ആഭ്യന്തര വകുപ്പിനെതിരെ ആരോപണവുമായി സിപിഎം. ആഭ്യന്തരവകുപ്പിന് ഇരട്ടനീതിയെന്നാണ് സിപിഎം ആരോപിച്ചത് . രാഷ്ട്രീയകേസുകളിൽ പ്രതിയാകുന്ന സിപിഎം പ്രവർത്തകരെ വിലങ്ങുവച്ചാണ് കോടതിയിൽ ഹാജരാക്കിയത്. എന്നാൽ കാപ്പാ കേസിൽപ്പെട്ട ബിജെപി കൗൺസിലർ ആർ.സുഗതനെ പൊലീസ് വിലങ്ങുവെച്ചില്ലെന്നും സിപിഎം ജില്ലാ സെക്രട്ടറി വി. ജോയി ആരോപിച്ചു.

സിപിഎം പാളയം ലോക്കൽ സെക്രട്ടറി ഐ.പി.ബിനുവിനെയും എസ്എഫ്‌ഐ സംസ്ഥാന സെക്രട്ടറി നന്ദനെയും വിലങ്ങുവച്ചാണ് കൊണ്ടുവന്നത് . എന്നാൽ 19 കേസുകളിൽ പ്രതിയായ സുഗതനെ വിയ്യൂർ സെൻട്രൽ ജയിലിൽനിന്ന് കൊണ്ടുവന്നപ്പോൾ വിലങ്ങുവച്ചില്ല. എല്ലാ സംരക്ഷണവും സുഗതനു നൽകുകയും ചെയ്തു .

റെയിൽവേ സ്‌റ്റേഷനിൽ എത്തിച്ചപ്പോൾ പോലും സുഗതന് വിലങ്ങുണ്ടായിരുന്നില്ല. ബിജെപി ആണെങ്കിൽ യുഡിഎഫ് സർക്കാർ എന്ത് സഹായവും ചെയ്തുകൊടുക്കും. രാഷ്ട്രീയ കേസുകളിൽ പെട്ടവരെ വിലങ്ങുവയ്ക്കാൻ ആഭ്യന്തരമന്ത്രി അനുമതി കൊടുത്തിരിക്കുകയാണ്. ഇരട്ടനീതിയാണ് കേരളത്തിൽ നടക്കുന്നതെന്നും വി.ജോയി വ്യക്തമാക്കി.