ബ്രഹ്മപുരം കത്തുമ്പോള്‍ പൊടുന്നനെ ആയിരുന്നു കളക്ടര്‍ രേണുരാജിനെ വയനാട്ടിലേക്ക് സ്ഥലംമാറ്റിയത്. ബ്രഹ്മപുരത്തെ വിഷയത്തില്‍ മേല്‍നോട്ടം വഹിച്ച് ഓടിനടക്കുന്ന കളക്ടറെ സ്ഥലംമാറ്റിയതില്‍ വലിയ എതിര്‍പ്പ് ഉയര്‍ന്നിരുന്നു. എന്നാല്‍ അതിന് പിന്നാമ്പുറം ചികഞ്ഞാല്‍ പിണറായി കലിപ്പാണ് സ്ഥലംമാറ്റത്തിന് കാരണം. ഈ സര്‍ക്കാരിനിട്ട് എട്ടിന്റെ പണികൊടുത്താണ് രേണുരാജ് എറണാകുളം ജില്ലാ കളക്ടര്‍ പദവിയില്‍ നിന്ന് പടിയിറങ്ങിയത്. ബ്രഹ്മപുരം അന്തരീക്ഷത്തെ വിഷലിപ്തമാക്കും. 2022ല്‍ തന്നെ രേണുരാജ് ദേശീയ ഗ്രീന്‍ ട്രൈബ്യൂണല്‍ മുന്‍പാകെ റിപ്പോര്‍ട്ട് സമര്‍പ്പിച്ചിരുന്നു. ബ്രഹ്മപുരം ദുരന്തത്തില്‍ കൊച്ചി കോര്‍പറേഷന് 100 കോടി രൂപ പിഴ ചുമത്തിയിരിക്കുകയാണ് ദേശീയ ഹരിത ട്രൈബ്യൂണല്‍. രേണു രാജിന്റെ റിപ്പോര്‍ട്ട് സര്‍ക്കാരിനും കോര്‍പറേഷനും കനത്തപ്രഹരം ആയി.

മധ്യകേരളത്തിന്റെ അന്തരീക്ഷത്തെ വിഷമയമാക്കുന്ന 12 രാസവ്യവസായശാലകളും ബ്രഹ്മപുരം മാലിന്യ പ്ലാന്റും ഉള്‍പ്പെടുന്ന ചുരുക്കപ്പട്ടിക മുന്‍ജില്ലാ കലക്ടര്‍ ഡോ.രേണുരാജ് ഉള്‍പ്പെടുന്ന മൂന്നംഗ ഉപസമിതി 2022 ഒക്ടോബറില്‍ ദേശീയ ഗ്രീന്‍ ട്രൈബ്യൂണല്‍ മുന്‍പാകെ സമര്‍പ്പിച്ചത്. ഈ റിപ്പോര്‍ട്ടിന്റെ അടിസ്ഥാനത്തില്‍ എന്‍ജിടി മേല്‍നടപടികള്‍ സ്വീകരിക്കുന്നതിനിടയിലാണു ബ്രഹ്മപുരം ദുരന്തമുണ്ടായത്. കൊച്ചിയുടെ അന്തരീക്ഷത്തിലേക്കു രാത്രി വന്‍തോതില്‍ രാസമാലിന്യം തുറന്നുവിടുന്നത് ആരോഗ്യപ്രശ്‌നങ്ങള്‍ക്കു വഴിയൊരുക്കുന്നതായി ചൂണ്ടിക്കാട്ടി ഏരൂര്‍ സ്വദേശി എ.രാജഗോപാല്‍ സമര്‍പ്പിച്ച സ്വകാര്യ ഹര്‍ജിയിലാണു വിഷയം പഠിക്കാന്‍ മൂന്നംഗ സമിതിയെ എന്‍ജിടി നിയോഗിച്ചത്. കേന്ദ്ര മലിനീകരണ നിയന്ത്രണ ബോര്‍ഡ് സയന്റിസ്റ്റ് ഡോ. വി.ദീപേഷ്, സംസ്ഥാന മലിനീകരണ നിയന്ത്രണ ബോര്‍ഡ് സീനിയര്‍ സയന്റിസ്റ്റ് പി.ഗീത എന്നിവരായിരുന്നു കമ്മിറ്റിയിലെ മറ്റ് അംഗങ്ങള്‍. അന്തരീക്ഷത്തില്‍ പടരുന്ന വിഷവായുവിന്റെ രാസസ്വഭാവം പഠനവിധേയമാക്കിയാല്‍ മാത്രമേ അതിന്റെ ഉറവിടം കൃത്യമായി കണ്ടെത്താന്‍ കഴിയുകയുള്ളുവെന്നും ഉപസമിതി റിപ്പോര്‍ട്ട് ചെയ്തിരുന്നു. ഇതിന്റെ അടിസ്ഥാനത്തില്‍ രാസവായുവിന്റെ സാന്നിധ്യം ആര്, എപ്പോള്‍ അറിയിച്ചാലും ഉടനടി പരിശോധന നടത്തി ഉറവിടം കണ്ടെത്താന്‍ നിര്‍ദേശിച്ചാണ് എന്‍ജിടി അന്ന് ഹര്‍ജി തീര്‍പ്പാക്കിയത്.

ബ്രഹ്മപുരം മുള്‍മുനയില്‍ നില്‍ക്കുമ്പോഴാണ് ഒരു ആവശ്യവുമില്ലാതെ രേണു രാജിനെ സ്ഥലംമാറ്റുന്നത്. ഇതില്‍ സര്‍ക്കാരിനെതിരെ വലിയ എതിര്‍പ്പ് ഉയര്‍ന്നു. പിണറായി പക വന്നുപോയാല്‍ പിന്നെ അവരുടെ കാര്യം ഏതാണ്ട് തീരുമാനം ആകുമല്ലോ. അതാണ് രേണുരാജിന്റെ കാര്യത്തില്‍ സംഭവിച്ചത്. കലിപ്പ് തീര്‍ക്കാനാണ് സ്ഥലംമാറ്റം എന്ന് പുറത്തേക്ക് വരാതിരിക്കാന്‍ ആലപ്പുഴ,തൃശ്ശൂര്‍ കളക്ടര്‍മാരെ കൂടി സ്ഥലംമാറ്റി. എന്നാല്‍ പിടിറങ്ങുംമുന്‍പ് സര്‍ക്കാരിന് നല്ല കിണ്ണംകാച്ചിയ മറുപടി പറഞ്ഞിട്ടാണ് രേണു രാജ് പോയത്. നീ പെണ്ണാണ് എന്ന് കേള്‍ക്കുന്നത് അഭിമാനമാണ്. നീ വെറും പെണ്ണാണ് എന്ന് പറയുന്നിടത്താണ് പ്രതിഷേധം. ഇതായിരുന്നു ആ മറുപടി. പ്രതിഷേധം അറിയിച്ച് തന്നെയാണ് രേണുരാജ് മടങ്ങിയത്. ജില്ലയുടെ ചരിത്രത്തില്‍ ആദ്യമായിട്ടാണ് ഒരു കളക്ടര്‍ രാത്രി സ്ഥാനം ഒഴിഞ്ഞ് മറ്റൊരു കളക്ടര്‍ക്ക് ചുമതല നേരിട്ട് കൈമാറാതെ ജില്ല വിട്ടത്. ശക്തമായ നിലപാടായിരുന്നു രേണു രാജിന്റേത്. ഐഎഎസ്സുകാരെ കളിപ്പാവ പോലെ കൊണ്ടു നടക്കാമെന്ന് പിണറായി സര്‍ക്കാര്‍ കരുതിയെങ്കില്‍ തെറ്റിപ്പോയ്. അവര്‍ ശക്തമായ് പ്രതികരിക്കും. രാഷ്ട്രീയക്കാരുടെ ചട്ടുകങ്ങളായ് ഉദ്യോഗസ്ഥരെ കാണരുത്. ബ്രഹ്മപുരത്ത് സര്‍ക്കാര്‍ കാണിച്ച ചതികല്‍ ഒന്നൊന്നായ് പുറത്തേക്ക് വരികയാണ്. ഇതിനിടെ സര്‍ക്കാരിന് നേരെ മുറവിളി ഉയരുന്നു. ഹരിത ട്രൈബ്യൂണല്‍ ബ്രഹ്മപുരത്തിന്റെ പേരിലിട്ട 500 കോടി പിഴ കേരള സര്‍ക്കാര്‍ പൊതുഖജനാവില്‍ നിന്ന് അടയ്ക്കുകയേ ഉള്ളൂ എന്നും ആ ഭാരം കൂടി പൊതുജനം ഏറ്റെടുക്കേണ്ടി വരുമെന്നും ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. ഇപ്പോള്‍ നടക്കുന്ന അന്വേഷണം സര്‍ക്കാരിനും സിപിഎമ്മിനും ബ്രഹ്മപുരം തീപിടിത്തത്തില്‍ ഉള്ള പങ്കു പുറത്തു വരാതിരിക്കാനാണെന്നും കേന്ദ്ര ഏജന്‍സി അന്വേഷണം ഏറ്റെടുക്കണമെന്നും സുരേന്ദ്രന്‍ പറഞ്ഞു. ബ്രഹ്മപുരം വിഷയവുമായി ബന്ധപ്പെട്ടു കരിമുകളില്‍ നിന്നു നടത്തിയ മാര്‍ച്ചിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.