ജനസംഖ്യയിൽ ചൈനയെ പിന്തള്ളി ഒന്നാമതെത്താനൊരുങ്ങി ഇന്ത്യ. യുണൈറ്റഡ് നേഷൻസ് പുറത്തുവിട്ട കണക്കുകൾ പ്രകാരം ഈ വർഷം പകുതിയോടെ ഇന്ത്യയിൽ ചൈനയേക്കാൾ മൂന്ന് മില്യൺ ആളുകൾ അധികമായി കാണും. ഇന്ത്യയുടെ ജനസംഖ്യ 1.4286 ബില്യണും ചൈനയുടെ ജനസംഖ്യ 1.4257 ആയാണ് യുണൈറ്റഡ് നാഷൻസ് പോപ്പുലേഷൻ ഫണ്ട്‌സ് പുറത്തിറക്കിയ 'സ്റ്റേറ്റ് ഓഫ് വേൾഡ് പോപ്പുലേഷൻ റിപ്പോർട്ട് 2023'ൽ വ്യക്തമാക്കുന്നത്.

2023 ഫെബ്രുവരി വരെയുള്ള കണക്കുകളാണ് യു എൻ പരിശോധിച്ചത്. 340 മില്യൺ ജനസംഖ്യയുമായി അമേരിക്കയാണ് മൂന്നാം സ്ഥാനത്ത്. ഇന്ത്യ എന്നാണ് ചൈനയെ മറിക്കടക്കുകയെന്ന കൃത്യമായ തീയതി പറയാനാകില്ലെന്ന് യു എൻ അധികൃതർ വ്യക്തമാക്കുന്നു. ഇന്ത്യയിൽ അവസാനമായി സെൻസസ് നടത്തിയത് 2011ൽ ആയിരുന്നെന്നും കണക്കുകൾ ലഭ്യമല്ലാത്തതിനാൽ കൃത്യമായ തീയതി പ്രഖ്യാപിക്കാനാകില്ലെന്നും യു എൻ വിശദീകരിക്കുന്നു. 2021ൽ നടത്തേണ്ടിയിരുന്ന കണക്കെടുപ്പ് കൊവിഡ് മൂലം സാദ്ധ്യമായിരുന്നില്ല.

8.045 ബില്യൺ ആണ് ലോക ജനസംഖ്യയായി കണക്കാക്കുന്നത്. ഇതിൽ മൂന്നിലൊന്നും ഇന്ത്യയിലും ചൈനയിലും നിന്നുള്ളവരാണ്. 2011 മുതലുള്ള ഇന്ത്യയുടെ വാർഷിക ജനസംഖ്യ വളർച്ച 1.2 ശതമാനമാണെന്നാണ് സർക്കാർ കണക്കുകൾ വ്യക്തമാക്കുന്നത്.