നാലും ഒമ്പതും വയസ്സുള്ള രണ്ടു മൈനര്‍ മക്കളെ ഉപേക്ഷിച്ച് ഷെയര്‍ ചാറ്റുവഴി പരിചയപ്പെട്ട യുവാവിനൊപ്പം പോയി താമസിച്ച കേസില്‍ യുവതിക്കും കാമുകനും അറസ്റ്റ് വാറണ്ട്. ഇരുവരെയും നെടുമങ്ങാട് ഡിവൈ എസ് പി മെയ് 27 നകം അറസ്റ്റ് ചെയ്യാന്‍ കോടതി ഉത്തരവിട്ടു.


യുവതിയും കാമുകനും ഹാജരാകാന്‍ കോടതി നിര്‍ദേശിച്ചിട്ടും പാലിക്കാത്തതിനാലാണ് കോടതി വാറണ്ടുത്തരവ് പുറപ്പെടുവിച്ചത്..

തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് എ.അനീസയുടേതാണുത്തരവ്.1860 ലെ ഇന്ത്യന്‍ ശിക്ഷാ നിയമത്തിലെ 109 (ഗൂഢാലോചനയടങ്ങുന്ന പ്രേരണ) , 317 (12 വയസിന് താഴെ പ്രായമുള്ള കുട്ടിയെ മാതാവോ പിതാവോ അതിന്റെ സംരക്ഷണയുള്ള ആളോ അരക്ഷിതാവസ്ഥയിലിട്ടിട്ടു പോകലും ഉപേക്ഷിക്കലും) , 34 ( കൂട്ടായ്മ) , 2015 ല്‍ നിലവില്‍ വന്ന ബാലനീതി (കുട്ടികളുടെ സംരക്ഷണവും പരിപാലനവും) നിയമത്തിലെ 75 എന്നീ വകുപ്പുകള്‍ പ്രകാരം കമ്മിറ്റല്‍ കേസെടുത്താണ് പ്രതികളോട് ഹാജരാകാന്‍ കോടതി ആവശ്യപ്പെട്ടത്.