ബിഗ്ബോസ് 5 ന്റെ പ്രഖ്യാപനത്തിന് ശേഷവും കഴിഞ്ഞ സീസൺ തുടങ്ങിവെച്ച ഗോസിപ്പുകൾക്ക് അവസാനമായിട്ടില്ല.സീസൺ 4ൽ ഏറ്റവും കൂടുതൽ ആരാധകരെ സൃഷ്ടിച്ച മത്സരാർത്ഥിയായിരുന്നു ഡോ റോബിൻ രാധാകൃഷ്ണൻ. ഈയടുത്തായി നിരവധി വിവാദങ്ങളാണ് റോബിനെ തേടിയെത്തിയതെങ്കിലും റോബിന്റെ ആരാധക വൃത്തതിൽ യാതൊരു ഇടിവും സംഭവിച്ചിട്ടില്ല.ആരാധകരെപ്പോലെ തന്നെ നിരവധി വിമർശകരും റോബിനുണ്ട്.

ഒരു വർഷം തികയാറാകുമ്പോഴും ഏറെ സജീവമായി നിൽക്കുന്ന റിയാലിറ്റി ഷോ താരമാണ് റോബിൻ രാധാകൃഷ്ണൻ . ഉദ്‌ഘാടന ചടങ്ങുകളിലും പൊതുപരിപാടികളിലും റോബിൻ സ്ഥിര സാന്നിധ്യമാണ്. അടുത്തിടെ ആരതി പൊടിയുമായി റോബിൻ രാധാകൃഷ്ണന്റെ വിവാഹനിശ്ചയം കഴിഞ്ഞിരുന്നു. എന്നാലിപ്പോൾ റോബിന്റെ രാഷ്ട്രീയ പ്രവേശം ചർച്ചകൾക്ക് പുതിയ വഴിത്തിരിവ് നൽകുന്നു. കഴിഞ്ഞ മാസം റോബിൻ രാധാകൃഷ്ണൻ രാഷ്ട്രീയ പ്രവേശത്തെക്കുറിച്ച് സൂചന നൽകിയിരുന്നു.

വിവാഹം കഴിഞ്ഞ ശേഷമാകും രാഷ്ട്രീയ പ്രവേശമെന്നായിരുന്നു അന്ന് നൽകിയ സൂചന. രണ്ടര വർഷം കഴിഞ്ഞാൽ രംഗപ്രവേശത്തിനുള്ള സാധ്യത നൽകിയാണ് റോബിൻ സംസാരിച്ചത്. എന്നാൽ ഏറ്റവും പുതിയ പ്രചരണം അനുസരിച്ച്, റോബിൻ രാധാകൃഷ്ണൻ ബി.ജെ.പിയിൽ ചേരുമെന്നാണ് സോഷ്യൽ മീഡിയയിലെ സംസാരവിഷയം. പല പാർട്ടികളും റോബിൻ രാധാകൃഷ്ണനുമായി ചർച്ചയിൽ ഏർപ്പെട്ടിരുന്നു എന്നും റിപ്പോർട്ടിലുണ്ട്.

ബി.ജെ.പിയുടെ ലോക്സഭാ തെരഞ്ഞെടുപ്പ് സ്ഥാനാർത്ഥിയായി തിരുവനന്തപുരം മണ്ഡലത്തിൽ നിന്നും മത്സരിക്കാനാണ് സാധ്യത എന്ന് ഉറവിടം എന്തെന്ന് പരാമർശിക്കാത്ത റിപ്പോർട്ടുകളിലുണ്ട്. ക്രിക്കറ്റ് താരം ശ്രീശാന്ത് ഉൾപ്പെടെ ബി.ജെ.പിക്കായി ജനവിധി തേടിയ സ്റ്റാർ മണ്ഡലമാണ് തിരുവനന്തപുരം.തന്നെ ഇത്രയും വളർത്തിയ ജനങ്ങൾക്ക് വേണ്ടി പ്രവർത്തിക്കണം എന്ന ആഗ്രഹമാണ് രാഷ്ട്രീയപ്രവേശനം കൊണ്ട് ലക്ഷ്യമിടുന്നത് എന്ന് ഫെബ്രുവരിയിൽ ഒരു പൊതുപരിപാടിയിൽ സംസാരിക്കവേ റോബിൻ പറഞ്ഞിരുന്നു.

തൊട്ടടുത്ത ലക്‌ഷ്യം സിനിമയാണെന്നും റോബിൻ സൂചിപ്പിച്ചിരുന്നു.ഒരു സിനിമയ്ക്കായി തയാറെടുക്കവെയാണ് റോബിന്റെ വിവാഹനിശ്ചയം നടന്നത്. ഇതിനായി ശരീരഭാരം വർധിപ്പിച്ച റോബിൻ, നിശ്ചയത്തിന് മുൻപായി മറ്റൊരു മേക്കോവറും നടത്തിയിരുന്നു. വധു ആരതി പൊടി ഫാഷൻ ഡിസൈനറാണ്.