തോപ്പുംപടിയിലെ ഒരു സൂപ്പര്‍ മാര്‍ക്കറ്റില്‍ നിന്ന് 62 ലക്ഷം രൂപ കവര്‍ന്ന കേസില്‍ ജീവനക്കാരായ പ്രതികള്‍ പിടിയില്‍. സ്ഥാപനത്തിലെ കാഷ്യറായിരുന്ന മട്ടാഞ്ചേരി നസ്രത്ത് ഹോളിക്രോസ് നഗര്‍ സ്വദേശി സനമോള്‍ എംഎ (31), മുന്‍ ജീവനക്കാരനായ പള്ളുരുത്തി സ്വദേശി രഞ്ജു സാജ് എബ്രഹാം (23) എന്നിവരാണ് അറസ്റ്റിലായത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

2022 മേയ് മുതല്‍ 2025 ഒക്‌ടോബര്‍ വരെയുള്ള കാലയളവില്‍ ബില്ലിംഗ് വിഭാഗത്തില്‍ ജോലി ചെയ്തുവരികയായിരുന്നു സനമോള്‍. ദിവസേന ക്യാഷ് കൗണ്ടറില്‍ നിന്ന് പണം കവര്‍ന്ന ശേഷം ഇവര്‍ കൂട്ടുപ്രതിയായ രഞ്ജുവിന് പണം കൈമാറും. ഇയാളുടെ അക്കൗണ്ടിലാണ് പണം സൂക്ഷിച്ചിരുന്നത്. സൂപ്പര്‍മാര്‍ക്കറ്റിലെ ആകെ വില്‍പ്പനയും വരുമാനവും തമ്മില്‍ വ്യത്യാസം കാണാന്‍ തുടങ്ങിയതോടെ ഉടമ സനമോളെ നിരീക്ഷിക്കാന്‍ തുടങ്ങി. തെളിവുകള്‍ ശേഖരിച്ച ശേഷം പൊലീസില്‍ പരാതി നല്‍കുകയായിരുന്നു.

പിടിക്കപ്പെടുമെന്ന് മനസിലായതോടെ സനമോള്‍ വിദേശത്തേക്ക് കടന്നു. പൊലീസ് ഇവര്‍ക്കെതിരെ ലുക്കൗട്ട് നോട്ടീസ് പുറപ്പെടുവിച്ചു. അതിനാല്‍, വിമാനത്താവളങ്ങള്‍ ഒഴിവാക്കി നേപ്പാള്‍ വഴിയാണ് സനമോള്‍ ഇന്ത്യയില്‍ തിരിച്ചെത്തിയത്. ഇവര്‍ കൊച്ചിയിലെത്തിയെന്ന് വിവരം ലഭിച്ചതോടെ പൊലീസ് അറസ്റ്റ് ചെയ്തു. കൊച്ചി സിറ്റി പൊലീസ് കമ്മീഷണര്‍ കാളിരാജ് മഹേഷ്‌കുമാറിന്റെ നിര്‍ദേശപ്രകാരം, മട്ടാഞ്ചേരി എസിപിയുടെ മേല്‍നോട്ടത്തിലാണ് അന്വേഷണം നടന്നത്.