കെഎസ്ആര്ടിസി ശമ്പള പ്രതിസന്ധി പരിഹരിക്കുന്നതിന് തൊഴിലാളി സംഘടനകളുമായി ഗതാഗത മന്ത്രി ആന്റണി രാജു നാളെ ചര്ച്ച നടത്തും
കെഎസ്ആര്ടിസി ശമ്പള പ്രതിസന്ധി പരിഹരിക്കുന്നതിന് തൊഴിലാളി സംഘടനകളുമായി ഗതാഗത മന്ത്രി ആന്റണി രാജു നാളെ ചര്ച്ച നടത്തും.
ശമ്പളം ഘട്ടം ഘട്ടമായി വിതരണം ചെയ്യുവാനുളള തീരുമാനത്തെ തൊഴിലാളി സംഘടനകള് എതിര്ക്കുന്ന പശ്ചാത്തലത്തിലാണ് അംഗീകൃത ട്രേഡ് യൂനിയനുകളെ മന്ത്രി ചര്ച്ചക്ക് വിളിച്ചത്. കഴിഞ്ഞയാഴ്ച ചര്ച്ച നടന്നെങ്കിലും പരാജയപ്പെടുകയായിരുന്നു.
ശമ്പളവിതരണം ഗഡുക്കളായി നല്കുന്നത് തുടരാനാണ് തീരുമാനമെങ്കില് സമരം ശക്തമാക്കാനും പണിമുടക്കാനുമാണ് പ്രതിപക്ഷ തൊഴിലാളി സംഘടനകളുടെ തീരുമാനമുള്ളത്. ഘട്ടം ഘട്ടമായി ശമ്പളം വിതരണം ചെയ്യുന്നതിനെതിരെ പ്രതിഷേധിക്കാന് ടിഡിഎഫും ബിഎംഎസും പൊതുസമരമുന്നണി പരിഗണിക്കുന്നുണ്ട്.
തൊഴിലാളി യൂണിയനുകളുടെ എതിര്പ്പ് മറികടന്ന് കെഎസ്ആര്ടിസി ജീവനക്കാര്ക്ക് ശമ്പളം ഗഡുക്കളായി വിതരണം ചെയ്തിരുന്നു.
ഫെബ്രുവരി മാസത്തിലെ പകുതി ശമ്പളമാണ് നല്കിയത്. സര്ക്കാര് സഹായമായി നല്കിയ 30 കോടിയില് നിന്നാണ് ശമ്പളം വിതരണം ചെയ്തത്. എന്നാല് ജീവനക്കാരുടെ ശമ്പളം എല്ലാ മാസവും അഞ്ചാം തീയതിക്ക് മുന്പ് നല്കണമെന്ന് ഹൈക്കോടതി അന്ത്യശാസനം നല്കിയിട്ടുണ്ടായിരുന്നു. മാസം തോറുമുള്ള കളക്ഷനില് നിന്ന് ജീവനക്കാര്ക്ക് ശമ്പളം നല്കാന് കഴിയില്ലെന്ന് ഹൈക്കോടതിയില് നല്കിയ സത്യവാങ്മൂലത്തില് കെഎസ്ആര്ടിസി അറിയിക്കുകയും ചെയ്തിരുന്നു.
ഒരു വര്ഷമായി സര്ക്കാര് നല്കുന്ന 50 കോടി രൂപയില് നിന്നാണ് ശമ്പളം കൊടുക്കുന്നത്.
https://www.facebook.com/Malayalivartha