നീറ്റ് പരീക്ഷ ചോദ്യപ്പേപ്പര്‍ ചോര്‍ത്തിയ സംഭവത്തില്‍ ഉത്തരവാദികള്‍ക്ക് ലഭിക്കാവുന്നതില്‍വച്ച് ഏറ്റവും വലിയ ശിക്ഷ ലഭിക്കണമെന്ന് പ്രധാനമന്ത്രി നരേന്ദ്ര മോദി. ഇത്തരം ചോദ്യപ്പേപ്പര്‍ ചോര്‍ച്ച തടയേണ്ടത് രാജ്യത്തിന്റെ ഉത്തരവാദിത്തമാണെന്നും പ്രധാനമന്ത്രി എന്‍ഡിഎ പാര്‍ലമെന്ററി പാര്‍ട്ടി യോഗത്തില്‍ പറഞ്ഞതായി കേന്ദ്ര മന്ത്രി കിരണ്‍ റിജിജു പറഞ്ഞു. നീറ്റ് ചോദ്യപ്പേപ്പര്‍ വിഷയത്തില്‍ കേന്ദ്ര മന്ത്രി ധര്‍മേന്ദ്ര പ്രധാന്റെ രാജിയാവശ്യപ്പെട്ട് കോക്രോച്ച് ജനത പാര്‍ട്ടിയുടെ (സിജെപി) നേതൃത്വത്തില്‍ നടന്ന മാര്‍ച്ചില്‍ സംഘര്‍ഷമുണ്ടാകുകയും ഒട്ടേറെപ്പേര്‍ക്ക് പരുക്കേല്‍ക്കുകയും ചെയ്തതിനു പിറ്റേന്നാണ് പ്രധാനമന്ത്രിയുടെ പ്രതികരണം.

രാഷ്ട്രീയമായ ഭിന്നതകള്‍ നിലനില്‍ക്കുമ്പോള്‍ത്തന്നെ, രാജ്യത്തെ യുവാക്കളുടെ ഭാവിക്കും ക്ഷേമത്തിനുമായി ഒന്നിച്ചു നില്‍ക്കേണ്ട ഉത്തരവാദിത്വം എല്ലാ എംപിമാര്‍ക്കുമുണ്ടെന്നും, എന്‍ഡിഎ സഖ്യകക്ഷികളും പ്രതിപക്ഷ പാര്‍ട്ടികളും ഇക്കാര്യത്തില്‍ ഒന്നിച്ചു പ്രവര്‍ത്തിക്കണമെന്നും പ്രധാനമന്ത്രി പറഞ്ഞതായി റിജിജു അറിയിച്ചു. തങ്ങളുടെ അവകാശങ്ങളും താല്‍പര്യങ്ങളും സംരക്ഷിക്കപ്പെടണമെന്ന് വിദ്യാര്‍ഥികള്‍ക്ക് ഉറപ്പു നല്‍കേണ്ടതുണ്ടെന്നും എന്നാല്‍ പ്രതിപക്ഷം നടത്തുന്ന ഗൂഢാലോചനയെക്കുറിച്ചും അവര്‍ അറിഞ്ഞിരിക്കണമെന്നും പ്രധാനമന്ത്രി പറഞ്ഞു.