ജന്മദിനം ആഘോഷിച്ച് മണിക്കൂറുകള്‍ മാത്രം... വിശാഖപട്ടണത്ത് മൂന്ന് നില കെട്ടിടം തകര്‍ന്ന് വീണ് രണ്ട് കുട്ടികളടക്കം മൂന്ന് പേര്‍ക്ക് ദാരുണാന്ത്യം... പരുക്കേറ്റ് അഞ്ച് പേര്‍ ആശുപത്രിയില്‍.

ഇന്ന് പുലര്‍ച്ചെയാണ് വിശാഖപട്ടണം കളക്ടറേറ്റിന് സമീപമുള്ള രാമജോഗി പേട്ടയില്‍ മൂന്ന് നിലകളുള്ള കെട്ടിടം തകര്‍ന്ന് വീണത്. എസ് ദുര്‍ഗ പ്രസാദ് (17), സഹോദരി എസ് അഞ്ജലി (10), ചോട്ടു (27) എന്നിവരാണ് മരണപ്പെട്ടത്.

അഞ്ജലിയുടെ ജന്മദിനം ആഘോഷിച്ച് മണിക്കൂറുകള്‍ മാത്രം കഴിഞ്ഞപ്പോഴാണ് അപകടം സംഭവിച്ചത്. എന്‍ഡിആര്‍എഫും പൊലീസും ചേര്‍ന്ന് നടത്തിയ രക്ഷാപ്രവര്‍ത്തനത്തിലാണ് കെട്ടിടത്തില്‍ കുടുങ്ങിക്കിടന്ന അഞ്ച് പേരെ രക്ഷിക്കാനായത്.

ഈ കെട്ടിടത്തിന് തൊട്ടടുത്ത് മറ്റൊരു കെട്ടിടത്തിനായി പൈലിംഗും കുഴല്‍ക്കിണര്‍ കുഴിക്കലും നടക്കുന്നുണ്ടായിരുന്നു. തുടര്‍ച്ചയായ പൈലിംഗില്‍ കെട്ടിടത്തിന് വിള്ളല്‍ വീഴുകയും തകര്‍ന്ന് വീഴുകയുമായിരുന്നുവെന്ന് സ്ഥലം പരിശോധിച്ച ശേഷം വ്യക്തമാക്കി പൊലീസ് .
അതേസമയം സംഭവത്തില്‍ തൊട്ടടുത്ത സ്ഥലമുടമയ്‌ക്കെതിരെ കേസെടുത്തു. പുലര്‍ച്ചെ ഒന്നരയോടെയാണ് അപകടം ഉണ്ടായതെന്നാണ് പ്രദേശ വാസികള്‍ പറയുന്നത്. രണ്ട് പതിറ്റാണ്ട് പഴക്കമുള്ള കെട്ടിടമാണ് തകര്‍ന്നു വീണത്.