കെ.എസ്.ആര്‍.ടി.സിയില്‍ നിന്ന് വിരമിച്ചവരുടെ പെന്‍ഷന്‍ കുടിശിക ഏപ്രില്‍ 12നകം നല്‍കിയില്ലെങ്കില്‍ ചീഫ്‌സെക്രട്ടറിയും ഗതാഗതവകുപ്പ് സെക്രട്ടറിയും കോടതിയില്‍ നേരിട്ടെത്തി കാരണം വിശദീകരിക്കണമെന്ന് ഉത്തരവിട്ട് ഹൈക്കോടതി.


സമയബന്ധിതമായി പെന്‍ഷന്‍ നല്‍കാനായി ഹൈക്കോടതി നിര്‍ദ്ദേശിച്ചിട്ടും നടപടികള്‍ സ്വീകരിക്കുന്നില്ലെന്നാരോപിച്ച് തിരുവനന്തപുരം വക്കം സ്വദേശി കെ. അശോക്കുമാര്‍ നല്‍കിയ കോടതിയലക്ഷ്യ ഹര്‍ജിയില്‍ ജസ്റ്റിസ് ദേവന്‍ രാമചന്ദ്രനാണ് ഇടക്കാല ഉത്തരവ് നല്‍കിയത്.
ഹര്‍ജി 12ന് വീണ്ടും പരിഗണിക്കും.

കെ.എസ്.ആര്‍.ടി.സി പെന്‍ഷന്‍ വിതരണം മുടങ്ങിയതിനെത്തുടര്‍ന്ന് ഹര്‍ജിക്കാരന്‍ ഉള്‍പ്പെടെയുള്ളവര്‍ നല്‍കിയ ഹര്‍ജികളില്‍ സമയബന്ധിതമായി പെന്‍ഷന്‍ നല്‍കാനായി സിംഗിള്‍ ബെഞ്ച് ഉത്തരവ് നല്‍കിയിരുന്നത്. പെന്‍ഷന്‍ തുക മാസത്തിലെ ആദ്യത്തെ ആഴ്ചതന്നെ നല്‍കണമെന്നും കഴിയുമെങ്കില്‍ ആദ്യ അഞ്ചുദിവസത്തിനുള്ളില്‍ നല്‍കണമെന്നും ഉത്തരവില്‍ വ്യക്തമാക്കി.

ഹൈക്കോടതിയുടെ നിര്‍ദ്ദേശം ഉണ്ടായിട്ടും പെന്‍ഷന്‍ വിതരണം നടക്കുന്നില്ലെന്ന് ചൂണ്ടിക്കാട്ടിയാണ് ഹര്‍ജിക്കാരന്‍ കോടതിയലക്ഷ്യ ഹര്‍ജി നല്‍കിയത്.


ഈ ഹര്‍ജി പരിഗണിച്ച മാര്‍ച്ച് 16 മുതല്‍ നിലപാട് അറിയിക്കാന്‍ കെ.എസ്. ആര്‍.ടി.സി സമയം തേടുകയാണെന്ന് ഹൈക്കോടതി വിലയിരുത്തി. മാര്‍ച്ച് 20ന് ഹര്‍ജി പരിഗണിച്ചപ്പോള്‍ പെന്‍ഷന്‍ നല്‍കാനുള്ള നടപടികള്‍ സ്വീകരിച്ചെന്നും ചില വകുപ്പുകളുടെ അനുമതികൂടി ലഭിക്കേണ്ടതുണ്ടെന്നും വ്യക്തമാക്കി ഒരാഴ്ചകൂടി സമയം കെ.എസ്.ആര്‍.ടി.സി തേടിയിരുന്നു.

പിന്നീട് മാര്‍ച്ച് 28നും 31നും ഹര്‍ജി പരിഗണനയ്ക്കു വന്നപ്പോള്‍ വീണ്ടും സമയം തേടുകയാണുണ്ടായത്. ഇതോടെ രണ്ടുമാസത്തെ പെന്‍ഷന്‍ കുടിശ്ശികയായി. തുടര്‍ന്നാണ് രണ്ടുദിവസത്തിനകം പെന്‍ഷന്‍ നല്‍കിയില്ലെങ്കില്‍ നേരിട്ട് ഹാജരായി വിശദീകരണം നല്‍കാന്‍ നിര്‍ദ്ദേശിച്ചത്.