വീട്ടിലെ കട്ടിലിന്റെ അടിയിലും നന്നായി നോക്കണമെന്നുപറഞ്ഞ് പോലീസ് എന്ന് പരിചയപ്പെടുത്തിയ ഒരാള്‍ അനുമോളുടെ വീട്ടിലേക്ക് വിളിച്ചിരുന്നു... കട്ടപ്പനയില്‍ വീട്ടിലെ കട്ടിലിനടിയില്‍ പുതപ്പില്‍ പൊതിഞ്ഞ് യുവതിയുടെ മൃതദേഹം കണ്ടെത്തിയ സംഭവം കൊലപാതകമെന്ന് പോലീസ്.... തലയ്‌ക്കേറ്റ ക്ഷതമാണ് മരണകാരണമെന്ന് മൃതദേഹപരിശോധനയില്‍ വ്യക്തമായി.

ഒളിവില്‍പ്പോയ ഭര്‍ത്താവിന്റെ മൊബൈല്‍ ഫോണ്‍ തമിഴ്‌നാട് അതിര്‍ത്തിയോടുചേര്‍ന്ന വനത്തില്‍ പോലീസ് കണ്ടെത്തി. ഇയാള്‍ക്കുവേണ്ടിയുള്ള അന്വേഷണം ഊര്‍ജിതമാക്കി. ചൊവ്വാഴ്ച വൈകീട്ടാണ് വട്ടമുകുളേല്‍ ബിജേഷിന്റെ ഭാര്യ വത്സമ്മയുടെ(അനുമോള്‍-27) മൃതദേഹം കണ്ടെത്തിയത്. അഞ്ചുദിവസം പഴക്കമുള്ള മൃതദേഹം അഴുകി ദുര്‍ഗന്ധം വമിക്കുന്ന അവസ്ഥയിലായിരുന്നു. ചൊവ്വാഴ്ച രാവിലെമുതല്‍ ബിജേഷിനെയും കാണാതെവന്നതോടെ കൊലപാതകമാണെന്ന സംശയം ശക്തമായത്.

അനുമോളെ കാണാനില്ലെന്ന് ബിജേഷ് ശനിയാഴ്ച മുതല്‍ വീട്ടുകാരോടും നാട്ടുകാരോടും പറഞ്ഞിട്ടുണ്ടായിരുന്നു. കുട്ടിയെ തന്റെയടുത്ത് കിടത്തിയശേഷം ഭാര്യ വീടുവിട്ടുപോയെന്നാണ് ഇയാള്‍ പറഞ്ഞത്. ആറുവയസ്സുള്ള മകളെ തറവാട്ടുവീട്ടില്‍ കൊണ്ടുപോയി വിട്ടശേഷം കട്ടപ്പന പോലീസില്‍ പരാതിയും നല്‍കിയിരുന്നു.ഞായറാഴ്ച അനുമോളുടെ വീട്ടുകാരും, മകളെ കാണാനില്ലെന്ന് പോലീസില്‍ പരാതി നല്‍കിയിരുന്നു.


വീട്ടിലെ കട്ടിലിന്റെ അടിയിലും നന്നായി നോക്കണം എന്നുപറഞ്ഞ് ചൊവ്വാഴ്ച രാവിലെ, പോലീസ് എന്ന് പരിചയപ്പെടുത്തിയ ഒരാള്‍ അനുമോളുടെ വീട്ടിലേക്ക് വിളിച്ചതില്‍ സംശയം തോന്നിയ ബന്ധുക്കള്‍ വൈകുന്നേരം ആറുമണിയോടെ പേഴുങ്കണ്ടത്തെ വീട്ടില്‍ച്ചെന്ന് പരിശോധിച്ചപ്പോഴാണ് മൃതദേഹം കണ്ടെത്തിയത്. ബിജേഷാണ് ഫോണ്‍ വിളിച്ചതെന്ന് സംശയം.അതേസമയം മൃതദേഹം പാമ്പനാര്‍ കല്ലാര്‍ കവലയിലെ സെയ്ന്റ് ജോര്‍ജ് പള്ളി സെമിത്തേരിയില്‍ സംസ്‌കാരം നടത്തി.