സെക്രട്ടേറിയറ്റില്‍ ഇനിമുതല്‍ പഞ്ചുചെയ്തശേഷം മുങ്ങുന്ന ജീവനക്കാരുടെ ശമ്പളം കട്ട് ചെയ്യണമെന്ന് മേലുദ്യോഗസ്ഥര്‍ക്ക് പൊതുഭരണ വകുപ്പ് അഡിഷണല്‍ ചീഫ് സെക്രട്ടറി കെ.ആര്‍.ജ്യോതിലാലിന്റെ നിര്‍ദ്ദേശം. ചില ജീവനക്കാര്‍ മുങ്ങിനടക്കുന്നതായി കണ്ടെത്തിയതിനെ തുടര്‍ന്നാണിത്.


ജീവനക്കാര്‍ കൃത്യമായി ഹാജരാകുന്നുണ്ടെന്നും ജോലികള്‍ വീഴ്ചയില്ലാതെ ചെയ്യുന്നുണ്ടെന്നും മേലുദ്യോഗസ്ഥര്‍ ഉറപ്പാക്കേണ്ടതാണ്. ജോലി കൃത്യമായി ചെയ്യാത്ത ജീവനക്കാരുടെ ശമ്പളം നല്‍കേണ്ടതില്ലെന്ന നിര്‍ദ്ദേശം കൃത്യസമയത്ത് അക്കൗണ്ട്‌സ് സെക്ഷനുകളെ അറിയിക്കണം. അവര്‍ക്കെതിരെ അച്ചടക്ക നടപടി സ്വീകരിക്കണമെന്നും കുറിപ്പില്‍ പറയുന്നു.

ജീവനക്കാര്‍ കൃത്യമായി ജോലി ചെയ്യുന്നുണ്ടെന്ന് ഉറപ്പുവരുത്തുന്നതിനുള്ള അക്‌സസ് കണ്‍ട്രോള്‍ സിസ്റ്റം കൊണ്ടുവരുമെന്ന് പ്രഖ്യാപിച്ചെങ്കിലും സര്‍വീസ് സംഘടനകളുടെ എതിര്‍പ്പിനെ തുടര്‍ന്ന് നടപ്പാക്കാനായില്ല. ഫയല്‍ മുഖ്യമന്ത്രിയുടെ പരിഗണനയിലാണുള്ളത്.