അടുത്ത വര്ഷം വരുമല്ലോ... നിര്ഭാഗ്യവശാല് എംപിയാണെന്ന് രാഹുല് ഗാന്ധി; ജയറാം രമേശ് കയ്യുടനെ തിരുത്തി; വയനാട്ടുകാര് എല്ലാം കാണുന്നുണ്ട്; എത്രകാലം പഠിപ്പിക്കുമെന്ന് പരിഹസിച്ച് ബിജെപി
പ്രധാനമന്ത്രിയ്ക്കെതിരെ രാഹുല് ഗാന്ധി നടത്തിയ പ്രസ്താവനയ്ക്കെതിരെ മാപ്പ് പറയണമെന്ന് ബിജെപിക്കാര് പറയുന്നതിനിടെ മറ്റൊരു സംഭവം. വാര്ത്താ സമ്മേളനത്തിനിടെ രാഹുല് ഗാന്ധിയെ ജയറാം രമേശ് തിരുത്തിയ സംഭവത്തെ പരിഹസിച്ച് ബിജെപി. തന്റെ ലണ്ടന് പ്രസംഗവുമായി ബന്ധപ്പെട്ട വിവാദം സംബന്ധിച്ച് മാധ്യമപ്രവര്ത്തകരോട് സംസാരിക്കാനാണ് രാഹുല് വാര്ത്താസമ്മേളനം വിളിച്ചത്.
സംസാരത്തിനിടെ രാഹുല് പറഞ്ഞതിനെ തിരുത്തി ജയറാം രമേശ് ഇടപെടുകയായിരുന്നു. 'നിര്ഭാഗ്യവശാല്, ഞാനൊരു പാര്ലമെന്റംഗമാണ്. പാര്ലമെന്റില് ആ ആരോപണം ഉന്നയിച്ചത് നാല് മന്ത്രിമാരാണ്. സംസാരിക്കാനുള്ള എന്റെ അവസരം എന്നത് ജനാധിപത്യ അവകാശമാണ്' എന്നാണ് രാഹുല് പറഞ്ഞത്. ഉടന് തന്നെ ജയറാം രമേശ് അദ്ദേഹത്തെ തടഞ്ഞു.
ബിജെപിക്കാര് ഇതൊരു അവസരമായിക്കണ്ട് പരിഹസിക്കുമെന്നും നിര്ഭാഗ്യവശാല് എന്നത് ജനങ്ങളുടെ നിര്ഭാഗ്യത്താല് എന്ന് തിരുത്തണമെന്നും ആവശ്യപ്പെട്ടു. പതിഞ്ഞ സ്വരത്തിലാണ് അദ്ദേഹം അത് പറഞ്ഞതെങ്കിലും എല്ലാവരും കേട്ടു, വീഡിയോയില് റെക്കോര്ഡാവുകയും ചെയ്തു. ഉടന് തന്നെ രാഹുല് അതേറ്റു പറയുകയും ചെയ്തു. വീഡിയോ വൈറലായതോടെ സംഭവം ബിജെപി ഏറ്റെടുത്തു.
എത്ര കാലം, എങ്ങനെയൊക്കെ താങ്കള് അദ്ദേഹത്തെ പഠിപ്പിക്കും. ബിജെപി നേതാവ് സംപീത് പത്ര പരിഹസിച്ചു. വെള്ളിയാഴ്ച പാര്ലമെന്റില് സംസാരിക്കാന് അനുവദിക്കുമോ എന്ന് ഉറപ്പില്ലെങ്കിലും തനിക്ക് പ്രതീക്ഷയുണ്ടെന്ന് മാധ്യമങ്ങളോട് സംസാരിക്കവേ രാഹുല് ഗാന്ധി പറഞ്ഞു. 'ഞാന് ഇന്ന് രാവിലെ പാര്ലമെന്റിലെത്തിയത് ഞാന് ലണ്ടനില് പറഞ്ഞതും എനിക്ക് തോന്നുന്നതുമായ കാര്യങ്ങള് സഭയില് അവതരിപ്പിക്കുക എന്ന ലക്ഷ്യത്തോടെയാണ്. നാല് മന്ത്രിമാര് സഭയില് എനിക്കെതിരെ ആരോപണം ഉന്നയിച്ചു. സഭയില് സംസാരിക്കുക എന്നത് എന്റെ അവകാശമാണെന്നും രാഹുല് ഗാന്ധി പറഞ്ഞു.
