനമാണ്. ഉറക്കത്തിന്റെ പ്രധാന്യം മനസിലാക്കുന്നതിന് വേണ്ടിയാണ് ഈ ദിനം ആചരിക്കുന്നത്. എന്നാല്‍ ഉറങ്ങാന്‍ വേണ്ടി ഏതെങ്കിലും കമ്പനി അവധി കൊടുക്കുമോ. അതും സംഭവിച്ചു.

ജീവനക്കാര്‍ക്ക് സര്‍പ്രൈസ് അവധി പ്രഖ്യാപിച്ചിരിക്കുകയാണ് ബംഗളൂരു ആസ്ഥാനമായ കമ്പനി. ഗൃഹോപകരണ വിതരണ കമ്പനിയായ വേക്ഫിറ്റ് സൊല്യൂഷന്‍സാണ് ജീവനക്കാര്‍ക്ക് സൗഖ്യമുണ്ടാകട്ടെ എന്നാശംസിച്ച്, ആവശ്യക്കാര്‍ക്ക് ഇന്ന് അവധി എടുക്കാമെന്ന് അറിയിച്ചിരിക്കുന്നത്.

ജീവനക്കാര്‍ക്ക് അയച്ച മെയിലിന്റെ സ്‌ക്രീന്‍ഷോട്ട് കമ്പനി ലിങ്കഡ്ഇന്നില്‍ ഷെയര്‍ ചെയ്യുകയും ചെയ്തു. അന്താരാഷ്ട്ര ഉറക്ക ദിനത്തോടനുബന്ധിച്ച് മാര്‍ച്ച് 17ന് വേക്ക്ഫിറ്റ് സൊല്യൂഷ്യന്‍സിലെ എല്ലാ ജീവനക്കാര്‍ക്കും വിശ്രമം അനുവദിക്കുന്നതായിരിക്കും. വരാനിരിക്കുന്നത് തിരക്കേറിയ ആഴ്ചയായതിനാല്‍ വിശ്രമിക്കുന്നതിനും മാനസികപിരിമുറുക്കത്തിന് അയവ്വരുത്തുന്നതിനും ഇതാണ് മികച്ച അവസരം. ജീവനക്കാര്‍ക്ക് അയച്ച സന്ദേശത്തില്‍ കമ്പനി പറയുന്നു.

'Surprise Holiday: Announcing the Gift of Sleep' എന്ന തലക്കെട്ടോടെയാണ് മെയില്‍. ഉറക്കത്തെ പ്രോത്സാഹിപ്പിക്കുന്നവര്‍ എന്ന നിലയില്‍ ഉറക്കദിന ആഘോഷത്തെക്കുറിച്ചും കമ്പനി പരിഗണിക്കുന്നു. മറ്റ് ഏതൊരു അവധിയും എടുക്കുന്നതുപോലെ എച്ച് ആര്‍ പോര്‍ട്ടലിലൂടെ ഈ അവധിക്കും നിങ്ങള്‍ക്ക് അപേക്ഷിക്കാവുന്നതാണ്. കമ്പനി പറഞ്ഞിട്ടുണ്ട്.

ഇതാദ്യമായല്ല ഇങ്ങനെയുള്ള വേറിട്ട ആനുകൂല്യം കമ്പനി ജീവനക്കാര്‍ക്ക് നല്‍കുന്നത്. കഴിഞ്ഞ വര്‍ഷം ജീവനക്കാര്‍ക്കായി 'Right to Nap policy' കമ്പനി അവതരിപ്പിച്ചിരുന്നു. ജോലിസമയത്ത് 30 മിനിറ്റ് ജീവനക്കാരെ ഉറങ്ങാന്‍ അനുവദിക്കുന്നതാണ് ഈ നയം. ഉറക്കത്തിന്റെ പ്രാധാന്യവും ഉറക്കവുമായി ബന്ധപ്പെട്ടുണ്ടാകുന്ന അസുഖങ്ങളുമൊക്കെയാണ് അന്താരാഷ്ട്ര ഉറക്ക ദിനത്തില്‍ ചര്‍ച്ചയാകുന്നത്.

