സംസ്ഥാനത്ത് വേനൽ മഴ തുടരും.അടുത്ത ദിവസങ്ങളിൽ ഇടിമിന്നലോട് കൂടിയ ഒറ്റപ്പെട്ട മഴയ്‌ക്കാണ് സാധ്യത. മധ്യ തെക്കൻ കേരളത്തിലെ കിഴക്കൻ മേഖലയിൽ കൂടുതൽ മഴ സാധ്യതയുണ്ട്

ഓട്ടോമാറ്റിക് വെതർ സ്റ്റേഷൻ കണക്ക് പ്രകാരം സംസ്ഥാനത്ത് ഇന്നലെ ഏറ്റവും ഉയർന്ന ചൂട് രേഖപ്പെടുത്തിയത് പാലക്കാട് എരിമയൂരിലാണ്. 41.4 ഡിഗ്രി സെൽഷ്യസ്.

അതേസമയം കരുണാപുരത്ത് പെയ്ത വേനൽ മഴയിൽ ആലിപ്പഴം പെയ്തിറങ്ങിയിരുന്നു. ഇന്നലെ 2.50ന് ശേഷം പെയ്ത മഴയിലാണ് ആലിപ്പഴം പെയ്തത്. കേരള തമിഴ്നാട് അതിർത്തിയിലും ആലിപ്പഴ മഴ പെയ്തു. കടുത്ത ചൂടിനിടയിലും ആലിപ്പഴം പെയ്തുള്ള വേനൽമഴ ആശ്വാസമായി. അടുത്തിടെയൊന്നും ഇതുപോലെ ആലിപ്പഴം കിട്ടിയിട്ടില്ലെന്ന് കർഷകരും പറയുന്നു.

കൃഷിയൊക്കെ കരിഞ്ഞുണങ്ങി, കുടിവെള്ളത്തിന് കടുത്ത ക്ഷാമം നേരിട്ടിരുന്നു. മഴ കിട്ടിയതോടെ താപനിലയിൽ നേരിയ കുറവുണ്ടായിട്ടുണ്ട്. സംസ്ഥാനത്ത് വേനൽ മഴയ്‌ക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ച സാഹചര്യത്തിൽ കർഷകരും ആശ്വാസത്തിലാണ്. മലയോര മേഖലയിൽ കൂടുതൽ മഴയ്‌ക്കു സാധ്യതയുണ്ട്.