ബിജെപി നേതാക്കള് തനിക്കെതിരെ ആരോപണം ഉന്നയിക്കുകയാണെന്നും അക്കാര്യത്തില് സംസാരിക്കാന് പാര്ലമെന്റംഗമെന്ന നിലയില് തനിക്ക് അവകാശമുണ്ടെന്നും സ്പീക്കറോട് പറഞ്ഞു. സ്പീക്കര് ചിരിക്കുക മാത്രമാണ് ചെയ്തത്. എംപി എന്ന നിലയില് തന്റെ ആദ്യത്തെ ഉത്തരവാദിത്തം സഭയില് മറുപടി നല്കുക എന്നതാണ്. അതിനു ശേഷമേ മാധ്യമങ്ങളോട് അക്കാര്യം വിശദീകരിക്കേണ്ടതുള്ളു എന്നും രാഹുല് ഗാന്ധി പറഞ്ഞു.
വിദേശത്ത് വെച്ച് നടത്തിയ പരാമര്ശങ്ങളുടെ പേരില് ബിജെപി ഉയര്ത്തുന്ന ആരോപണങ്ങളോടും രാഹുല് ഗാന്ധി പ്രതികരിച്ചു. രാജ്യത്ത് ജനാധിപത്യം ശക്തമാണെങ്കില് തന്നെ പാര്ലമെന്റില് സംസാരിക്കാന് അനുവദിക്കണമെന്ന് രാഹുല് ഗാന്ധി ഭരണപക്ഷത്തെ വെല്ലുവിളിച്ചു. ലണ്ടനില് നടത്തിയ പ്രസ്താവനയില് സഭയ്ക്കകത്ത് വിശദീകരണം നല്കാന് തയ്യാറെന്നും രാഹുല് ഗാന്ധി വ്യക്തമാക്കി.
നാല് കേന്ദ്രമന്ത്രിമാരാണ് തനിക്കെതിരെ ആരോപണമുന്നയിച്ചത്. വിഷയത്തില് പാര്ലമെന്റില് സംസാരിക്കാന് അവസരം ലഭിക്കുമെന്നാണ് പ്രതീക്ഷിക്കുന്നത്. മന്ത്രിമാര്ക്ക് കിട്ടിയ അവസരം തനിക്കുമുണ്ടാകുമെന്നും കരുതുന്നതായും അദ്ദേഹം പറഞ്ഞു. വിശദീകരണം നല്കുകയെന്നത് തന്റെ അവകാശമാണ്. ഇനിയതല്ല താന് നിശബ്ദനാക്കപ്പെടുമോയെന്നതും കണ്ടറിയേണ്ടി വരുമെന്നും രാഹുല് ഗാന്ധി ദില്ലിയില് വിശദീകരിച്ചു.
അതേ സമയം, അദാനി വിഷയത്തില് ഇതുവരെയും മറുപടി നല്കാത്ത പ്രധാനമന്ത്രി നരേന്ദ്രമോദിക്കെതിരെ രൂക്ഷ വിമര്ശനമാണ് രാഹുല് ഗാന്ധി ഉന്നയിച്ചത്. അദാനി വിഷയത്തില് മോദിക്ക് ഭയമാണെന്നും പ്രതിപക്ഷമുന്നയിച്ച ചോദ്യങ്ങള്ക്കൊന്നും മറുപടി നല്കാന് മോദി തയ്യാറായില്ലെന്നും അദ്ദേഹം പറഞ്ഞു. എന്നാല് രാഹുല് ഗാന്ധി എംപി മാത്രമാണെന്നും സഭയിലെ മറ്റ് അംഗങ്ങള്ക്ക് മുകളിലല്ലെന്നും കിരണ് റിജിജു മറുപടി നല്കി. രാഹുലിന് സ്വകാര്യ സ്വത്ത് പോലെ പാര്ലമെന്റില് പെരുമാറാന് ആകില്ല. പാര്ലമെന്റിന് അകത്തും രാജ്യത്തിന് പുറത്തും രാഹുല് നുണ പറഞ്ഞു. രാഹുല് ഗാന്ധി മാപ്പ് പറയണമെന്നും മന്ത്രി ആവര്ത്തിച്ചു.
"
https://www.facebook.com/Malayalivartha