ഉറക്കത്തിന്റെ പ്രാധാന്യത്തെക്കുറിച്ച് അവബോധം വളര്‍ത്തുകയാണ് ഈ ദിനത്തിന്റെ ലക്ഷ്യം. 2008 മുതല്‍ ഉറക്ക ദിനം ആചരിച്ച് വരുന്നു. 2008 മുതല്‍ വേള്‍ഡ് സ്ലീപ്പ് സൊസൈറ്റിയുടെ വേള്‍ഡ് സ്ലീപ് ഡേ കമ്മിറ്റി, വേള്‍ഡ് അസോസിയേഷന്‍ ഓഫ് സ്ലീപ്പ് മെഡിസിന്‍, 2008 മുതല്‍ സംഘടിപ്പിക്കുന്ന ഒരു വാര്‍ഷിക പരിപാടിയാണ് വേള്‍ഡ് സ്ലീപ്പ് ഡേ. മരുന്ന്, വിദ്യാഭ്യാസം, സാമൂഹിക വശങ്ങള്‍ എന്നിവയുള്‍പ്പെടെയുള്ള ഉറക്കവുമായി ബന്ധപ്പെട്ട പ്രശ്നങ്ങളെക്കുറിച്ചും ദിനം അവബോധം സൃഷ്ടിക്കുന്നു.

ഉറക്കക്കുറവ് കാലിലെ ധമനികളുടെ തടസ്സത്തിന്റെ സാധ്യത ഇരട്ടിയാക്കുന്നതായി പഠനം. ഏഴ് മുതല്‍ എട്ട് മണിക്കൂര്‍ വരെ ഉറങ്ങുന്നതിനെ അപേക്ഷിച്ച് അഞ്ച് മണിക്കൂറില്‍ താഴെ ഉറങ്ങുന്നവരില്‍ പെരിഫറല്‍ ആര്‍ട്ടീരിയല്‍ ഡിസീസ് (പിഎഡി) വരാനുള്ള സാധ്യത 74 ശതമാനം വര്‍ദ്ധിപ്പിക്കുന്നതായി പഠനത്തില്‍ പറയുന്നു. യൂറോപ്യന്‍ ഹാര്‍ട്ട് ജേണലില്‍ പഠനം പ്രസിദ്ധീകരിച്ചു.

പഠനം സൂചിപ്പിക്കുന്നത് രാത്രിയില്‍ ഏഴ് മുതല്‍ എട്ട് മണിക്കൂര്‍ വരെ ഉറങ്ങുന്നത് പെരിഫറല്‍ ആര്‍ട്ടീരിയല്‍ ഡിസീസ് സാധ്യത കുറയ്ക്കുന്നതിന് സഹായകമാണ്. കൈകളിലേക്കോ കാലുകളിലേക്കോ ഉള്ള രക്തയോട്ടം കുറയ്ക്കുന്ന ഒരു സാധാരണ അവസ്ഥയാണ് പെരിഫറല്‍ ആര്‍ട്ടറി ഡിസീസ്. ധമനികളില്‍ ഫാറ്റി പ്ലാക്ക് അടിഞ്ഞുകൂടുന്നതാണ് ഇത് പ്രാഥമികമായി സംഭവിക്കുന്നത്. ഇത് ഏത് രക്തക്കുഴലിലും സംഭവിക്കാം. പക്ഷേ ഇത് കൈകളേക്കാള്‍ കാലുകളിലാണ് കൂടുതലായി കാണപ്പെടുന്നത്.

ആഗോളതലത്തില്‍ 200 ദശലക്ഷത്തിലധികം ആളുകള്‍ക്ക് പെരിഫറല്‍ ആര്‍ട്ടറി ഡിസീസ് (പിഎഡി) ഉണ്ടെന്നാണ് റിപ്പോര്‍ട്ടുകള്‍ പറയുന്നത്. ഇത് കാലുകളിലെ ധമനികളിലെ രക്തയോട്ടം നിയന്ത്രിക്കുകയും സ്‌ട്രോക്ക്, ഹൃദയാഘാതം എന്നിവ ഉണ്ടാകാനുള്ള സാധ്യത വര്‍ദ്ധിപ്പിക്കുകയും ചെയ്യുന്നു. ഉറക്കക്കുറവ് കൊറോണറി ആര്‍ട്ടറി രോഗത്തിന്റെ ഉയര്‍ന്ന അപകടസാധ്യതയുമായി ബന്ധപ്പെട്ടിരുന്നു. ഇത് പിഎഡി പോലെ അടഞ്ഞ ധമനികള്‍ മൂലമാണ് ഉണ്ടാകുന്നത്.