ആറേകാല്‍ കോടി രൂപയുടെ ലഹരി മരുന്നായ ഹാഷിഷ് കള്ളക്കടത്ത് നര്‍ക്കോട്ടിക് കേസില്‍ പ്രതികളുടെ ജാമ്യ ഹര്‍ജി തള്ളി. വാണിജ്യ അളവില്‍ മയക്കുമരുന്ന് വിപണനം നടത്തിയെന്ന് ആരോപിക്കുന്ന കേസില്‍ അന്യ സംസ്ഥാനക്കാരായ പ്രതികള്‍ കസ്റ്റഡിയില്‍ കഴിഞ്ഞ് വിചാരണ നേരിടാന്‍ കോടതി ഉത്തരവിട്ടു.

തിരുവനന്തപുരം ഏഴാം അഡീ. ജില്ലാ സെഷന്‍സ് കോടതി ജഡ്ജി പ്രസുന്‍ മോഹന്റെതാണ് ഉത്തരവ്. ഗൗരവമേറിയ കൃത്യം ചെയ്തതായി ആരോപിക്കപ്പെട്ട പ്രതികളെ വിചാരണ തുടങ്ങാനിരിക്കെ ജാമ്യം നല്‍കി സ്വതന്ത്രരാക്കിയാല്‍ സാക്ഷികളെ സ്വാധീനിക്കാനും ഭീഷണിപ്പെടുത്താനും തെളിവുകള്‍ നശിപ്പിക്കാനും സാധ്യതയുണ്ട്. ശിക്ഷ ഭയന്ന് ഒളിവില്‍ പോകാനും സാധ്യതയുണ്ട്.

അപ്രകാരം സംഭവിച്ചാല്‍ പ്രതിക്കൂട്ടില്‍ നിര്‍ത്തി വിചാരണ ചെയ്യാന്‍ പ്രതികളെ ലഭിക്കാത്ത സ്ഥിതി സംജാതമാകുമെന്ന നിരീക്ഷണത്തോടെയാണ് ജാമ്യഹര്‍ജി തള്ളിയത്. പ്രതികളുടെ ജാമ്യഹര്‍ജി തലസ്ഥാന വിചാരണ കോടതി പരിഗണിക്കട്ടെയെന്ന നിരീക്ഷണത്തോടെ സുപ്രീം കോടതി തള്ളിയിരുന്നു.

ഹാഷിഷ് കടത്തു കേസില്‍ ജയിലില്‍ കഴിയുന്ന 1 മുതല്‍ 3 വരെ പ്രതികളായ ഹാഷിഷ് വാങ്ങാനെത്തിയ തമിഴ്‌നാട് തൂത്തുക്കുടി സ്വദേശി ആന്റണി റൊസാരി ഫെര്‍ണാണ്ടോ (39) ,കടത്തുകാരായ ഇടുക്കി തങ്കമണി സ്വദേശികളായ ബിനോയി തോമസ് (44) , റ്റി. എന്‍. ഗോപി (68) എന്നിവരുടെ ജാമ്യ ഹര്‍ജികളാണ് നിരസിച്ചത്.

അലിബി വീഡിയോ പെന്‍ഡ്രൈവ് ഉള്ളടക്കം സൂക്ഷ്മമായി പരിശോധിക്കാന്‍ ഒരു മാസം സമയം വേണമെന്ന് ഫോറന്‍സിക് സൈബര്‍ ഡിവിഷന്‍ അസി. ഡയക്ടര്‍ ദീപ കോടതിയില്‍ സാവകാശം തേടിയിരുന്നു. പ്രതികള്‍ ഹാജരാക്കിയ അലിബി (alibi)  തെളിവായ വീഡിയോ ഡിവിഡിയുടെ ഫോറന്‍സിക് സയന്‍സ് ലാബ് റിപ്പോര്‍ട്ട് ഹാജരാക്കാന്‍ തലസ്ഥാന വിചാരണ കോടതി ഉത്തരവിട്ടിരുന്നു. ഫോറന്‍സിക് മേധാവി മാര്‍ച്ച് 15 ന് റിപ്പോര്‍ട്ട് ഹാജരാക്കാനായിരുന്നു ഉത്തരവ്.

3 പ്രതികളുടെയും ജയില്‍ റിമാന്റ് കോടതി ദീര്‍ഘിപ്പിച്ച് പ്രതികളെ ജയിലിലേക്ക് തിരിച്ചയച്ചു. അലിബി (സംഭവ സമയം മറ്റൊരിടത്തായിരുന്നെന്ന പ്രതികളുടെ വാദം) തെളിയിക്കുന്ന വീഡിയോ വിചാരണ കോടതി വീണ്ടും പരിഗണിക്കാന്‍ സുപ്രീം കോടതി ഉത്തരവിട്ടിരുന്നു. തൊണ്ടി മുതലുകളുമായി എക്‌സൈസ് തങ്ങളെ സ്‌പോട്ട് അറസ്റ്റ് ചെയ്തതായി ആരോപിക്കുന്ന കൃത്യ സമയം രണ്ടും മൂന്നും പ്രതികളായ തങ്ങള്‍ ഇടുക്കിയിലായിരുന്നെന്ന വീഡിയോ കോടതിയില്‍ പ്രദര്‍ശിപ്പിച്ച് വിചാരണക്കോടതി വീണ്ടും പരിഗണിക്കാനാണ് സുപ്രീം കോടതി ഉത്തരവ്.