എടത്വായില്‍ വീശിയടിച്ച കാറ്റില്‍ തെങ്ങ് മറിഞ്ഞ് വീണ് നെല്‍കര്‍ഷകന്‍ മരിച്ചു.....തലവടി പഞ്ചായത്ത് 10-ാം വാര്‍ഡില്‍ ചേരിക്കല്‍ചിറ ഗിരീശന്‍ (50) ആണ് മരിച്ചത്.

ഇന്നലെ രാത്രി 8.45 ഓടെ വീശിയടിച്ച കാറ്റില്‍ തെങ്ങ് കടപുഴകി ഗിരീശന്റെ മുകളിലേയ്ക്ക് വീഴുകയായിരുന്നു. അപകട സ്ഥലത്തു വെച്ച് ഗിരീശന്റെ ജീവന്‍ നഷ്ടമായി.

തലവടി എട്ടിയാട് മുക്ക് കോതാകരി പാടത്ത് നിന്ന തെങ്ങാണ് കടപുഴകി വീണത്. നെല്‍കര്‍ഷകനും ക്ഷീര കര്‍ഷകനുമായ ഗിരീശന്‍ കോവിഡ് കാലത്ത് തലവടി പ്രദേശത്തെ വിവധ സ്ഥലങ്ങളിലുള്ള വീടുകളില്‍ പശുവിനെ കറന്ന് പാല്‍ മില്‍മായില്‍ എത്തിക്കുന്ന ചുമതല നടത്തിയിരുന്നു. സംസ്‌കാരം പിന്നീട് . ഭാര്യയും രണ്ടു മക്കളുമുണ്ട്.

അതേസമയം, ഇന്നലെ സംസ്ഥാനത്ത് പലയിടങ്ങളിലും മഴയും കാറ്റുമുണ്ടായിരുന്നു. സംസ്ഥാനത്ത് ഉയര്‍ന്ന തിരമാലയ്ക്കും കടലാക്രമണത്തിനും സാധ്യതയെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം. കേരള തീരത്ത് 11ന് രാത്രി 11.30 വരെ 0.5 മുതല്‍ 1.0 മീറ്റര്‍ വരെ ഉയര്‍ന്ന തിരമാലയ്ക്കും കടലാക്രമണത്തിനും സാധ്യത. മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം.